Ded'enu' ra Dud'uin 28

1 Basa hai losa mad'a' ata no masod'a', dei de hai bub'ulu' naa, pulu Malta.

2 Nusa' naa atahori nara simbo hai no malole'. Huu ud'an ma ma'arini' seli, de ara rani'i ai monae' sia retaan, ma ro'e hai mi d'ara.

3 Paulus o neu hehere hau ana', fo nae tao neu ai a. Te ana ndae hau ra risi' ai a, aiboi' ma, mengge maraso' esa d'ea nema, huu nda na'atataa' ai a matob'i na sa. De ana ero nakandika Paulus lima na.

4 Atahori Malta ra rita mengge a ero nahere' Paulus lima na ma, ara ola-ola oi, “Atahori ia, mana nisa atahori. Mae ana nasod'a mia rii-ree ra ena o, uanale na ta'o naa ena. Naa de, ana nda bisa nasod'a sa ena. Huu seka tao de'ulaka', naa, ana musi lemba-doi e.”

5 Atahori naa ra du'a rae, mbeifen te, Paulus lima na mbae, do nggengger te, ana mate neu' ena. Te Paulus birus hendi mengge a ai rala neu. Ma ana nda med'a nambeta mbei sa' boe. Boe ma, atahori naa ra mete-mete', te Paulus nda ta'o bee sa' boe. Ma ara du'a oi, “Se'u te atahori ia, atahori ra songgo' a!”

6

7 Nda doo' no mamana' naa sa, hambu hofernor ume no rae loa na. Hofernor a nara na, Publius. Ana nema simbo hai mia retaan a, de no'e hai mi leo sia ume na. De ana mete-se'u hai fai telu.

8 Lele' naa, hofernor ama b'onggi na namahed'i mafeo-matob'i', ma sali nda naloe' sa. De Paulus neu se'u e mia kama na rala. Ana ndae lima na neu atahori mamahed'i' naa, de hule-o'e fee ne. Ma ana hai neu' ena.

9 Ara rita hofernor ama na hai ma, atahori mamahed'i' fea' ra rema risi' Paulus. Ara ro'e tulun neu e, de ana na'ahahai' se.

10 Basa ma, atahori ra ratud'u makasi de rendi sud'i' a saa nae' fee hai. Hai leo mia Malta fula telu, losa fai rii-ree ra raloe'. Lele' naa, ofa' esa mia kota Aleksandria mananafu eni' a fai rii-ree sia pulu na. Ofa' a nara na, Ana Dua', huu hambu paton sosonggot ana dua' sia ofa' a mata' na. Hai mae sae ofa' naa mikindoo Roma mi. De hai mae sae ofa' a ma, atahori Malta ra rendi fee hai lepa-ngges ma sud'i a saa fo hai parlu sia ofa'.

11

12 Hai lao koe-koe, losa kota Sirakusa sia pulu Sisilia. Boe ma, hai nafu mia naa fai telu.

13 Mia naa, hai lao tungga-tungga' a tasi Sisilia suun, de losa kota Regium. Mbila fefetun fai, ani onas a fela, de hai lao mikindoo lai-lai. Finiesa na ma, hai losa namo, sia kota esa naran Putioli.

14 Basa ma, hai onda hela ofa' a, de mi sangga Yesus atahori nara. Hai mindaa mo se ma, ara ro'e fo hai leo mo sira. De hai numban mo se, nggarei esa. Basa de, hai lao ei' a Roma mi.

15 Yesus atahori mana sia Roma nara rena oi hai mae naa mi ma, ara rema soru hai mia dala' talad'a na. Ruma randaa ro hai mia pasar Apius; ma ruma randaa ro hai mia mamana' sa, naran Ume Tutuli' Telu. Paulus nita se ma, ana no'e makasi nae-nae neu Lamatualain, ma rala na dad'i manggatee.

16 Losa Roma ma, [sold'ad'u ra tao atahori bui ra bui rala reu.] Te ara fee Paulus seb'a ume esa. Ana leo no sold'ad'u esa fo nanea nahere' e. Ru'a se lima nara nenepa'a' no rante.

17 Fai telu ma, Paulus no'e lasi' Yahudi ra sia naa, fo rema randaa ro e. Ara ra'ab'ue ma, ana nafad'e se nae, “Toronoo nggare! Au sia ia, huu malangga Yahudi ra to'u au mia Yerusalem. Basa de, ara fee au isi' mana parenda Roma lima na. Te, au nda tao sala saa sa' boe. Au nda tao saa fo lab'an neu hita atahori nara sa. Au o nda lab'an hita atoran adat fo simbo mia hita bei-ba'i nara sa.

18 Manaparenda ra paresa' au ded'ea ngga sia naa ena. Te ara nda hambu sala ngga saa sa' boe, nandaa no hukun mates. Naa de, ara rae mbo'i au.

19 Te malangga Yahudi ra nda simbo mana parenda ra ne'etu' na sa. Naa de, nau nda nau sa o, au musi hene isi' mana parenda ata' a. Au tao ta'o naa, te nda ae kalaak au atahori nggara sa.

20 Huu ded'eat naa, au u'ub'ue basa toronoo' se sia ia. Naa fo, ata ola-ola' saa fo atahori Yahudi ra rahani' a. Basa hita hule-hule' neu Mane' fo Lamatualain nae haitua fo tao nasod'a hita atahori Isra'el ra. Huu naa, ara pa'a au no rante ia.”

21 Boe ma ara rataa oi, “Losa fai' ia, hai nda fe'e simbo susura esa sa' boe mia Yudea nafad'e toronoo' ded'ea ma ia sa. Ma toronoo' mana rema mia naa ra o, nda ola' saa-saa so'al toronoo' Paul sa.”

22 Te hai hii rena saa fo toronoo' namahere', huu hai rena sia bee-b'ee atahori ra nda simbo partei Kristen nenori na sa. Te hai nda fe'e bub'ulu' matetu na sa. De toronoo' mufad'e hai dei.”

23 Basa ma, ara rala hara' esa, de helu fai esa, fo randaa selu'. Losa fai na ma, atahori nae' rema ra'ab'ue sia Paulus ume na. De ana dui se Lamatualain parenda Na. Ana ola' nendi' ba'i Musa ma Lamatualain mana ola-ola Nara susura nara, fo tao se ramahere Yesus. Ana ola' mia fefetun losa bob'o'.

24 Ara rena basa Paulus o'ola na ma, ruma ramahere, te ruma hoko'.

25 Ara rareresi losa ruma rae bali'. Te Paulus ola' nae, “Hei mireresi ma ia ra, ndaa no saa fo dalahulun Lamatualain Dula-dale Meumare Na nafad'e neu Ba'i Yesaya,

26 nae, ‘Muu mufad'e atahori nusa' ia mae, “Dei fo hei rena mikindoo' a Au ola-ola Ngga, te nda mihine mbei sa' boe! Dei fo hei mete mikindoo' a Au tatao Ngga, te nda tao-afi' neu sa.”

27 Huu atahori nusa' ia rala nara manggatee na seli. Naa de, ara nda nau rena sa ena, ma ara nda nau rita sa ena. De hela neu fo ara sud'i boe rena fai, ma ara sud'i boe rita fai. Hela neu fo rala nara o ra'ateme rakandoo, losa ara nda rahine dala' bali' nisi' Au sa ena. De au nda parlu u'uhahai' se fai sa.’”

28 Boe ma, Paulus ola' nate'e nae, “Toronoo nggare, ta'o ia! Hei musi bub'ulu' ia naa Lamatualain sad'ia masod'a' fee atahori nda Yahudi ra sa, huu ara o rae rena E boe.”

29 [Paulus ola' basa ma, atahori naa ra bali'. Te dud'u'a nara nda randaa sa, huu ara balaban.]

30 Basa naa ma, Paulus leo mia ume seseb'a na too rua. Ana simbo malole basa atahori mana rema randaa ro e.

31 No ta'o naa, ana hambu dui se, Lamatualain parenda Na, ma nanori se Lamatua' Yesus Dala Masod'a Na. Ana mbarani ola' relo-relo, ma nda hambu saa kai-baa sa' boe. Ama Teofilus, au dud'ui ngga losa' a ia ena. Makasi. Mia au, Lukas