< 1 Korintus 15 >

1 Toronoo susue nggara, e! Au nau nggi misined'a Lamatualain Hara-lii Malolen fo au ufad'e neu nggi eni' a dalahulun. Hei simbo mala ma mi'itataa' tungga mikindoo neu Hara-lii' naa. 2 Huu Hara-lii naa, mana fee masoi-masod'a' neu nggi, sad'i ama to'u mihere' mikindoo e. Te mete ma ama nda mimihere mikindoo neu Lamatualain sa, hei nemehere mara, parsuma' a. 3 Au o unori basa nggi dala-dala pantin seli, fo dalahulun atahori parna ranori neu au boe. Naeni: Kristus, fo Lamatualain haitua nema' a, mate de fee masoi-masod'a' neu nggita mia sala-kilu tara ena, nandaa teb'e ona' Lamatualain Susura Meumaren sura' eni' a lele ulu' a. 4 Boe ma ara ra'oi E. Basa de, fini esan ma, Lamatualain tao nasod'a bali' E, nandaa teb'e ona' Lamatualain Susura Meumaren sura' mema' eni' a lele ulu' a. 5 Basa ma, Kristus natud'u Aon neu Petrus. Ana o natud'u Aon neu ana mana tungga ka sana hulu rua nara boe. 6 Lao esa ma, Ana natud'u aon neu atahori mamahere' natun lima lena'. Basa se rita E! Mia sira e, hambu hetar fe'e masod'a' ra. Aka' ruma mate ena. 7 Basa ma, Ana natud'u aon neu a'a Yakobis boe. Boe ma natud'u aon neu basa ded'enu nara. 8 Naa! Au mana ita e u'ub'ui oe-oe'. Huu au ona' ana muri' nene bonggi' ne'eb'uit. 9 Lamatua' ded'enun laen ra, basa se pantin lena' au. Mete ma tungga matetun, au nda undandaa dad'i ded'enun sa. Huu fe'esa'an, au mana tao u'usususa' ma poko-paru Lamatua' atahori nara sia bee-b'ee. 10 Te Lamatualain natud'u rala malolen neu au. Boe ma Ana mana tao au dad'i ona' ia. Lele' Ana tao dala malole' soa' neu au, Ana nda ngganggari fai no hie-hie' a sa. Ma'ab'uin ma, au mana ue-tao lena' basa se! Tao-tao te au nda mana tao ues naa sa, te Lamatualain rala malolen mana ue-tao sia masod'a ngga. 11 Dad'i nda pantin sa au mana unori, do ded'enu' laen ra mana ranori sa. Huu basa hai minori dala' ona esa'. Hai dui-b'engga atahori so'al Lamatua' Hara-lii Malolen nekendoo' a. Huu naa, hei mimihere neu Hara-lii Malole' mana ona esa' naa. 12 Hai biasa minori mae, Kristus, fo Lamatualain haitua nema' naa, nasod'a bali' mia mamaten ena. Dad'i ta'o bee de hei ruma mae, “Atahori mana mate' ra, nda rasod'a bali' sa”? Netehuun saa? 13 Huu mete ma atahori mana mate' ra nda rasod'a bali' sa, eni sosoan nae, Kristus o nda nasod'a bali' sa boe! 14 Ma mete ma Kristus nda nasod'a bali' sa, basa-b'asa saa fo hai biasa minori neu atahori ra, nda na'ena ngguna sa. Ma nemehere mara neu E, parsuma' a! 15 Mete ma teb'e atahori mates ra nda rasod'a bali' sa, na, hai o dad'i mana sakasii ombo-koson so'al Lamatualain. Huu hai biasa minori mae, “Lamatualain mana tao nasod'a bali' Kristus!” Mema' hai dui-b'engga ta'o naa. Te mete ma atahori mana mate' ra nda rasod'a bali' sa, eni sosoan nae, Lamatualain nda parna tao nasod'a bali' Kristus sa. 16 17 Dud'u'a sob'a dala' ia dei: mete ma Kristus nda nasod'a bali' sa, hei nemehere mara neu Lamatualain parsuma' a! Huu hei fe'e lemba-doi sala-kilu mara! 18 Nda aka' naa sa, te basa atahori mana mate' ra, fo dalahulun nenepa'a' ro Kristus, mete ma Kristus nda parna nasod'a bali' sa, ara o mate ma saranggaa mia Lamatualain. 19 Hita tamahena neu Kristus tae, dei fo Ana nau tao malole' fee nggita. Te mete ma hita tamahena ta'o naa, aka' dad'i sia' a raefafo' ia, naa parsuma' a! Boe ma hita dad'i atahori mana kasian seli mia basa e! 20 Tao-tao te nda ta'o naa sa, to? Te matetun, naeni: Kristus, fo Lamatualain haitua nema' naa, nasod'a bali' mia mamaten! Te nda aka' mesa' ne sa, huu dei fo atahori mamahere mana mate' ra o, rasod'a bali' boe. Kristus ona boa ulu' e, mana natud'u oi, atahori mana mate' ra, dei fo rasod'a bali' tungga E. 21 Lele ulu' a, aka' atahori esa' a, naeni Adam, mana nalena-langga Lamatualain parendan. Naeni de eni huku-dokin mamates. Basa atahori simbo huku-doki' naa boe. Te lele' ia, hambu atahori esa fai, naeni Kristus, mana nasod'a tungga Lamatualain parendan. Dad'i, huu Eni malolen, atahori mana mate' ra bisa rasod'a bali'. 22 Basa atahori mana ralena-langga neu Lamatualain parendan, hambu huku-doki' mamates, ona' Adam boe. Ona' naa boe, basa atahori mana nenepa'a ro Kristus, dei fo Lamatualain tao nasod'a bali' se. 23 Te esa-esa' no eni fain. Kristus dad'i atahori ma'ahulu' mana nasod'a bali', ona' boa ulu' fa' ra. Ma lele' Ana bali' raefafo' ia nema, na dei fo atahori nara rasod'a bali' boe. 24 Dei fo raefafo' fe'e sambu-lalo ena na. Lele' naa, Kristus dad'i Mane' mana tao nalutu basa koasa, basa parenda', ma basa nenori mana musu no Lamatualain. Eni o dad'i Mane' mana fee bali' hak parendan neu Lamatualain, Eni Aman. 25 Huu Eni musi to'u parenda' nakandoo, losa Lamatualain tao nasenggi' basa mana lab'an Kristus, fo ara be'utee mbali E. 26 Hambu dala' esa fai mana namusu' no hita atahori. Naeni, hita musi mate. Te neu mate'en, Lamatualain nau nasenggi' mamates a koasan. Ana tao basa ta'o naa, ma nda hambu atahori mate sa ena. 27 Sia Lamatualain Susura Meumaren nenesura' oi, “Lamatualain tao basa mana kala' ra be'utee mbali Atahori fo Ana helu-fuli nae haitua nema' a.” Naa! Lele' nenesura' oi, “mana kala' ra basa se be'utee neu Eni Atahori na”, naa meu' ena oi, Lamatualain nda maso' sia naa sa. Huu Lamatualain mesa' ne mana so'u E dad'i Lamatua' soa' neu basa e. 28 Mete ma basa e rena teb'e-teb'e' neu Lamatualain Anan, na, Ana' naa o fee bali' basa' e neu Aman, mana so'u E dad'i basa e Lamatuan. Basa boe ma, Lamatualain to'u parenda' nakandoo sia basa dala' ra, soa' neu basa atahori. 29 Hambu atahori rae sarani fo ganti atahori mana mate' nda fe'e sarani sa. Te mete ma atahori mates nda nasod'a bali' sa, saa' de rae sarani soa' neu atahori mana mate'? 30 Boe ma ta'o bee de hita nau ha'i sosoe' mate takandoo, mete ma atahori mana mate' a nda nasod'a bali' sa? 31 Huu au ae' a mate tungga-tungga fai! Te toronoo susue nggara e! Au sumba, ita' mae mate o nda saa saa sa boe. Au boti' ala mata ngga, huu ama nenepa'a mikindoo mo hita Lamatuan Yesus Kristus, fo Lamatualain haitua nema' a. 32 Fai' naa, lele' au fe'e sia kota Efesus, au aka' ukaru atahori mana ona' banda fui de'ulaka' ra. Te mete ma au aka' lab'an fo tungga' a hihii ngga, nda fee neu Lamatualain sa, naa parsuma' a. Nda na'ena ngguna sa! Te mete ma teb'e atahori mana mate' ra nda rasod'a bali' sa, malole lena' hita tungga-tungga' a atahori o'olan rae, “Ima ata feta-dote teu esa, ma taa-tinu malad'a-malad'a', huu mbila te hita mate ena!” 33 Ama afi' nene'ed'i nala' fo tungga dud'u'a ta'o naa! Huu hambu ded'ea-o'ola' oi, “Mete ma ho ei' sa mo atahori de'ulaka' ra, naa tao nggo dinggo' hela masod'a ndoo-tetu' a.” 34 Afi' tao de'ulaka' fai! Muloe' leo! Tao mata' neu masod'am! Tao' a ndoo-tetu' a! Matetun, hei musi mimed'a mamaet, huu sia talad'a mara, fe'e hambu atahori nda mana nahine Lamatualain sa. 35 Ruma ratane rae, “Mete ma atahori mana mate' ra rasod'a bali', na, dalan ta'o bee? Boe ma ao nara dad'i ta'o bee?” 36 Nggoa' e! Huu mete ma sela fini, naa fini a musi nambalutu sia rae rala, dei fo ana nanumbu fo mori. 37 Boe ma fini fo hita sela' a, matan nda ona' sud'i' a saa mana nanumbu ma naroo sa. Eni fini meto', ona' are nggandum do, are do, fini laen. 38 Esa-esa' no matan, tungga Lamatualain hihii-nanaun. Huu Eni mana na'etu' basa sela-nggari' ra esa-esa' no mata aon. 39 Banda ma atahori o ona' naa boe. Esa-esa' no mata aon, tungga Lamatualain hihii-nanaun. Atahori aon, tungga atahori mata aon. Banda ra aon, esa-esa' no mata aon. Mbui' no mata aon. U'u no mata aon. Laen ra fai ro mata aon. 40 Hambu sud'i' a saa sia lalai a, ma hambu sud'i' a saa sia raefafo'. Mana sia lalai a no eni manaselin. Te manaselin, laen no mana sia raefafo' a. Mana sia raefafo' no eni manaselin boe. Te manaselin, laen no mana sia lalai a. 41 Mete ma sia lalai a, relo manaselin laen; fulan manaselin laen; boe ma nduu' ra manaselin laen-laen. Esa-esa' no mata aon. Esa-esa' no manaselin. Dad'i basa se ra'ena manaseli', to? 42 Naa! Mete ma atahori mana mate' ra rasod'a bali', naa ona' fini a fa' ra. Huu mete ma ne'oi atahori mana mate' a ena, eni ao-sisin noe hendi e, to? Te mete ma nasod'a bali', eni nda ona' dalahulun sa ena. Huu mete ma nasod'a bali' na, eni nda bisa mate sa ena. 43 Lele' ata ta'oi atahori mates a, hita med'a naa aon sisi' naa manggenggeo'. Te mete ma atahori naa nasod'a bali', na, eni manaseli'! Huu ana dad'i meumare' ena! Atahori mana mate' a nda bisa tao saa sa boe, lele' atahori ra'oi e. Te lele' nasod'a bali', eni ma'ad'eren seli! 44 Mete ma atahori fe'e masod'a' na, eni nahine aka' du'a ma med'a' a, to? Te lele' eni mate, fo nasod'a bali', na, Lamatualain Dula-dalen fee eni masod'a ndoo-tetu' a. Boe ma eni nda ona' dalahulun sa ena. 45 Atahori ka esan mana ona' hita boe, naeni Adam. Tungga Lamatualain Susura Meumaren, nenesura' oi, “Ana dad'i atahori masod'a', mana du'a ma med'a nahine.” Te atahori fo mata aon ona' Adam mana sia ata' lena' naa, naeni Kristus. Eni Dula-dalen mana tao atahori nasod'a no matetu'. 46 Ka esan, naeni atahori mana nahine' a du'a ma med'a, ma ana bisa mate. Te mana nasod'a bali' a, naeni atahori mana hambu masod'a ndoo-tetu' mia Lamatualain Dula-dalen. 47 Atahori ka esan mana sia raefafo' a a tao e mia afu rae. Te ka ruan, naeni Kristus, mana nema mia sorga. 48 Hita mana tasod'a sia raefafo', mata ao tara ona' atahori ka esan, fo Lamatualain tao mia afu rae. Te atahori mana nenepa'a no Lamatualain sia sorga, mata aon ona' Kristus mana nema mia sorga. 49 Lele' ia hita mata aon ona' Adam fo Lamatualain tao mia afu rae. Te dod'oo ma hita nggati mata feu', ona' Kristus mana nema mia sorga. 50 Toronoo susue nggara e! Au ae ufad'e nggi ta'o ia: hita mana dad'i atahori mata-ao' ka esan, hita aon tao mia raa' no rui'. No ta'o naa, hita nda bisa simbo hata-heto' fo dad'i Lamatualain anan sia sorga sa. Nda bisa sa! Huu atahori mata ona' naa, dei fo ao nara rambulutu hendi se, de ara nda bisa simbo dala' fo ra'atataa' rakandoo sa. 51 Dad'i rena malolole! Te au ae ufad'e nggi rasia sa. Dei fo hambu atahori mamahere' ruma nda mate sa. Ma dei fo basa hita nenenggati' no mata feu'. 52 Lele' ma'oa nalii ma'ab'ui' a, basa ia ra aib'oi' ma dad'i neu' ena. Lai-lai lena' mia hate-mata'. Huu lele' ma'oa nalii, lele' naa boe o mana mate' ra rasod'a bali' boe. Mete ma rasod'a bali' ena, ara nda mate selu' sa, nda rambulutu selu sa boe. Hita mana fe'e masod'a' ra o ona' naa boe. Basa nggita dad'i mata feu'. 53 Hita aon sisin ia bisa nambalutu, nae oba e dad'i mata feu' nda bisa nambalutu sa ena. Boe ma hita lele' ia mana bisa mate, nae oba' e dad'i mata feu' nda bisa mate sa ena! Naa tao tungga saa fo nenesura' mema' sia Susura Meumare' a oi, “Lamatualain tao nalutu mamates koasan ena, boe ma nasenggi' e ena! Naeni de ata nda mate sa ena.” 54 55 “He, Mamates! Ho koasam sia bee? He, Mamates! Ho koasa mana nisa atahori ma, sia bee?” (Hadēs g86) 56 Saa de mamates nendi doid'oso' soa' neu hita atahori? Naa huu hita tao sala'. Naeni ena! Saa de sala-kilu tara ra'ena koasa ona' naa? Naa huu Lamatualain Hohoro-lalanen natud'u nae, hita sala-kilun nalena-langga neu Eni parendan. Naeni ena! 57 Te ale' ia, basa' e dad'i laen ena! Ma basa nggita to'e makasi nae-nae mbali Lamatualain. Huu Eni mana tao nggita tasenggi' basa dala de'ulaka' ra, tungga hita Lamatuan Yesus Kristus tataon. Ma Kristus mana nasenggi' teb'e! 58 Dad'i toronoo nggara e! Mi'itataa' mihere'! Afi' minggongga! Hei ue-tatao mara soa' neu Lamatualain musi boe malole ma namanae. Huu hei bub'ulu' ena mae, hei tao ues mita' mamate mara soa' neu hita Lamatuan, nda parsuma' sa.

< 1 Korintus 15 >