Ohabolana 8

1 Tsy mikoike hao ty hihitse, tsy mañonjom-piarañanañañe hao ty hilala?

2 An-kaboañe ey, añ’olon-dalañe eo, am-pitsileañe eo ty ijohaña’e;

3 añ’ilan-dalam-bein-tsariran-drova eo ami’ty fiziliha’ o lalam-beio ty ikoha’e ty hoe:

4 Ry ondatio, ikanjiako, ty feoko mb’amo ana’ ondatio.

5 Ry trentrañeo, mioha hakarafitoañe; naho, ry seretseo, mandrendreha an-troke.

6 Mitsanoña hitaroñako raha aman-kasiñe; vaho hañakatse volam-bantañe kanao misokake o soñikoo;

7 Hivolan-katò ty vavako; fa tiva amo soñikoo o haratiañeo.

8 Songa mahity o entam-bavakoo, tsy ama’e ty mikeloke ndra mengoke.

9 Ie vantañe amy mahihitsey vaho mahity ami’ty maha-onin-kilala.

10 Rambeso o fañòhakoo, fa tsy volafoty; naho ty hilala fa tsy volamena nitsoheñe;

11 Fa lombolombo’ o hangeo ty hihitse, vaho tsy eo ty salalaeñe mañirinkiriñ’aze.

12 Zaho, hihitse, ro miharo-toboke ami’ty filieram-batañe, vaho manjo hilala naho fitalifirañe.

13 Malain-karatiañe ty fañeveñañe am’ Iehovà. hejeko ty firengeañe, ty fibohabohañe, ty satan-karatiañe, naho ty vava mitera.

14 Amako ty fanoroañe, naho ty hihitse do’e, Zaho o hilalao; ahy o haozarañeo.

15 Zaho ty ifehea’ o mpanjakao, naho anoa’ o mpifeheo lily vantañe.

16 Zaho ty ifeleha’ o mpifelekeo naho o roandriañeo, ze hene mpizaka-to.

17 Kokoako ze mikoko ahiko, naho handrèndrek’ ahy ze mitsoek’ ahy.

18 Rekets’ amako ty vara naho ty asiñe; hanàñañe tsy modo naho havañonañe.

19 Soa te amo volamenao ty havokarako eka ndra volamena ki’e, vaho ambone’ ty volafoty jinoboñe o firegoregoakoo.

20 Manjotik’ an-dalam-bantan-draho, añivo o oloñolon-kavantañañeo,

21 hampandovàko vara o mpikoko ahio, naho hatseheko o kipondi’ iareoo.

22 Tsinene’ Iehovà raho ho fifotoran-dala’e, ty valoham-pitoloña’e haehae zay.

23 Tsietoimoneke zay ty nañorizañ’ ahiko, tam-baloha’ey, taolo te nioreñe ty tane toy.

24 Ie mboe tsy teo o lalekeo ty niterahañ’ ahy, ie mboe tsy nidoadoañan-drano o loharanoo.

25 Ie mboe tsy nipetake o vohitseo, taolo o tambohoo, te naterake;

26 Ie mboe tsy niforoñe’e ty tane toy naho o hivokeo, ndra ty deboke valoha’ ty tane toy.

27 Ie nampijadoñe o likerañeo, teo raho, Ie nanokitse ty bontoly ami’ty tarehe’ i lalekey eñe,

28 Ie natobe’e an-toe’e ey o likerañ’ amboneo, naho nampitosire’e o loha-rano’ i làlekeio.

29 Ie nifahera’e i riakey, tsy handilara’ o ranoo i nandilia’ey; ie tinendre’e o faha-ty tane toio,

30 Le nirekets’ ama’e raho fa natokisañe, naho nampifaleako lomoñandro, nainai’e nirebek’ aolo’e.

31 Nihisa an-tanem-pimoneña’e vaho nahaehak’ ahy o ana’ ondatio.

32 Ie amy zao, ry anake, mitsendreña ahy: Haha ze mañorike o lalakoo.

33 Mitsanoña fañòhañe naho mahihira, vaho ko mifoneñe.

34 Haha t’indaty mitsendreñe ahy, ty misary nainai’e an-dalam-beiko eo mandiñe an-dahin-dalako eo.

35 Ze tendrek’ ahiko tendre-kaveloñe, vaho tolora’ Iehovà fañisohañe;

36 Fe ze losotse ahy mijoy vatañe; fonga mikoko havilasy ze malaiñe ahy.