Luka 17

1 A o Isus e sikadenđe vaćarda: “O iskušenje mora te avol, al pharo okole manušese prekal kaste avol o iskušenje. 2 Pošukar ka avol lese te umlavol pe e baresa tari vodenica, thaj te čhudol pe ano more, nego te navodil ko greh jekhe tare kala cikne. 3 Aračhen tumen!” Te ćerda bilačhipe ćo phral o pobožno, vaćar lese kaj gova naj šukar, pa ako pokajil pe, oprosti lese. 4 Thaj ako efta droma ko đive grešil premal tute, thaj efta droma avol tute thaj vaćarol: “Kajima”, oprosti lese. 5 Thaj vaćarde e apostolura e Gospodese: “Pher amen pačaimasa.” 6 A o Gospod vaćarda: “Kana bi avola tumen pačaipe gaći cikno sar e gorušicako seme, bi vaćarena kale dudinkaće: ‘Ikal tut taro koreno thaj sadi tut ano more!’ Ka šunola tumen. 7 Savo tumendar ka phenol pe slugase, savo hunol i phuv il aračhol e bakren, kana iril pe andaro polje: ‘Av akari, beš te xa mangro’? Na, nijekh tumendar. 8 Mesto gova ka vaćaren: ‘Ćer manđe te xav! Čhuv tuće i kecelja thaj kande ma dok xav thaj pijav! A pale gova šaj i tu te xa thaj te pije.’ 9 E slugase ni zahvalil pe o barutno, golese so si gova lesi bući. 10 Gija i tumen kana šunen e Devle vaćaren: ‘Naj sam vredna hvalaće. Samo sam sluga save ćera amari bući.’” 11 Thaj kana đele ano Jerusalim, o Isus nakhlo maškari granica ki phuv Samarija thaj i phuv Galileja. 12 Thaj kana dija ane jekh foro, arakhlje le deš phumbale (gubavci), save ačhena dur. 13 Thaj vazdije po glaso vaćarindoj: “Isuse, Gospod! Smiluji tut pe amende!” 14 Kana o Isus dikhlja len vaćarda: “Džan thaj sikaven tumen e sveštenikurenđe.” I gija phirindoj sastile. 15 A jekh lendar dikhlja kaj sastilo, irisajlo thaj hvalisada e Devle andaro sa o glaso. 16 Thaj pelo angle Isusese pingre, thaj zahvalisajlo. Thaj gova sasa Samarijanco. 17 A o Isus pučlja le: “Na li sastiljen deš džene? Kaj si kola enja? 18 Sar maškar lende ni arakhlja pe nijekh te iril pe te zahvalil e Devlese, nego samo kava manuš andari aver phuv?” 19 Thaj vaćarda lese: “Ušti thaj đa! Sastarda tut ćo pačaipe ane mande.” 20 Pučlje e Isuse e fariseja: “Kana ka avol o carstvo e Devleso?” A o Isus vaćarda lendže: “O carstvo e Devleso ni ka avol te dičhol pe jakhencar. 21 Ni ka vaćarol pe: ‘Aktalo kate si!’, il: ‘Odori si!’ O carstvo e Devleso si maškar tumende.” 22 A e sikadenđe phenda: “Ka avol o vreme kana ka manđen te dičhen ma barem jekh đive kana me, o Čhavo e Manušeso, ka vladiv sar caro, al nakašti. 23 E manuša ka vaćaren tumenđe: ‘Akh kate si!’, il: ‘Ek odoring!’ Al ma ikljen, thaj ma prasten te roden ma. 24 Golese so me o Čhavo e Manušeso kana ka avav sar i munja so strefil andaro nebo, thaj ka svetliv sa so si talo nebo. 25 Al angleder trubul but te avav mučimo, thaj kala kuštika mora čhuden ma pestar. 26 Thaj sar sasa ano vreme e Nojaso gija i ka avol ane đivesa kana me o Čhavo e Manušeso ka avav. 27 Xalje, pilje, lije pe, dije pe dži kova đive dži kana o Noj dija ani barka, thaj avilo o baro paj thaj tasile sa okola save ni sesa ani barka. 28 Gija sasa i ane Loteso vreme kana sasa vov džuvdo. E manuša ano foro i Sodoma xalje pilje, ćinde, bićinde, sadisade, vazdije čhera. 29 A o đive kana iklilo o Lot andari Sodoma, čalada i jag thaj pele žuta bara save phabon taro nebo thaj mudarda sa okolen so ačhile ano foro. 30 Gija tar jekh drom kana ka avav me o Čhavo e Manušeso. 31 Ane gova đive savo ka avol ko krovo, a lese šeja ano čher andre, ma te uljol te lol len! Savo si ano polje, ma te iril pe ano foro pal pe šeja. 32 Den tumen gođi sar muli e Lotesi romni! 33 Golese savo dičhol te aračhol po džuvdipe, ka hasarol le, a ko hasarol po džuvdipe, ka aračhol le. 34 Vaćarav tumenđe, ane goja rat kana ka avav, tare duj manuša save pašljon ko than e pašljimaso, jekh ka lol pe, a dujto ka ačhol ko than e pašljimaso. 35 Tare duj džuvlja save meljin ano mlin, jekha ka lol pe, a i dujto ka ačhol. 36 Duj ka aven ki njiva, jekh ka lol pe, dujto ka ačhol.” 37 Thaj e sikade pučlje e Isuse: “A kaj gova, Gospod?” A vov vaćarda lendže kaja paramič: “Kaj si mulikano, odori ćiden pe e čiriklja save xan mulikano mas.”