< Ded'enu' ra Dud'uin 10 >
1 Lele' naa, hambu sold'ad'u Roma esa, naran Kornelis. Ana leo mia kota Kaisarea. Kornelis ia, dad'i malangga mia sold'ad'u natun esa. Ara mia dod'oo', mia Italia rema.
2 Kornelis no basa ume isi nara rala nara hii-nau neu Lamatualain. Te atahori Roma hetar nda ona' naa sa. Kornelis tulu-fali atahori hata-taa', ma ana hii hule-o'e neu Lamatualain.
3 Fai' sa, mbei ma lii' telu bob'o na, ona' a nalamein. Ana nita relo-relo Lamatualain ate Na esa mia sorga no'e nae, “Kornelis!”
4 Kornelis nita e, de namatau seli. Ana natane nae, “Ta'o bee, malangga?” Ate naa nataa nae, “Lamatualain rena hule-o'e ma, ma nasaned'a rala malole ma neu atahori hata-taa' ra. Ana o mete-se'u nggo boe.
5 De ia naa, denu atahori esa kota Yope neu fo no'e nendi atahori esa, naran Simon Petrus.
6 Ana numban sia ume esa sia tasi suu na, no tukan nameu banda rou' sa, naran Simon.”
7 Lamatualain ate Na mia sorga ola' basa ma, ana lao hela Kornelis. De Kornelis no'e mana tao-ues nara rua no sold'ad'u na esa. Sold'ad'u naa, rala na o hii-nau neu Lamatualain boe.
8 Kornelis dui basa naa ra, ma denu se risi' kota Yope.
9 Mbila reorendu na ma, Kornelis dedenu nara rae deka Yope ena. Lele' naa, Petrus neu hule-o'e mia Simon ume nambeleon ata'.
10 Ana hule-o'e te named'a ndoe. Ana nahati atahori ra tao nanaat mei ata neu. Lele' ana hule-o'e ma, Lamatualain natud'u e ona' ana nalamein.
11 Ona' lalai a sii, ma teme loa-naru' sa sou, doko-doko sia buku ka haa' ra. Teme loa-naru' naa, loe nema.
12 Sia teme' naa, nita banda mata'-mata'. Hambu banda ei haa', banda mana nod'o', ma mbui' mata'-mata'.
13 Ana rena hara' esa denu e nae, “Petrus! Fela leo! Hala banda ra fo mua!”
14 Te Petrus nataa nae, “Nda bisa sa Lamatua'! Afi' ta'o naa! Au nda fe'e ua ita banda mata' naa ra sa! Hai atahori Yahudi ra miluli banda naa ra!”
15 Te hara-lii' naa ola' bali' nae, “Mete ma Lamatualain nae saa meumare', naa afi' mae manggenggeo'!”
16 Teme' naa sou lao telu ma Petrus o rena hara-lii' lao telu boe, aiboi' ma teme' a neneboti' bali' lalai ata neu.
17 Petrus fe'e dud'u'a neu-nema nae nahine meit naa sosoa na, te Kornelis ana dedenu nara losa Simon ume na ena. Ara rii-rii sia lelesu mata' ena.
18 Ara ro'e tenu ume' a de ratane rae, “Hai sangga fui' esa numban sia ume ia. Naran Simon Petrus. Ama' nahine e, do?”
19 Petrus fe'e dud'u'a saa fo nita' naa sosoan ma, Lamatualain Dula-dale Meumare Na nafad'e e nae, “We, Petrus. Atahori sia rae', rema sangga nggo.
20 Onda fo tungga se leo. Afi' mumutau. Mae sira nda atahori Yahudi sa, ho afi' melu-mudu se mae atahori manggenggeo', tungga atahori Yahudi ra adat na. Te Au, mana denu se rema ha'i nggo.”
21 Basa ma, Petrus onda de neu nandaa no se. Natane nae, “Au ia, fo hei sangga' a. Hei parlu sa?”
22 Ara rataa rae, “Malangga sold'ad'u Roma esa denu hai ima. Ana malangga mia sold'ad'u natun esa. Rala na ndos, ma hii-nau neu Lamatualain. Atahori Yahudi nae' bub'ulu' malole na ena. Fe'e afis sa, Lamatualain ate Na mia sorga denu hai malangga ma no'e ama' muu sia ume na. Ana nae rena mia ama'.”
23 Petrus rena nala ma, no'e se sunggu' tetemba' naa sia naa. Fetu na ma, ara fela de Petrus lao no se. Lamatua' Yesus atahori Na hira sia Yope, o reu ramalolo' ro se boe.
24 Tetemba' naa ara sunggu' sia dala'. Mbila' neu dei de ara losa Kaisarea. Ara losa Kornelis ume na, te ana nahati se ena. Ana na'ab'ub'ue nala bob'onggi nara ma nonoo nara sia naa.
25 Petrus nae ume rala neu ma, Kornelis nela' neu, sende' lululangga na, fo be'utee neu e.
26 Te Petrus nafefela e nae, “A'a! Rii-rii leo. Afi' be'utee neu au. Te au ia, atahori ona' a'a boe.”
27 Kornelis rena ta'o naa ma, ana nambarii'. Boe ma ru'a se ola-ola' fo rae ume rala reu. Petrus mete neu ma, nita atahori hetar ra'ab'ub'ue sia naa, rahani e.
28 Ana mete ndule se, ma ola' nae, “Toronoo nggare. Hei bub'ulu' hai atahori Yahudi ra adat ma. Hai nda mi'ib'ue mo atahori fea' ra sa. Saa fai, maso' ume nara rala. Te Lamatualain natud'u au nae, mete ma Eni ola' nae saa meumare', au afi' ae naa manggenggeo'. De ia naa, au nda melumud'u atahori fea' ra sa ena. Au musi tao se ona' bob'onggi nggara.
29 Naa de, hei mo'e ma, au uma neu' ena. Au nda nemba-nemba sa, huu Lamatualain nafad'e basa au ena. Te hei mifad'e sob'a dei! Hei parlu saa mia au?”
30 Kornelis dui basa-b'asa' e nae, “Fai haa mana lao' naa, bob'o na, au hule o'e mia ume ngga. Aiboi' ma, tou' esa ririi mia mata ngga. Bua na makahahado'.
31 Ana no'e au nae, ‘Kornelis! Lamatualain rena basa hule-o'e ma ena, ma nasaned'a rala malole ma neu atahori hata-taa' ra.
32 De ia naa, denu atahori risi' kota Yope fo ro'e atahori sa, naran, Simon Petrus. Ana numban ume esa sia tasi suu na, sia tukan nameu banda rou' esa, nara na Simon boe.’
33 Naa de, au denu atahori reu ro'e ama'. Hai mo'e makasi, huu ama' nema. De ia naa, hai mi'ib'ue, mae rena saa fo Lamatualain denu ama' nafad'e hai.”
34 Basa ma Petrus ola' nae, “Ia naa, au fe'e bub'ulu' Lamatualain mete-se'u basa atahori ona esa'. Nda pili-tad'a nae atahori Yahudi, do atahori nda Yahudi sa.
35 Mete ma atahori mia leo bee-b'ee o rala na ndos, ma ana hii hule-o'e neu Lamatualain, ma tungga Lamatualain hiihii-nanau Na, atahori naa tao namaho'o Lamatualain rala Na.
36 Hei bub'ulu' saa fo Lamatualain nafad'e neu hai atahori Isra'el ra, nae Eni haitua Atahori fo Eni dud'u basa eni' a ma'ahulu na, naeni Yesus. Yesus naa, mate fo nadame' atahori no Lamatualain. Ma Ana dad'i Malangga neu basa atahori ra.
37 Hei o rena saa mana dad'i' sia nusa Yudea. Dud'uit na eni' a Yohanis nafad'e atahori ra nae, ara musi raloe' mia sala' nara. Boe ma ara musi sarani, fo dad'i bukti sira dame ro Lamatualain ena.
38 Lamatualain fee Dula-dale Meumare Na neu Yesus, atahori Nasaret naa. Ana o fee koasa Na neu E boe. De Yesus neu sia kambo-kambo', fo tao dala malole' fee atahori ra. Ana o tulu-fali atahori fo nitu ra malangga na tao na'asususa' ra. Ana tao ta'o naa, huu Lamatualain no E nakandoo' a.
39 Hai ia ra, mita mo mata mara, saa fo ana tao mia Yerusalem, ma ndule atahori Yahudi ra nusa na. Te ona' naa o, atahori ra fe'e mbaku risa E mia hau nggangge' losa mate.
40 Ana mate teb'e-teb'e', te finiesan ma, Lamatualain fee Ne nasod'a bali'. Ana natud'u Ao na fo atahori rahine rae Ana nasod'a bali' ena.
41 Te nda basa atahori rita E sa, aka' a hai. Ana nasod'a bali' ma, hai mia-minu mo E. Ma Lamatualain o dud'u hai fo mifad'e Yesus Dud'ui Malole Na neu basa atahori sia bee-b'ee.
42 Lamatualain denu hai mi mifad'e relo-relo so'al Atahori fo Ana dud'u eni' a ma'ahulu na, naeni Yesus. Lamatualain o so'u E dad'i mana ma'etu' ded'eat fo na'etu' seka nasod'a nakandoo no Lamatualain, ma seka hoko'. Ana o na'etu' atahori mates ma atahori masod'a' ra ded'eat nara boe.
43 Mia dalahulu na neu, Lamatualain mana ola-ola Nara dud'u Yesus ia, rae sud'i' a se namahere neu E, dei fo Lamatualain simbo se, ma fee ambon neu sala nara.”
44 Petrus fe'e ola' na'o naa, aiboi' ma Lamatualain Dula-dale Meumare Na maso' basa atahori mana rena' ra.
45 Petrus nonoo Yahudi nara mana rema ro e mia Yope, ara o risi' Kornelis ume na sia kota Kaisarea. Ara rita atahori hetar simbo Lamatualain Dula-dale Na ma, ara titindindi, huu fe'e rita Lamatualain fee Dula-dale Na neu atahori nda Yahudi sa.
46 Ara rena atahori mia Kornelis ume na ola' ded'eat mata'-mata' ma koa-kio Lamatualain. Basa ma Petrus ola' no nonoo nara nae,
47 “Hei mete neu' ena! Atahori ia ra simbo Lamatualain Dula-dale Na ona' hita boe. De ia naa, ata sarani se leo. Te esa nda ai sa' boe.”
48 De Petrus denu nonoo nara fo sarani Kornelis no atahori naa ra, fo ara maso' dad'i Lamatua' Yesus atahori Nara. Basa ma, ara ro'e Petrus leo no sira fai hira fai, dei de fe'e fee ne bali' Yerusalem neu.
