Ded'enu' ra Dud'uin 25

1 Lele' naa, hofernor feu' a, nara na Festus, lali Kaisarea neu fo nae parenda. Ana leo fai telu' a mia naa ma, ana lao nakandoo Yerusalem neu.

2 Sia naa, malangga agama Yahudi malanga nara ma malangga fea' ra reu randaa ro e fo rahine e. Ara o ola-ola' Paulus ded'ea na sia sira ne'eb'ue na naa.

3 Ara o ro'e, mete ma bisa naa, hofernor denu atahori nara ro bali' Paulus Yerusalem nema, huu ara rala rala' ena rae tao risa Paulus sia dala' talad'a na.

4 Te hofernor nataa oi, “Ama nggaree. Ta'o ia. Hela fo ara ranea e sia Kaisarea dei. Te au o ae haelai bali' naa uu boe.

5 De mete ma hei se hambu koasa fo nggero ded'eat ia, naa, tungga mo au Kaisarea uu. Mete ma atahori ia tao sala' saa, naa, hei bisa mid'ed'ea mo e sia naa.”

6 Basa ma, Festus leo mbei ma fai sanahulu mia Yerusalem, dei de fe'e bali' nisi' Kaisarea. Atahori Yahudi hira tungga e. Mbila' na ma, hofernor nae paresa' ded'eat naa. De ana denu ro Paulus rala neu nandaa no e. Paulus rala neu ma, atahori Yahudi ra rambarii' rereo' rala e, de fee sala' mata'-mata' neu e. Te ara nda ratud'u bukti saa sa' boe.

7

8 Boe ma Paulus nasala'e ao na nae, “Ama hofernor. Au nda fe'e tao de'ulaka' saa sa' boe. Au o nda tao saa lab'an hai atoran agama Yahudi ma sa. Au nda tao unggenggeo Lamatualain Uma Hule-o'e Huu Na sia Yerusalem. Ma au o nda tao saa lab'an mana parenda Roma ra atoran na sa.”

9 Te hofernor nae ha'i rala' no atahori Yahudi ra. Naa de, ana natane Paulus oi, “Ho du'a ta'o bee? Mete ma au nggero ded'ea ma sia Yerusalem, naa, ho nau, do hoko'?”

10 Paulus rena hofernor natane ta'o naa ma, ana nataa oi, “Ama' hofernor, au ia, atahori Roma. De ia naa, au umburi' sia ama' hofernor mia manaparenda Roma. Manaparenda Roma mana na'ena hak nggero au ded'ea ngga tungga atoran na. Dad'i au nda nau isi' Yerusalem, fo ne'etu' ded'ea ngga sia naa sa. Ama' bub'ulu', au nda tao sala' saa sa' boe, lab'an neu atahori Yahudi ia ra.

11 Mete ma au tao sala', nandaa no hukun mate, naa, au simbo. Te mete ma saa fo ara ola' naa, nda teb'e sa, tungga atoran Roma, nda hambu esa bisa fee au uu atahori ia ra lima nara sa. Ara sangga' a dala', fo rae risa au parsuma' a. De ia naa, tungga au hak ngga, au endi ded'eat ia nisi' mamana nggengero ded'eat huu' a, fo mane monae' Kaisar sia Roma, na'etu' ded'eat ia!”

12 Hofernor rena Paulus na'o naa ma, ana no'e dud'u'at mia nonoo mana tungga nggero ded'eat naa. Basa ma, ana nafad'e Paulus nae, “Huu mo'e hene misi' Kaisar, de ho musi muu sia Roma.” Ola' basa ma, hofernor nate'e ne'eb'uet naa.

13 Basa ma, atahori Yahudi ra mane na, nara na Agripa, no feto na, nara na Bernike, rema sia Kaisarea, fo rae fee had'at neu hofernor feu' a.

14 Ara numban fai hira ro hofernor Festus. Fai' esa, Festus dui Paulus ded'ea na neu ru'a se. Ana oi, “Ama mane'! Sia Kaisarea ia, hai minea atahori sa, nara na Paulus. Dalahulu na, hofernor mbaraa' a nda fe'e na'etu' ded'ea na sa.

15 Fe'e lai-lai' ia, au Yerusalem uu ma, malangga agama Yahudi malangga ra ro lasi-lasi adat ra, rema kalaak Paulus, de ro'e au hukun e.

16 Te ufad'e se ae, ‘Tungga mana parenda Roma atoran na, au musi paresa' ded'eat ia dei. Atahori mana rad'ed'ea' ra musi randaa dei. Au ae rena hei fee sala' saa neu e. Ma ana musi hambu nasala'e ao na boe. Dei fo au bisa u'etu' ded'eat naa, ma utud'a' hukun saa neu e.’

17 Au bali' Kaisarea uma ma, atahori Yahudi hira tungga boe. Mbila' na ma, au paresa' tute' ded'eat naa. Au denu se ro Paulus nema nandaa no au, fo au bisa bub'ulu' ded'eat ia huu-pata na.

18 Boe ma, atahori Yahudi ra rambarii' de dui Paulus sala nara. Te saa fo rafad'e' neu au' a, bera na nda ona' au d'u'a' a sa.

19 Ara ratofa, huu ara nda rala' esa so'al agama nara sa. Ma, rareresi ro Paulus aka' atahori sa, nara na Yesus. Tungga atahori Yahudi ra, Yesus mate ena. Te Paulus to'u nahere' oi Yesus naa, nasod'a bali' ena.

20 Ara rareresi ta'o naa, te huu au atahori feu', de nda ita' ae u'etu' ded'eat agama ia ta'o bee sa' boe. Naa de au utane Paulus ae, ‘Ona bee na, au u'etu' ded'ea ma ia sia Yerusalem, do?’

21 Te ana nda nau sa. Ana no'e hene nisi' keser. Naa de au u'ungge uhere' e, losa ka'e ala dei fo haitua e Roma neu.”

22 Ara rena Festus dud'ui na ma, Mane Agripa oi, “Mete ma bisa naa, au ae rena ao ngga mia atahori naa.” Festus nataa oi, “Bisa! Dei fo au ator fo fetu na, ama' bisa rena ao ma mia atahori naa.”

23 Mbila' ma, hofernor Festus ator, fo mane Agripa rena Paulus o'ola na. Ana o ator fo atahori nae' bisa rena Paulus o'ola na boe. Malangga sold'ad'u ra ma atahori monaen sia kota Kaisarea, basa se rema rena Paulus. Boe ma, mane Agripa no Bernike maso' rala rema ro bua-bau mane nara. Basa atahori fee had'at neu ru'a se. Basa se ra'ab'ue ena ma, hofernor denu ro Paulus rala neu.

24 Ara ro Paulus ma, hofernor ola' oi, “Mane Agripa, ama nggara, ma toronoo susue nggare. Atahori ia, nara na Paulus. Malangga Yahudi hira rad'ed'ea ro e. Ruma sia Yerusalem ma ruma sia ia, ara risi' au, fo ra'asusuu' au rae, atahori ia, nda nandaa nasod'a sa ena.

25 Naa de au paresa' e, te nda hambu sala na nandaa no hukun mate sa. Te ana no'e hene nisi' mana parenda ata'. Naa de, nau nda nau sa, au musi fee ne Roma neu.

26 Mete ma au haitua e, naa, au musi tao susura. Te ia na, au musi sura' saa, fee mane monae' a? Naa de au u'ub'ue basa ama' se, fo rena e. Basa naa, au o'e ama mane' Agripa fee au dud'u'at, fo sura' uhine susura fee neu mane monae' a. Au du'a na nda malole' sa, mete ma au fee ded'eat ia nisi' kaisar, te nda ufad'e atahori ia sala na sa. Au o'ola ngga, ba'u a ia. Makasi.”