< 1 Timotius 4 >
1 Lamatua' D'ula-d'alen nafad'e relo-relo ena nae, dei fo atahori sarani' ruma nggari hendi saa fo hita tamahere' a. De reu tungga nitur nenori tipu-lakan mana natud'a' atahori.
2 Atahori mana nema nanori ta'o naa, ola' laen, te tao laen. Mema' sira atahori mana peko-leleko'! Atahori naa ra rala dud'u'a nara mema' ma'ateme' ena.
3 Ara ranori atahori fo afi' sao. Ara o raluli nanaat mata'-mata' boe! Te matetun, nanaa-nininu' naa ra Lamatualain mana tao. Ana tao nanaat nara, fo mete ma atahori mamahere' ra raa, na, ro'e makasi neu E. Huu rahine nenori ndoon!
4 Basa saa fo Lamatualain tao' naa, mema' malole'. Dad'i afi' neluli mata'-mata'! Atahori musi simbo basa naa, no ro'e makasi neu Lamatualain.
5 Te hita bub'ulu' tae, Lamatualain Ded'ea o'olan, ma hita hule-o'en, tao basa naa ra dad'i meumare'.
6 Tius! Fee nesened'a' basa dala' ia ra reu toronoo mamahere' ra. Mete ma tao ta'o naa, ho dad'i Yesus Kristus atahori mana tao-ues malolen. Lamatualain Ded'ea-o'ola nara tao nggo mumuhere neu E, ma fee nggo muhine nenori' bee ndaa. Ho to'u muhere' Lamatualain Ded'ea-o'olan ena! Naa, ona' a nanaat mana tao ma'adere ao ma.
7 Afi' nggari fai no dud'ui ombo-koson nda mato'u' no Lamatualain sa. Afi' tao-afi' neu ina lasi' ra dud'ui neluli' mata'-mata' nara. Malole lena' munea aom fo m usod'a tungga Lamatualain hihiin.
8 Munea ao ma fo ma'adere', naa malole'. Te nggunan mbei' a. Munea ao ma fo musod'a tungga Lamatua' hihiin sia basa dala' ra, nggunan nae'. Naa nggunan nda soa' neu' a masod'a' sia raefafo' ia sa, te sia masod'a mana nema' a boe.
9 Ded'ea-o'ola' ia ra teb'e! De mbed'a' sia ralam fo afi' lilii'.
10 Hita tamahena neu Lamatualain masod'a' a. Eni, mana fee masod'a' neu basa atahori, lelenan soa' neu hita mana tamahere neu E. Naeni de hita ue-tao tahere takandondo'a.
11 Munori basa ia ra. Ma denu atahori fo tungga nenori ia ra.
12 Afi' fee atahori raloe nggo, huu ho fe'e soru'. Musi mutud'u dala malole' soa' neu atahori mamahere' ra, mia o'olam, tatao-nono'im, susue-lalaim neu atahori, nemeherem neu Yesus Kristus, ma masod'a meumarem.
13 Lele' hei mihani au u'uma ngga, afi' lilii baca Lamatualain ded'ea-o'olan fee atahori mamahere' ra. Tao manggatetee rala nara, ma nenori malolole se.
14 Pake malolole papala-bab'anggi' fo ho simbo mia Lamatualain, lele' malangga mananuni jama'at ra hule-o'e ma lalaa lima nara neu nggo. Lele' naa, ara rafad'e Lamatualain hehelu-fufulin so'al masod'am no ue-tataom. Dad'i afi' mbed'a' hela papala-bab'anggi' fo hambu' naa.
15 Mulalao dala' naa ra no nggate-nggate! Fo basa atahori rita rae, masod'am no ue-tataom lao'.
16 Munea fo musod'a ndos mukundoo' a. Ma munea fo munori' a matetu'. Mete ma mu'utataa' mo basa naa, naa Lamatualain soi dala' fee nggo mo atahori mana rena nggo, fo hei nenembo'it mia basa dala de'ulaka' ra.
