Ephesios 5
1 Estote ergo imitatores Dei, sicut filii charissimi:
estote ergo imitatores Dei sicut filii carissimi
2 et ambulate in dilectione, sicut et Christus dilexit nos, et tradidit semetipsum pro nobis oblationem, et hostiam Deo in odorem suavitatis.
et ambulate in dilectione sicut et Christus dilexit nos et tradidit se ipsum pro nobis oblationem et hostiam Deo in odorem suavitatis
3 Fornicatio autem, et omnis immunditia, aut avaritia nec nominetur in vobis, sicut decet sanctos:
fornicatio autem et omnis inmunditia aut avaritia nec nominetur in vobis sicut decet sanctos
4 aut turpitudo, aut stultiloquium, aut scurrilitas, quae ad rem non pertinet: sed magis gratiarum actio.
aut turpitudo aut stultiloquium aut scurrilitas quae ad rem non pertinent sed magis gratiarum actio
5 Hoc enim scitote intelligentes: quod omnis fornicator, aut immundus, aut avarus, quod est idolorum servitus, non habet hereditatem in regno Christi, et Dei.
hoc enim scitote intellegentes quod omnis fornicator aut inmundus aut avarus quod est idolorum servitus non habet hereditatem in regno Christi et Dei
6 Nemo vos seducat inanibus verbis: propter haec enim venit ira Dei in filios diffidentiae.
nemo vos seducat inanibus verbis propter haec enim venit ira Dei in filios diffidentiae
7 Nolite ergo effici participes eorum.
nolite ergo effici participes eorum
8 Eratis enim aliquando tenebrae: nunc autem lux in Domino. Ut filii lucis ambulate:
eratis enim aliquando tenebrae nunc autem lux in Domino ut filii lucis ambulate
9 fructus enim lucis est in omni bonitate, et iustitia, et veritate:
fructus enim lucis est in omni bonitate et iustitia et veritate
10 probantes quid sit beneplacitum Deo:
probantes quid sit beneplacitum Deo
11 et nolite communicare operibus infructuosis tenebrarum, magis autem redarguite.
et nolite communicare operibus infructuosis tenebrarum magis autem et redarguite
12 Quae enim in occulto fiunt ab ipsis, turpe est et dicere.
quae enim in occulto fiunt ab ipsis turpe est et dicere
13 Omnia autem, quae arguuntur, a lumine manifestantur: omne enim, quod manifestatur, lumen est.
omnia autem quae arguuntur a lumine manifestantur omne enim quod manifestatur lumen est
14 Propter quod dicit: Surge qui dormis, et exurge a mortuis, et illuminabit te Christus.
propter quod dicit surge qui dormis et exsurge a mortuis et inluminabit tibi Christus
15 Videte itaque fratres, quomodo caute ambuletis: non quasi insipientes,
videte itaque fratres quomodo caute ambuletis non quasi insipientes sed ut sapientes
16 sed ut sapientes: redimentes tempus, quoniam dies mali sunt.
redimentes tempus quoniam dies mali sunt
17 Propterea nolite fieri imprudentes: sed intelligentes quae sit voluntas Dei.
propterea nolite fieri inprudentes sed intellegentes quae sit voluntas Domini
18 Et nolite inebriari vino, in quo est luxuria: sed implemini Spiritu sancto,
et nolite inebriari vino in quo est luxuria sed implemini Spiritu
19 loquentes vobismetipsis in psalmis, et hymnis, et canticis spiritualibus, cantantes, et psallentes in cordibus vestris Domino,
loquentes vobismet ipsis in psalmis et hymnis et canticis spiritalibus cantantes et psallentes in cordibus vestris Domino
20 gratias agentes semper pro omnibus, in nomine Domini nostri Iesu Christi Deo et Patri.
gratias agentes semper pro omnibus in nomine Domini nostri Iesu Christi Deo et Patri
21 Subiecti invicem in timore Christi.
subiecti invicem in timore Christi
22 Mulieres viris suis subditae sint, sicut Domino:
mulieres viris suis subditae sint sicut Domino
23 quoniam vir caput est mulieris: sicut Christus caput est Ecclesiae: Ipse, salvator corporis eius.
quoniam vir caput est mulieris sicut Christus caput est ecclesiae ipse salvator corporis
24 Sed sicut Ecclesia subiecta est Christo, ita et mulieres viris suis in omnibus.
sed ut ecclesia subiecta est Christo ita et mulieres viris suis in omnibus
25 Viri, diligite uxores vestras, sicut et Christus dilexit Ecclesiam, et seipsum tradidit pro ea,
viri diligite uxores sicut et Christus dilexit ecclesiam et se ipsum tradidit pro ea
26 ut illam sanctificaret, mundans eam lavacro aquae in verbo vitae,
ut illam sanctificaret mundans lavacro aquae in verbo
27 ut exhiberet ipse sibi in gloriosam Ecclesiam, non habentem maculam, aut rugam, aut aliquid huiusmodi, sed ut sit sancta et immaculata.
ut exhiberet ipse sibi gloriosam ecclesiam non habentem maculam aut rugam aut aliquid eiusmodi sed ut sit sancta et inmaculata
28 Ita et viri debent diligere uxores suas ut corpora sua. Qui suam uxorem diligit, seipsum diligit.
ita et viri debent diligere uxores suas ut corpora sua qui suam uxorem diligit se ipsum diligit
29 Nemo enim umquam carnem suam odio habuit: sed nutrit, et fovet eam, sicut et Christus Ecclesiam:
nemo enim umquam carnem suam odio habuit sed nutrit et fovet eam sicut et Christus ecclesiam
30 quia membra sumus corporis eius, de carne eius, et de ossibus eius.
quia membra sumus corporis eius de carne eius et de ossibus eius
31 Propter hoc relinquet homo patrem, et matrem suam, et adhaerebit uxori suae: et erunt duo in carne una.
propter hoc relinquet homo patrem et matrem suam et adherebit uxori suae et erunt duo in carne una
32 Sacramentum hoc magnum est, ego autem dico in Christo et in Ecclesia.
sacramentum hoc magnum est ego autem dico in Christo et in ecclesia
33 Verumtamen et vos singuli, unusquisque uxorem suam sicut seipsum diligat: uxor autem timeat virum suum.
verumtamen et vos singuli unusquisque suam uxorem sicut se ipsum diligat uxor autem ut timeat virum
