1 Korintus 6

1 Mete ma atahori sarani' esa naded'ea no atahori sarani' laen, ta'o bee de ama misi' mamana nggero-furi sia mana ma'etu' ded'eat nda mana nahine Lamatualain sa? Ta'o bee de ona' naa? Malole lena' mimbirii' mi atahori mamahere' ra mata nara, fo ara rauli hei ded'eam!

2 Dad'i' a ama nda bub'ulu' mae, atahori mamahere' ra dei fo ra'etu' ded'eat fee basa atahori sia raefafo' ia sa. Dad'i ta'o bee de, hei nda bisa miuli mala dala anadiki ana' ra sa?

3 Matetun, dei fo hita mana ta'etu ded'eat fee Lamatualain ate nara mia sorga. De tantu hei musi miuli ded'eat tungga-tungga fai.

4 Lelenan fai, mete ma hei atahori mamahere' hambu mid'ed'ea so'al anadiki ana' ra, ona bee de hei pake mana ma'etu' ded'eat fo atahori sarani' nda fee had'a-hormat neu sa?

5 Naa, au ae ola' dala' esa fo musi tao nggi mae. Ta'o bee? Ona' sia talad'a mara, nda hambu atahori mahine' esa sa boe fo nauli dala anadiki ana' ia ra, ona' ded'eat mana sou sia toronoo tara.

6 Te atahori mamahere' esa lea nendi toronoo na atahori mamahere' nisi' mana ma'etu' ded'eat matan! Tao-tao te mana ma'etu' ded'eat naa nda atahori mana namahere Lamatualain sa!

7 Nda matetu' sa, to? Hei kala ena to, mete ma hei esa mendi esa misi' mamana nggero-furi' a. Malole lena', hela toronoo ma, mete ma ana tao sala' mbali nggo. Boe ma mete ma toronoo ma atahori mamahere' namana'o nala saa ma, malole lena' hela e ha'i nala fo ana soa e leo!

8 Te hei atahori mamahere' esa tao sala' mbali toronoon. Ma esa namana'o nala mia esa. Tao-tao te basa hei atahori mamahere' ra!

9 Hei ona' nda mihine dala' ia ra sa! Tao-tao te, atahori nda mana hii tao ndoo-tetu' a sa, tantu nda bisa dad'i Lamatualain bob'onggin sa. Afi' minggolo' ao mara fo nenepepeko-leleko', fo tao sala'! Atahori mana tao leli ro atahori fo nda sao nara sa, mana songgo, mana hohongge', tou' sunggu' no tou',

10 atahori na'o ra, mana bare' ra, mana ninu mafu' ra, mana na'amuti atahori naran, mana pepeko-leleko' fo ha'i atahori sud'i' a saa nara, huu basa atahori mata' naa ra nda bisa maso' dad'i Lamatualain atahorin sa!

11 Tao-tao te, lele ulu' a hei ruma mema' ona' naa boe! Te Lamatualain ose hendi sala-kilu mara de nameu nggi ena. Boe ma Ana soi dala' de malolole bali' mo Eni ena. Ana tao basa naa ra, huu ama nenepa'a' mo hita Lamatuan Yesus Kristus ena, ma hei o nenepa'a' mo Lamatualain Dula-dalen ena.

12 Au u'ena hak fo tao basa-b'asa' e. Te basa saa fo au ae tao' ra, ne'o nda fe'e malole' soa' neu au sa. Boe ma, mae au u'ena hak tao basa-b'asa' e, te au nda nau fo dala nda malole' ra rauli ma koasa rala au sa.

13 Conto ona', atahori ra rae, “Nanaat parlu tei' a, ma tei' a parlu nanaat.” Ma misined'a, te dei fo Lamatualain tao nalutu ru'a se. Conto laen fai, ata afi' pake ao tara, fo bisa tao leli to atahori nda hita saon sa. Te ata pake ao tara fo bisa tao ues fee hita Lamatuan. Ma hita aon naa, Lamatua' enan.

14 Lele' hita Lamatuan Yesus mate, Lamatualain mana tao E nasod'a bali'. Dad'i dei fo lele' hita mate, Ana o na'ena koasa fo tao nasod'a bali' nggita boe.

15 Hei aom dad'i Kristus enan, ona' hei dad'i mia Kristus aon seri boe. Ne'o hei bub'ulu' dala' naa ena! De mete ma au pake Kristus aon seri, fo uu u'ub'ue o ina mana hohongge' ra aon, na naa ta'o bee? Afi'! Huu naa nda nandaa sa!

16 Ne'o ama bub'ulu' ena, mete ma atahori tao leli fo sunggu' ra'ab'ue ro ina mana hohongge' ona' naa ra, sira ru'a se nenepa'a dad'i reu esa ena. Huu nenesura' sia Susura Meumare' a oi, “Ru'a se nenepa'a' dad'i esa ena.”

17 Te atahori fo masod'an rala' esa no hita Lamatuan, dad'i esa no E, ona' ru'a se nenepa'a' ro dula-dale' esa.

18 Mete ma hambu kaka'e' fo tao leli mo atahori nda saom sa, na, mela mu'udod'oo'! Atahori tao sala' mata'-mata' na, ralutu ao nara, ma ralutu atahori laen boe. Te atahori mana aka' hohongge naa, tao nalutu aon.

19 Aom naa ona' Lamatualain Dula-dale Meumaren ume hule-o'en. Dula-dalen nasod'a sia rala mara, huu Lamatualain mesa' ne mana fee nggi Dula-dalen. Naeni de hei nda mi'ena hak neu ao mara sa ena, fo dad'i malangga neu ao mara. Te ta'o bee de hei misod'a ona' nda mihine dala' ia ra sa?

20 Kristus tefa-soi nala nggi nendi' felin seli. De hei musi misod'a fee had'a-hormat neu aom mara, fo mitud'u mae, hei o fee had'a-hormat mbali Lamatualain boe.