< Genesisy 5 >
1 Amy andro namboaren’ Añahare ondatioy le nihambam-bintañe aman’ Añahare ty namboare’e iareo.
2 Lahilahy naho ampela ty namboare’e iareo naho nitahie’e vaho natao’e ty hoe Ondaty amy andro namboareñe iareoy.
3 Ie zato-tsi-telopolo tao t’i Dame, le nahatoly anake hambam-bintañe ama’e vaho natao’e Sete ty añara’e.
4 Aa ie nisamake i Sete le mbe niveloñe valon-jato taoñe t’i Dame naho nahatoly lahilahy naho ampela.
5 Aa le sivan-jato tsy telopolo taoñe o hene andro’ i Dame te nivilasy.
6 Ie niveloñe zato taoñe lim’ amby t’i Sete le nisamake i Enose.
7 Mbe niveloñe valon-jato taoñe fito amby t’i Sete mifototse amy Enose le nisamake lahilahy naho ampela.
8 Aa le sivan-jato tsy folo-ro’amby taoñe o hene andro’ i Sete te nivilasy.
9 Ie niveloñe 90 taoñe t’i Enose le nisamake i Kanàne.
10 Mifototse amy nahatolia’e i Kanàney le mbe niveloñe 815 taoñe t’i Enose vaho nisamake lahilahy naho ampela.
11 Aa le 905 taoñe o hene andro’ i Enose te nivilasy.
12 Ie niveloñe 70 taoñe t’i Kanàne le nisamake i Mahalalila.
13 Mifototse amy nahatolia’e i Mahalalilay le mbe niveloñe 840 taoñe t’i Kanàne vaho nisamake lahilahy naho ampela.
14 Aa le 910 taoñe o hene andro’ i Kanàne te nivilasy.
15 Ie niveloñe 65 taoñe t’i Mahalalila le nisamake Ierede.
16 Mifototse amy nahatolia’e Ieredey le mbe niveloñe 830 taoñe t’i Mahalalila le nisamake lahilahy naho ampela.
17 Aa le 895 taoñe o hene andro’ i Mahalalila, vaho nivilasy.
18 Ie niveloñe 162 taoñe t’Ierede le nisamake i Kanoke.
19 Mifototse amy nahatolia’e i Kanokey le mbe niveloñe 800 taoñe t’Ierede vaho nisamake lahilahy naho ampela.
20 Aa le 962 taoñe o hene andro’ i Ierede te nivilasy.
21 Ie niveloñe 65 taoñe t’i Kanoke le nisamake i Metoselake.
22 Mifototse amy nahatolia’e i Metoselakey le mbe nindre fañavelo aman’ Añahare 300 taoñe t’i Kanoke vaho nisamake lahilahy naho ampela.
23 Aa le 365 taoñe o hene andro’ i Kanoke.
24 Nindre fañavelo aman’ Andrianañahare t’i Kanoke, le lia’e tsy teo, amy te rinamben’ Añahare.
25 Ie niveloñe 187 taoñe t’i Metoselake le nisamake i Lemeke.
26 Mifototse amy nahatolia’e i Lemekey le mbe niveloñe 782 taoñe t’i Metoselake vaho nisamake lahilahy naho ampela.
27 Aa le 969 taoñe o hene andro’ i Metoselake vaho nivilasy.
28 Ie niveloñe 182 taoñe t’i Lemeke le nisamake lahilahy.
29 Natao’e Nòake ty añara’e le nanao ty hoe: Hañohò antika re ami’ty fifanehafantika naho ami’ty fitromaham-pitàn-tika boak’ an-tane’ nafà’ Iehovà toy.
30 Mifototse amy nisamaha’ i Nòakey le mbe niveloñe 595 taoñe t’i Lemeke vaho nisamake lahilahy naho ampela.
31 Aa le 777 taoñe o hene andro’ i Lemeke te nivilasy.
32 Lim’anjato taoñe t’i Nòake, le nisamake i Seme naho i Kame vaho Ièfete t’i Nòake.
