Ohabolana 22

1 Paiaeñe mandikoatse ty vara jabajaba ty añarañe soa, vaho ambone’ ty volafoty naho ty volamena ty fañisohañe.

2 Ty ihambaña’ ty mpañefoefo naho ty rarake: songa sata’ Iehovà Andrianamboatse.

3 Mizò hankañe ty maharendreke vaho mipalitse, fe misorok’ avao ty seretse vaho liloveñe.

4 Ty tambem-piambaneañe naho ty fañeveñañe am’ Iehovà, ro vara naho hasiñe vaho haveloñe.

5 An-dala’ ty mengoke ty fatike naho ty fandrike; ihankaña’ ty mahambem-piaiñe.

6 Anaro ty ajaja ty lala’ homba’e, le tsy handriha’e te bey.

7 Fehè’ ty mpañaleale ty rarake, ondevo’ ty mampisongo ty mpisongo.

8 Handrofotse haemberañe ty mitongy hatsivokarañe, vaho hipoke ty kobain-kaboseha’e.

9 Soa tata ty matarike, amy te andiva’e mahakama ty rarake.

10 Soiho añe o mpañìnjeo, le hibioñe ty mah’ankoheke; hijihetse ka ty sotasota naho inje.

11 Rañe’ ty mpanjàka ty mpikoko arofo-malio vaho rei-tave ty saontsi’e.

12 Mihaja hilala o fihaino’ Iehovào, fe havalintsingora’e ty fivola’ o mpamañahio.

13 Hoe ty votro: Liona ty alafe ao! havetra’e an-dalañe ey raho.

14 Kadaha laleke ty vava’ i tsimirirañey; mihotrak’ ao ze iviñera’ Iehovà.

15 Mifehefehe an-tro’ ty ajalahy ao ty hagegeañe, f’ie anoe’ ty kobaim-pandilovañe soike.

16 Songa mahararake ty famorekekeañe o rarakeo hanontonan-teña, naho ty fanolorañe ami’ty mpañaleale.

17 Atokilaño ty ravembia’o naho janjiño ty fitaro’ o mahihitseo; vaho itsakoreo o fañòhakoo,

18 Toe mahasoa azo te hampireketa’o, soa t’ie ho veka’e am-pivimbi’o.

19 Soa te hatokisa’o t’Iehovà, ty nampaharendrehako azo anindroany, eka ihe ‘nio!

20 Tsy fa nanokirako famereañe naho fampandrendrehañe telopolo?

21 hampalangesañe ama’o ty hiti’e naho ty hatò, hahatoiña’o an-katò ty nañirak’azo.

22 Ko kamere’o o rarakeo amy te poie, ko demohe’o an-dalambey eo ty mpisotry;

23 fa mihalaly ho a iareo t’Iehovà; vaho ho tavane’e ty fiai’ ze mitavañe am’iereo.

24 Ko mirañetse amo mandoviakeo, vaho ko mirekets’amy t’indaty miforoforo.

25 kera ho zatse o sata’eo, vaho hifehefehe am-pandrik’ ao ty fiai’o.

26 Ko mpiamo mpanò-tañañe ndra miantoke mpisongoo.

27 Naho tsy ama’o ty hañavaha’o aze, akore te hasinto’e i tihy ambane’oy?

28 Ko avi’o ty vorovoro haehae najadon-droae’oo,

29 Mahaoniñe ondaty mavitrike am-pitoloña’e hao rehe? ho mpitorom-panjàka re, tsy hijohañe aolo’ o tsotrao.