< Ded'enu' ra Dud'uin 18 >
1 Lele' naa, hambu mane monae' Roma, naran Klaudius. Ana namanasa atahori Yahudi ra, ma oi hendi se mia kota Roma sia nusa Italia. De ara sea-saranggaa sia bee-b'ee. Hambu atahori Yahudi esa naran Akila, no saon, Priskila. Ru'a se rela lao hela nusa Italia, risi' kota esa, naran Korintus. Akila ia, mia nusa Pontus. Ue-tatao na, mana tao saa-saa mia banda rou'. Lele' naa, Paulus o lao hela kota Atena boe, de lao nisi' Korintus neu. Sia naa, ana nahine Akila no Priskila, huu ana o mana tao saa-saa mia banda rou' boe. Ara leo ma tao-ues ra'ab'ue.
2
3
4 Mete ma losa atahori Yahudi ra fai hahae ao na, Paulus maso' nisi' ume hule-o'e neu. Ana sob'a kokoe atahori Yahudi ra ro atahori fea' ra, fo ramahere Lamatua' Yesus.
5 Silas no Timotius rema mia nusa Makedonia ma, Paulus hahae tao ues na. Hatu'-rerelon ana aka' a nafad'e atahori Yahudi ra nae, “Atahori fo hita tahati eni' a ma'ahulun, fo Lamatualain helu nae haitua' a, Ana nema ena. Naeni, Yesus!”
6 Te atahori Yahudi ruma aka' lab'an ma ola' ra'atutud'a' e. De Paulus nggafur afu mia bua na, fo tao bukti nae, eni nda tao afi' neu se sa, huu ara nda nau simbo Dud'ui Malole' fo eni nafad'e' a. Ana ola' nae, “Hei seli ma! Hei mi'imbambake'! Te hela neu! Mete te hei lemba-misaa sala-kilu mara. Au nda tanggon hei sa ena. Ale' ia au nda tao-mata' neu hei atahori Yahudi ra sa ena. Au ae uu unori atahori fea' nda atahori Yahudi ra sa.”
7 Hambu ume esa sia ume hule-o'e' a seri'. Tenu ume' a naran, Titius Yustus. Ana nda atahori Yahudi sa, te ralan hii Lamatualain. Paulus lao hela atahori Yahudi ra ma, ana maso' nisi' ama Titius ume na.
8 Nda doo' sa ma, malangga ume hule-o'e a namahere Lamatua' Yesus. Nara na, Krispus. Ume isi nara o ramahere, ona' atahori Korintus fea' mana rena Paulus ra boe. De Paulus se sarani basa se.
9 Tetemba' esa, ona' meit e, Paulus rena Lamatualain ola' nae, “Paulus! Afi' mumutau, ma afi' male-ma'a sia ue-tataos ia, te ue-tatao ma nda fe'e basa sa. Ho musi munori mukundoo Dud'ui Malole Ngga neu atahori ia ra.
10 Musuned'a o! Ho nda ue-tao ao ma sa. Te Au o nggo. Ona' mae atahori sangga ra'asususa' nggo, te Au pasa ei ngga o nggo. Au o taomata' neu nggo hatu'-rerelon. Afi' lilii', sia kota ia, atahori nggara nae'.”
11 Paulus rena ta'o naa ma, ana leo d'oo-d'oo mia kota Korintus. Ana nanori Lamatua' Dala Masod'a Na, too esa seseri'.
12 Lele' naa, Galio dad'i hofernor sia nusa Akaya. Basa boe ma, atahori Yahudi ruma ma'ira' fo ro Paulus nisi' hofernor, sia mamana nggero ded'eat.
13 Losa naa ma, ara kalaak Paulus rae, “Atahori ia kokoe atahori hetar fo tungga agama feu'. Te mana parenda Roma ra nda rataa agama naa sa!”
14 Paulus nae ola' nasalae' ao na ma, hofernor ola' nggero e. Ana na'angge atahori mana kalaak Paulus nae, “We! Atahori Yahudi re, pasa ndiki' mara! Mete ma hei mae mendi atahori mana tao deulaka' do atahori mana ratati', naa, au musi rena hei ded'eat mara.
15 Te ded'eat fo hei mendi' ia, hei ded'ea ume rala ma. Hei mireresi aka' a hohoro-lalane' agama Yahudi, no ded'ea-o'olan ma nara nara. Ded'eat naa, nda mana parenda ia ra urusan na sa!”
16 Boe ma, hofernor mbuu hendi' se mia mamana nggenggero ded'eat naa.
17 Atahori Yunani ra o to'u rala atahori sa, naran Sostenes. Eni, malangga sia atahori Yahudi ra ume hule-o'e na. Ara to'u rendi e, de momoko e mia hofernor mata na. Te hofernor nda tao mata' neu se sa.
18 Basa ma, Paulus leo nakandoo sia Korintus. Te dod'oo ma, ana natea atahori mamahere' sia naa ra. Ana nisi' kota' esa, nara na Kengkrea, na'ab'ue no Priskila no Akila, fo rahani ofai. Sia naa, Paulus eu namboli' langga na, fo dad'i bukti oi, saa fo eni helu neu Lamatualain, ia naa, eni tao basa ena. Dei de ara sae ofai lao risi' kota Efesus. Losa naa ma, ara onda. Paulus lao hela nonoon ka rua' ra, de nisi' atahori Yahudi ra ume hule-o'e na, de ola-ola no atahori mana sia naa ra.
19
20 Ara ola-ola' ma, atahori Yahudi ra ro'e Paulus leo dod'oo no se. Te ana tola no na'us,
21 ma natea se nae, “Toronoo nggare! Afi' ha'i rala' e! Mete ma Lamatualain soi dala', dei fo au uma se'u selu' nggi.” Ola' basa ma, ana lao hela Efesus.
22 Boe ma, ana sae ofai nakandoo kota Kaisarea neu, de onda sia naa. Basa de, ana nisi' Yerusalem, fo neu natea atahori mamahere' mana sia naa ra. Basa ma, ana bali' nisi' kota Antiokia.
23 Ana leo dod'oo mia naa. Basa ma, ana lao ndule nusa Galatia no nusa Frigia fo tao manggatee atahori mamahere' ra rala nara.
24 Lele' naa, hambu atahori Yahudi sa mia kota Aleksandria sia nusa Masir. Naran, Apolos. Eni, atahori mana ola' mahine'. Ma nahine basa Lamatualain Susura Meumare Na isi na. Fai' naa, ana fe'e losa Efesus ena.
25 Ana rena dud'uit so'al Yesus ena, ma ana o hii dui selu' neu atahori fea' ra boe. Ana dui no manggarulit, ma saa fo ana ola' naa, mema' teb'e. Te ana nda fe'e nahine basa dala' ra sa. Nahine aka' a Yohanis sarani atahori, mete ma doa' tao sala' ena.
26 Lao esa boe, ana ola' nda bambi-bambi sa mia atahori Yahudi ra ume hule-o'e na. Priskila no Akila o rena e boe. Ara hule-o'e basa ma, ro'e rendi e nisi' sira ume na. Ara rafad'e e, Lamatua' Yesus Dala Masod'a Na losa lutu'-lelo'.
27 Basa naa ma, Apolos na'etu' fo nisi' nusa Akaya. Atahori mamahere' sia Efesus ra rala' esa ro hihii na. Ara tao susura esa fee toronoo nara sia Akaya, fo ro'e se simbo Apolos no malole. Apolos to'u nala susura ma, ana lao. Losa Akaya ana teb'e-teb'e tulu-fali atahori mamahere' sia naa ra.
28 Ana o naselu-bale no atahori Yahudi sia atahori hetar mata nara, te nda rasenggi' e sa. Ana ola' nendi' Lamatualain Susura Meumare Na fo nanori se nae, “Atahori fo Lamatualain helu nae haitua' a, fo hita tahani' a, naeni, Yesus!”
