Kolose 3

1 Lamatualain fee hei masod'a feu', ona' Ana tao nasod'a bali' hei mo Kristus. Ia na, Kristus endo' sia mamana nenefee had'a-hormat sia Lamatualain bob'oa onan. Naa de hei musi d'u'a-d'u'a dala' fo mana tao Lamatua' ralan namaho'o.

2 D'u'a mikindoo neu dala-dala' fo Lamatua' hii' ra. Afi' tao mata' neu dala' mana tao' a atahori rala nara ramaho'o'.

3 Te lele' Kristus mate, hei o mate boe. De hei masod'a feum naa, nenesad'ia', huu nenepa'a-sii' ena mo Kristus, mana no Lamatualain sia nusa tetu' a.

4 Kristus nasod'a sia hei ralam, ma Ana o tao hei misod'a no matetu'. De lele' Ana bali' nema, hei o sou mi'ib'ue mo E boe. Basa naa ra, manaseli'!

5 Naeni de hei musi nggari hendi hihii-nanau de'ulaka mara. Ona' a: hii' a hohongge; hii' a tao d'ala-d'ala manggenggeo-malafu' ra; hii' a tao tungga ao-sisi' hihii-nanaun; hii' a tao de'ulaka' mata'-mata'; hii' a mu'ena basa-b'asa' e (tao-tao te naa ona' sosonggo' e, huu so'u munanaru dala' laen mana seti hendi Lamatua')

6 Dala' naa ra mana tao Lamatualain namanasa seli, losa Ana nae huku-d'oki basa atahori nda mana rena E sa.

7 Dalahulun, hei misod'a ona' naa boe, huu rala mara ra'ab'ue ro basa d'ala de'ulaka' naa ra.

8 Te ia na, hei musi nggari hendi basa dud'u'at fo hii' a tao de'ulaka'. Ona' a: hii' a miminasa; nasab'ori'; mimbed'a' rala'; mi'imuti-mi'imuu atahori naran; ma ola' ded'ea mamaet.

9 Ama afi' peko-leleko' esa no esa. Huu hei nggari hendi dud'u'at fo hii' a tao de'ulaka' ena, ma lao hela masod'a mbara mara ena. De ia na hei nggati, no dud'u'at feu' ena. Naa ona' atahori nggari hendi b'ua-lo'a mbara manggenggeon nara, de seluao b'ua-lo'a feu' fo meu' a. Lamatualain mana na'adadad'i hei. Ma ale' ia o Ana fee nggi boe mihine Eni, ma doo-doo na tao nggi dad'i mi mata' esa ona' Eni boe

10

11 Sia masod'a feu' ia, hita nda nile atahori sia' a rou dea' tae, sira atahori Yahudi, do nda Yahudi sa; atahori mana sunat do, nda sunat sa; atahori nusa dea' do; atahori nda mana nahine had'at do; ate do, atahori nenembo'it do. Naa nda pantin sa! Te pantin, mete ma ara ra'ab'ue ro Kristus, ma Ana nasod'a sia rala nara.

12 Lamatualain tengga nala hei ena, huu Ana sue hei. masud na nae ona bee na hei dad'i Eni atahori meumaren mana fea' no atahori laen. Naa de hei musi dad'i atahori marala malole', rala meulau', rala neloe-ned'ae', no se'ana'us, ma mana ma'atataa'.

13 Hei musi mi'itataa' ma mihine esa no esa. Mete ma mia hei ia hambu mana sangga' a netofa-neuu' no nonoon, afi' mimbed'a' rala'. Te hei musi lilii' hendi salan, ma fee ambon neu e, ona' Lamatua' lilii' hendi hei sala mara boe.

14 Misined'a, te susue' a nalena' basa e. Hei musi mi'ena susue' sia rala mara, ona' atahori pake b'uas sia ao nara. Huu susue' naa, ona' abas fo hita tenu dad'i teme meulaun seli. Naa mana pa'a hita dad'i teu esa.

15 Hita bisa bad'ame to Lamatualain, huu Kristus. Dad'i hei musi fee d'ame mana mia Kristus lole-lau sia hei rala mara. Lamatua' nau basa hei misod'a mole-d'ame esa no esa, huu basa hei nenepa'a-sii dad'i ao' esa ena. Ma rala mara musi mimiho'o mikindoo' a, huu Ana tengga nala nggi ena.

16 Kristus Ded'ea-o'olan nara o musi lole-lau hei ralam ma masod'a mara. Ded'ea-o'ola' naa ra ona' hata-heto mafelit, fee neu hei. Ratud'u dala' neu nggi fo mihine dala' nae' tungga Lamatualain dud'u'an. Fo, bisa pake minori ma fee nesenened'a' esa no esa. Mete ma minori atahori mara, afi' minori no d'eres, te minori no rala se'a-na'us ma sofe' no nemeho'ot. Pake sosod'a koa-kio' ra, sosod'a rohani' ra, ma sosod'at fo hei sura' ao mara fo so'u kokoa-kikio' neu Lamatualain.

17 Hei ia, dad'i Yesus Kristus lima onan ena. Dad'i misined'a, basa saa fo hei ola' ra, hei mendi Naran. Basa saa fo hei tao' ra, hei mendi Naran. De afi' lilii' tao basa-b'asa' e sia malanggam Yesus Kristus “naran”. Ma mo'e makasi mikindondoo' a neu Aman, Lamatualain.

18 Sao ina' re! Ama musi rena-rena' sao mara, huu naa nandaa neu atahori mana tungga neu Yesus Kristus.

19 Sao tou' re? Ama musi sue sao mara, ma afi' laka-ese se, fo rala nara afi' mera.

20 Ana nggara e! Ama musi rena ina-ama mara sia basa dala' ra, te naa mana tao Lamatualain ralan namaho'o.

21 Ama' re! Afi' tao d'eres mbali ana mara, naa fo ara afi' ramanasa ma rambed'a' rala' ro nggi.

22 Atahori mana tao ues re! sia raefafao' ia, hei musi tao tungga malanggam sia basa dala' ra. Afi' sangga' a rala' lele' ara rita nggi. Te ue-tao tao nemeho'o rala nara nekendoo' a. Tao-ues sia basa dala' ra no matetu', huu mihine mae, Lamatualain memete' nggi.

23 Hei tao sa o, tao no manggatee'. Hei musi tao-ues ona' hei tao fee Lamatuam Yesus Kristus, nda tao fee neu atahori sa. Huu hei mete-se'u E. Dei fo Ana bala-b'ae ue-tatao mara no hata-heto'.

24

25 Te mete ma hei nda tao-ues no matetu' sa, dei fo Ana huku-d'oki nggi. Huu Eni ndoo-meu' ma nda mete mata' sa.