< 1 Tesalonika 3 >
1 Sad'i hei bub'ulu', lele' hai lao hela nggi a, nda tungga hai hihii ma sa. Hai mae' a ima mita hei, te nda bisa sa. D'od'oo ma hai nda mi'itataa' sa ena, naa de hai mi'etu' fee Timotius neti. Te au o Silas mihati sia Atena. Timotius naa hai toronoo ma. Eni hai nonoom mana no hai milalao Yesus Karistus Dud'ui Malolen. Hai denu e neti nanori ma tao manggatetee rala mara, naa fo hei boe mimihere mihere' neu Lamatulain.
2
3 No ta'o naa, mete ma hambu sususa', hei nda minggongga' sa. To'u mihere' hei nemeherem. Huu hei bub'ulu', atahori mana ramahere neu Karistus ra, dei fo hambu sususa' ta'o naa.
4 Fe'esa'an, lele' hai fe'e mi'ib'ue mo nggi, hai fee nesenened'a' mae, atahori mana ramahere neu Lamatua' Yesus dei fo hambu sususa' mata'-mata'. Ia naa basa e dad'i ta'o naa ena, to!
5 Huu au susa ae mate o hei tetende-nemberii mara, de au denu Timotius Tesalonika neti, naa fo hai bub'ulu', hei fe'e mimihere mikindoo neu Lamatua', do hoko'. Te au umutau, afi' losa nitu ra malangga monaen nema sob'a-d'ou nggi, fo misid'ea Lamatua'. Mete ma dad'i ta'o naa, na hai ue-taom ma'ahulum naa, parsuma' a.
6 Ia naa Timotius bali' mia Tesalonika, ma nendi hara nemeho'o' fee hai. Ana dui nae, hei mimihere mikindoo neu Kristus, ma hei o esa sue esa mikindoo' a. Ana o nafad'e nae, hei misined'a hai mikindoo' a de mae mindaa mo hai ona' a hai o mae mindaa mo hei boe.
7 Toronoo nggare! Mae hai sia ia mimed'a beran seli huu sususa' ia-naa nda mbei-mbei' a sa, te Timotius dud'uin tao hai mimiho'o teb'e-teb'e'. Huu ia na hai bub'ulu' ena mae, hei mimihere mihere' neu Lamatua'.
8
9 Dad'i hai mo'e makasi nae-nae neu Lamatualain no rala nemeho'ot ona' ia, huu hei tungga mikindoo E.
10 Hatu'-rerelon hai hule-o'e mikindoo' a, fo, ona bee na hita fe'e bisa tandaa selu' fai. Hai mae minori fo hei bub'ulu' basa dala' soa' neu Lamatualain dala masod'an.
11 Hai mimihena Lamatualain, hita Aman, no Yesus Kristus hita malanggan, soi dala' fo hai meti mindaa mo nggi fai.
12 Hai mo'e Lamatua' fo fee hei esa sue-lai esa nae' lena' fai. Ma hei o sue-lai basa atahori, ona' hai o sue hei ta'o naa boe.
13 No ta'o naa, Lamatua' tao manggatee rala mara, fo misod'a ndos no meumare', losa Lamatua' Yesus heo' bali' nema no atahori Nara, na, hei hambu mimbirii' sia hita Aman Lamatualain matan, nda lemba sala' saa sa boe.
