+ Luka 15 +
1 But carinici hem prešunde grešnici čedena pe ine uzalo Isus te šunen le.
2 A o fariseja hem o učitelja e Zakonestar mrmljinde vaćerindoj: “Akava primini kora peste e grešnikonen hem hala olencar.”
3 Adalese o Isus phenđa lenđe akaja priča:
4 “Te nekas tumendar isi šel bakre i jekh olendar našaldili, so ka ćerel? Ka ačhaj e enjavardešuenjen ko gore hem ka džal te rodel e našalda bakrija sa đikote na arakhi la.
5 I kad ka arakhi la, ka radujini pe, ka čhivel la ko piče
6 hem ka legari la čhere. Tegani ka vičini ple amalen hem ple komšijen kora peste hem ka phenel lenđe: ‘Radujinen tumen mancar! Arakhljum mle našalda bakrija.’
7 Vaćerava tumenđe, ađahar da ano nebo ka ovel po bari radost zako jekh grešniko kad irini pe taro ple grehija ko Devel nego li zako enjavardešuenja pravednici kola mislinena da na valjani te obratinen pe.”
8 O Isus phenđa hem akava: “Ili te nesava đuvlja isi deš srebrna kovanice i jekh našali, so ka ćerel? Ka tharel o svetlo, ka šulaj o čher hem šukar ka rodel i kovanica đikote na arakhi la.
9 I kad ka arakhi la, ka vičini ple amalinjen hem ple komšiken kora peste hem ka phenel lenđe: ‘Radujinen tumen mancar! Arakhljum i kovanica savi našalđum.’
10 Ađahar, vaćerava tumenđe, ovela radost maškaro anđelja e Devlesere zako jekh grešniko kad irini pe taro ple grehija ko Devel.”
11 I o Isus phenđa: “Jekhe manuše ine duj čhave.
12 I o tikneder čhavo phenđa ple dadese: ‘Dade, de man akana o kotor oto barvalipe klo so preperela maje.’ I ađahar o dad ulavđa lenđe plo barvalipe.
13 I palo nekobor dive o tikneder čhavo čedinđa sa so inole, dželo ki durutni phuv hem adari halja sa plo barvalipe ađahar so živinđa dilikane.
14 Kad halja sa o love, ulo baro bokhalipe ani adaja phuv i tegani na inole so te hal.
15 I dželo te ćerel buti koro jekh manuš kova živinđa adari. Adava manuš bičhalđa le pese ko polje te arakhi balen.
16 O čhavo edobor inele bokhalo da manglja te hal adava so hana o bale, ali niko na dinđa le ništa hajbnase, čak ni adava.
17 A kad lelja te razmislini šukar, phenđa: Mle dadesere bućarnen isi da buderi hajbnase, a me akate merava bokhatar!
18 Ka irinav man koro mlo dad hem ka phenav lese: ‘Dade, grešinđum anglo Devel hem angla tute!
19 Na injum dostojno akana te vaćerav da injum to čhavo. Molinava tut, le man sar jekhe bućarne te ćerav buti kora tute.’
20 I lelja te džal koro plo dad. Pana sar inele dur ple dadesere čherestar, lesoro dad dikhlja le sar avela. Pelo e dadese žal, prastandilo đi leste, zagrlinđa le hem čumudinđa le.
21 Tegani o čhavo phenđa: ‘Dade, grešinđum anglo Devel hem angla tute! Na injum dostojno akana te vaćerav da injum to čhavo.’
22 A o dad phenđa ple slugenđe: ‘Sig anen o najšužo ogrtači hem urjaven le! Čhiven lese i angrustik ko naj hem o sandale ko pre!
23 Anen okole thuljarde telco te čhinen, te ha hem te slavina,
24 adalese so akava mlo čhavo inele mulo, a akana dživdilo, inele našaldo, a akanai arakhlo.’ I lelje te veselinen pe.
25 A o phureder čhavo ćerela ine buti ki njiva. I ko iriba, alo paše uzalo čher i šunđa bašaliba hem čheliba.
26 Tegani vičinđa jekhe sluga te pučel le so ulo adava.
27 O sluga phenđa lese: ‘To phral irinđa pe čhere. To dad čhinđa e thuljarde telco adalese so dikhlja le dživde hem saste.’
28 I o phureder čhavo holjanđa hem na manglja te đerdini ko čher. Tegani lesoro dad iklilo hem molinđa le te đerdini.
29 A ov phenđa ple dadese: ‘Ače, sa edobor berša kandava tut sar robo hem nikad na phagljum to lafi, a nijekhvar na dinđan man ni buzore te šaj mle amalencar te veselinav man.
30 A kad alo akava čhavo klo, kova halja to imanje e kurvencar, tu čhinđan lese thuljarde telco.’
31 A lesoro dad phenđa lese: ‘Mlo čhavo, tu stalno injan mancar. I sa soi mlo–kloi.
32 Ali, valjanđam ađahar te slavina hem te radujina amen adalese so akava, to phral, inele mulo, a akana dživdilo; inele našaldo, a akanai arakhlo!’”
