3 Yohanis 1

1 Toronoo Gayus fo au sue teb'e-teb'e' a. Sod'a-mole' mia au, Yohanis, mana malalao nggarei'.

2 Au o'e fo Lamatua' nanea nggo, naa fo aom afi' hambu hed'is, ma ralam malole' boe.

3 Hambu toronoo' ruma, rema dui au oi, ho tungga mukundoo Lamatualain dala masod'a ndoo-tetun. Rena ala ta'o naa ma, rala ngga namaho'o nala seli.

4 Huu Au umuho'o ala seli mete ma rena oi, ana nggara rasod'a tungga dala ndoo-tetu' a ena.

5 Toronoo susue' e! Mulalao Lamatualain ue-tataon no malole' ena, lele' simbo malolole toronoo mara mana lao' rereo' ralalao Kristus ue-tataon. Mae nda fe'e muhine se sa o, simbo se no malole.

6 Atahori mana bali' rema, dui neu atahori sarani' ra sia ia oi, simbo mala toronoo' naa ra no malole' ma sue se. Lele' ia au o'e fo tulu-fali mukundoo toronoo' naa ra, te naa tao Lamatualain ralan namaho'o.

7 Ara lao' rereo' mamana' rakandoo' a fo ranori atahori so'al Yesus Kristus. Te ara nda simbo tutulu-fafali' saa sa boe mia atahori nda mamahere' ra sa.

8 De mema' nandaa ena, mete ma hita tulu-fali se. Huu no ta'o naa, hita talalao Lamatua' ue-tataon ta'ab'ue to se.

9 Fe'esa'an, au haitua susura fee atahori sarani' sia mamanam ena, te Diotrefes so'u aon ona' moko-monaen e. Ma nda nau rena au sa.

10 De mete ma au uu sia naa, dei fo au ufad'e relo-relo so'al saa fo ana tao' ra. Huu ana ola peko-leleko', fo nae na'atutud'a' nggita. Lelenan fai, ana oi hendi Lamatua' atahorin mana reu sia naa. Boe ma ana aka' dunggu-mbau toronoo' mana sia naa ra, fo afi' simbo atahori naa ra. Ma mana nau simbo' ra na, ana tola hendi se.

11 Toronoo susue' e! Musi tao tungga atahori mana tao dala malole' ra. Afi' tungga atahori mana tao dala de'ulaka'. Te atahori mana tao dala malole', sira Lamatualain atahorin. Te atahori mana tao de'ulaka', nda rahine Lamatualain sa.

12 Conto mana tao malole' naeni Demetrius. Basa atahori koa-bo'u e, huu ana tao tungga Lamatualain dala masod'a ndoo-tetun. Hai o koa e boe, ma ho bub'ulu' hai nda mana leleko' sa.

13 Au fe'e ae ola' o nggo dala' hetar, te nda nau sura' neu susura sa.

14 Huu au hule-hule' fo nda doo' sa na ata tandaa, fo ru'a nggita ola-ola' neu' ena. Ba'u a na, dei. Toronoo' mana sia ia ra haitua hara sod'a-mole'. Tulun mendi au hara sod'a-mole ngga fee neu toronoo' mana sia naa ra, esa-esa' no naran. Sod'a-mole, Yohanis