1 Korintus 2

1 Toronoo susue nggara, e! Dalahulun, lele' au uma sia nggi, au ola' ma ufad'e neu nggi Lamatualain rasian fo dalahulun atahori nda rahine' a sa. Te au nda ola' koaot endi ded'ea-o'ola' naa ra sa. Ma au o nda ola' endi' ded'ea mad'iku' fo utud'u mahine ngga sa.

2 Lele' au fe'e u'ub'ue o nggi, au dud'u'a ngga ta'o ia: au ae utud'u' a dala' esa, naeni Yesus Kristus. Eni, Atahori fo Lamatualain helu mema' eni' a lele ulu' a nae haitua nema. Te lele' Yesus nema, atahori mbaku risa E sia hau nggangge' ata. Huu aka' dala' naa, fo au uhine no matetu'.

3 Fai' naa, lele' au u'ub'ue o nggi, au med'a nda talalu bisa sa, au o umutau ma ao ngga foti ngge'e-ngge'e.

4 Au o'ola ngga, ma helu-fuli ngga, nda mad'iku' sa. Huu au nda ola' endi' ded'ea lena'-lena' fo kokoe nggi sa. Hoko'! Te lele' au ola' naa, matetu' ena oi, Lamatualain Dula-dale Meumaren nauli au, no koasan sia au boe.

5 Te au du'a, nda malole' sa mete ma mimihere neu Lamatualain, huu hei rena' a atahori ded'ea-o'ola mahinen. Malole lena' ama mimihere neu Lamatualain, huu natud'u koasan neu nggi.

6 Tao-tao te, lele' hai ola-ola' mo atahori fo nemeheren temeao ena, hai minori mendi' ded'ea-o'ola' mana maso' dud'u'at. Te nda maso dud'u'at tungga raefafo' ia dud'u'at na sa, do tungga saa fo ale' ia atahori mana to'u parenda' ra hii' a ranori. Huu dei fo mopo hendi' se. (aiōn g165)

7 Te hai minori a dala-dala mahine' fo Lamatualain na'onda' nema' a. Huu dalahulun, lele' raefafo' nda fe'e dad'i sa, Lamatualain na'afuni' dala' naa ra. Lele' ia, Ana na'etu' nae natud'u rasia naa neu nggita ena, naa fo hita o hambu bab'anggi' sia Lamatualain nara manaselin. (aiōn g165)

8 Te atahori mana to'u parenda' lele' ia, ara nda rahine no matetu' Lamatualain mahinen sa. Huu mete ma ara rahine, na, tantu ara nda mbaku risa hita Lamatuan manaseli' naa sia hau nggangge' a sa. (aiōn g165)

9 Sia Susura Meumare' a nenesura' so'al Lamatualain rasian fo lele ulu' a mana nenefuni' oi, “Hambu dala' fo atahori nda fe'e parna rita no matan sa, ma hambu dala' fo atahori nda fe'e rena rita no ndikin sa, fo atahori nda bisa dud'u'a rala sa. Tao-tao te, Lamatualain mana sad'ia mema' basa dala' naa ra ena, fee atahori mana sue Eni.”

10 Mema' dalahulun atahori nda rahine dala' naa ra sa, te lele' ia Lamatualain nafad'e relo-relo dala' naa ra neu nggita nendi' Dula-dalen. Dad'i Lamatualain Dula-dalen nahine basa dala' ra. Huu Ana o paresa' losa lutu-lelo' Lamatualain ralan boe.

11 Hita o esa-esa' na'ena dula-dale' sia ralan. Naeni de hita atahori dud'u'a ma tao dala' nda ona esa' sa. Boe ma nda hambu atahori laen rahine losa hita ralan sa, aka' hita dula-dalen. Lamatualain o ona' naa boe. Nda hambu atahori esa sa' boe nahine Lamatualain ralan. Aka' Lamatualain Dula-dalen fo nahine teb'e.

12 Naa, hita simbo tala Lamatualain Dula-dalen ena, ma Eni mana nauli nggita. Naeni de hita nda tungga atahori sia raefafo' ia dud'u'a nara sa. Huu Lamatualain Dula-dalen sia rala tara ena, naa de hita bisa tahine basa dala malole' fo Ana tao fee nggita ena.

13 Dala' naa ra fo hita biasa ola-ola'. Huu hai mifad'e dala-dala' fo Lamatualain Dula-dalen nanori neu hai. Ma hai nda minori mendi' ded'ea-o'ola' tungga atahori dud'u'an sa. Te hai minori mendi' ded'ea-o'ola' mia Lamatualain Dula-dalen, fee atahori mana rahine Lamatua'.

14 Te mete ma hambu atahori nda nahine Lamatualain Dula-dalen sa, basa ma ana rena hai o'olam, ana nda nau simbo no malole' sa. Te ana du'a nae, “Saa naa? Nda maso' dud'u'at sa!” Tao-tao te, mae ta'o bee o, atahori naa nda bisa nahine dala' naa ra sa, huu nda nenepa'a' no Lamatualain Dula-dalen sa.

15 Atahori mana nasod'a nenepa'a' no Lamatualain Dula-dalen, mana bisa nahine basa dala' naa ra, boe ma bisa bub'ulu' bee ka ndoo-tetu'. Te atahori laen ra nda uku-uli rala atahori naa sa.

16 Nda bisa sa? Te nenesura' sia Susura Meumare' oi: “Seka bisa nahine Lamatualain dud'u'an? Do seka bisa nauli Lamatua', fo Ana tao tungga atahori naa nenorin? Nda hambu esa sa boe!” Tao-tao te, hita bisa tahine dala' naa ra, huu Kristus tulu-fali nggita fo dud'u'a tungga Eni dud'u'an.