1 Yohanis 2

1 Ana susue ngga re! Au sura' fo ufad'e basa ia ra, naa fo ama misod'a sud'i boe tao sala' fai. Te mete ma hambu mana tao sala', dei fo hambu mana masala'e hita sia Ama' Lamatualain matan. Eni, Yesus Kristus, Atahori Meumare' fo Lamatualain haitua nema sia raefafo' ia.

2 Ana mate dad'i tutunu-hohotu' fee neu nggita, fo Lamatualain fee ambon neu sala-kilu tara. Nda fee neu aka' a hita sa, te fee neu basa atahori sia raefafo' ia.

3 Hita bub'ulu' tae, hita tahine Lamatua' no malole, mete ma hita tungga Eni parenda nara.

4 Atahori bisa ola' rae, “Au uhine Lamatualain.” Te mete ma eni nda tao tungga Lamatua' parendan sa, na, eni mana peko-leleko' mana ola' laen te tao laen.

5 Te atahori mana tao tungga Lamatua parendan, naa dad'i bukti oi, eni sue teb'e-teb'e' Lamatua' ena. No ta'o naa, hita bub'ulu' tae, hita ia ra, Lamatua' atahorin.

6 Dad'i mete ma atahori sa ola' nae, “Au usod'a u'ub'ue o Lamatualain,” na, eni masod'an musi ona' Yesus Kristus.

7 Ana susue ngga re! Parenda' fo au sura' ia, nda dala feu' soa' neu nggi sa. Huu parenda' ia mema' sia Lamatua' Hara-liin fo hei rena mia lele ulu' a.

8 Mae ta'o naa o, te hambu dala feu' fo au ae sura' so'al Lamatua' parendan ia. Parenda' ia lao' no matetu' sia Yesus masod'an ena. Ma parenda' ia lao' sia hei ena, huu hatu' mana sia rala mara mopo hendi ena, ma manggarelo matetu' a naronda sia masod'a mara ena.

9 Atahori sa bisa ola' nae, “Au usod'a sia manggarelo' a.” Te mete ma eni mburu-oe' no toronoon, na, naa dad'i tanda oi, eni fe'e nasod'a sia ma'ahatu' a.

10 Huu atahori mana nasod'a sia manggarelo' a, ana musi sue toronoo nara, ma nda hambu de'ulaka saa sa boe sia ralan fo na'atutud'a' e.

11 Naa de, mete ma hambu atahori mburu-oe' no toronoon, naa dad'i tanda oi, eni nasod'a sia ma'ahatu' a. Eni lao' hama-hama, huu ma'ahatu' a tao matan poke ena.

12 Ana ngga re! Au sura' susura ia fee neu nggi, huu Kristus mate soa' neu nggi ena, ma Lamatualain fee ambon neu sala-kilu mara ena.

13 Ina-ama lasi' re! Au sura' susura ia fee neu nggi, huu hei mihine Yesus Kristus, mana sia eni' a lele ulu' a. Ana feto-monetena' re! Au sura' susura ia fee neu nggi, huu hei mitati lab'an de'ulaka manaseli' a, losa hei misenggi' e.

14 Ana ngga re! Au sura' susura ia fee neu nggi, huu hei mihine Ama' Lamatualain. Ina-ama lasi' re! Au sura' susura ia fee neu nggi, huu hei mihine Yesus Kristus, mana sia eni' a lele' ulu' a. Ana feto-monetena' re! Au sura' susura ia fee neu nggi, huu hei mbeda' Lamatua' Hara-liin sia rala mara ena, losa hei dad'i ma'ad'ere', ma mitati lab'an de'ulaka manaseli' a, losa misenggi' e.

15 Hei afi' sue raefafo' hihii-nanaun, ma raefafo' sud'i' a saa nara. Te atahori mana sue raefafo' a, nda bisa sue Ama' Lamatualain sa.

16 Saa mana sia raefafo' ia nda na'ena huu-pata' no Lamatualain sa. Conto ona', atahori mana nasod'a tao namaho'o' a aon; atahori mana bare-na'o; ma atahori mana koao' huu hata-heton. Dala' naa ra nda ra'oka sia Ama' Lamatualain sa. Te ra'oka sia' a raefafo' a.

17 Tao-tao te, dei fo raefafo' ia mopo hendi e, bela' no basa dala' fo atahori hii' a sangga' ra. Te atahori mana hii' a tao tungga Lamatualain hihii-nanaun, ana nda mopo sa, te dei fo nasod'a nakandoo. (aiōn g165)

18 Ana ngga re! Fai-fai matete'en deka-deka ena. Hei rena ena oi, atahori mana lab'an Kristus dei fo sou nema. Tao-tao te ara sia mema' ena. Te hambu mana lab'an Kristus sia bee-b'ee ena. Naa dad'i tanda oi, fai-fai matete'en deka-deka ena.

19 Mana lab'an ra lao' mia hita talad'an. Tao-tao te, sira nda hita atahori nara sa. Te mete ma sira teb'e-teb'e' hita atahori nara, naa, tantu ara nda lao hela nggita sa. Te ra'atataa' rakandoo ro nggita. Te ara fela lao ena. Dad'i naa manggarelo' ena, Sira, nda hita atahori nara sa, to?

20 Te hei nda ona' se sa. Huu hei simbo mala Lamatua' Atahori Meumaren Dula-dalen ena. Ma Ana o tulu-fali nala nggi ena, fo basa nggi mihine dala ndoo-tetu' a.

21 Se'u te hei mae au sura' susura ia, huu au ae ne'o hei nda mihine dala ndoo-tetu' a sa, do? Hoko'! Huu hei mihine ena, na! Hei mihine bee ndoo-tetu' a, ma bee pepeko-leleko'.

22 Tao-tao te, hambu mana laka-hese' ra lao-lao' sia raefafo' ia. Ta'o bee fo bisa tahine se? Sira, naeni atahori mana ola' rae, Yesus naa, nda Kristus sa. Tungga sira, Yesus nda atahori Meumare' fo Lamatua' helu mema' fo nae haitua nema' a. Atahori mana ola' ra'o naa, lab'an Kristus, huu ara nda simbo Ama' Lamatualain no Anan sa.

23 Atahori nda mana simbo Lamatualain Anan sa, na, ara o nda simbo Eni Aman sa boe. Te mete ma atahori rataa Lamatualain Anan, na, ara o dad'i Lamatualain ana nara ena boe.

24 Dad'i hei musi to'u mikindoo saa fo rena mia lele ulu' a. No ta'o naa, hei nenepa'a' mikindoo mo Ama' Lamatualain no Anan.

25 Ana o helu-fuli no nggita nae, dei fo hita tasod'a takandoo to E. (aiōnios g166)

26 Au sura' susura ia fo mihine so'al atahori rae e'edik nggi.

27 Hei simbo Lamatua' Dula-dale Meumaren ena, ma hei o misod'a mi'ib'ue mo E ena. Dad'i hei nda parlu atahori laen ranori nggi sa ena. Huu Lamatua' Dula-dalen dai ena, huu Ana bisa nanori basa dala ndoo-tetu' ra. Ana nda peko-leleko', ona' mana e'edik naa ra sa. Dad'i to'u mihere' neu saa fo Ana nanori' a ena, fo hei misod'a rala' esa mikindoo mo Kristus.

28 Ta'o ia, ana ngga re! Hei musi misod'a mi'ib'ue mikindoo mo Kristus. Naa fo Ana bali' nema, na, hei nda mimitau ma mae-mae' mimbiri' sia matan sa.

29 Huu hei bub'ulu' mae, Ana soa tao' a ndoo-tetu' ra, naeni de hei o bisa bub'ulu' mae, basa atahori mana tao tungga ndoo-tetu' ra, ara o dad'i Lamatua' ana nara boe.