Salamo 118

1 Andriaño t’Iehovà amy te Ie ro soa! nainai’e ty fiferenaiña’e.

2 Anò ty hoe ry Israele: nainai’e ty fiferenaiña’e.

3 Anò ty hoe ry anjomba’ i Aharoneo: nainai’e ty fiferenaiña’e.

4 Anò ty hoe ry mpañeveñe am’ Iehovà: nainai’e ty fiferenaiña’e.

5 Nalovilovy raho, le nitoreo am’ Ià; nanoiñe ahiko t’Ià, le navotra’e an-gadagadañe eo.

6 Amako t’Iehovà, tsy ho hemban-draho, ino ty hanoa’ondatio?

7 Amako t’Iehovà, ­mpañolotse ahiko, le ho sambaeko o malaiñ’ ahio.

8 Hamake t’ie mipalitse am’ Iehovà, ta te misazok’ am’ ondatio.

9 Kitra’e mitsolok’ am’ Iehovà, ta te mirampy amo roandriañeo.

10 Hene miarikoboñe ahy o fifeheañeo fe iatoako ty tahina’ Iehovà.

11 Miarikatok’ ahy iereo, eka, toe misambory amako, fe iatoko ty tahina’ Iehovà.

12 Niropak’ amako hoe rene-tantele iereo, f’ie hakipike hoe fatike mirehetse; toe iatoako ty tahina’Iehovà.

13 Nanafasiotse ahy iereo hikorovohako, fe nañimb’ ahy t’Iehovà.

14 Iehovà ro haozarako naho saboko, ie ro ­fandrombahañe ahy henane zao.

15 Inao ty feom-pirebehañe naho fandrombahañe an-kivoho’ o vañoñeo ao: mavitrike ty fitoloñam-pitàn-kavana’ Iehovà.

16 Mizonjoñe ty fitàn-kavana’ Iehovà; mahimbañe ty fitàn-kavana’ Iehovà.

17 Tsy hikenkan-draho fa ho veloñe, hataliliko o sata’ Iehovào.

18 Nanilofe’ Ià am-pandilovan-draho, fe tsy natolo’e an-kavilasy.

19 Sokafo ho ahy o lalam-bein-kavantañañeo, hizilihako, hañandriañako Iehovà.

20 Intoy ty lalam-bei’ Iehovà, hiziliha’o vañoñeo.

21 Andriañekoo amy te tinoi’o, fa Ihe ro fandrombahañe ahy.

22 I vato nado’ o mpandrafitseoy le fa talèm-batolahy.

23 Sata’ Iehovà zay, le fiain-tane am-pihainon-tikañe.

24 Itoy ty andro tsinene’ Iehovà, antao hirebeke naho hifale ama’e.

25 Ry Iehovà, Ehe, rombaho zahay henaneo! ry Iehovà, Ehe, ampiraoraò henane zao!

26 Andriañeñe ty mitotsak’ ami’ty tahina’ Iehovà! mañandriañe azo zahay boak’añ’anjomba’Iehovà ao.

27 Andrianañahare t’Iehovà, Ie ty nanolotse hazavàñe amantika; mireketa reke-tsampañe amo mpamonje sabadidakeo, mivovotse mb’ an-tsifa’ i kitreliy mb’eo.

28 Ihe ro Andrianañahareko, le andriañekoo; Andrianañahareko rehe, ho zonjoñeko.

29 Andriaño t’Iehovà amy te ie ro soa! nainai’e ty fiferenaiña’e.