Psalmorum 68
1 In finem, Psalmus Cantici ipsi David. Exurgat Deus, et dissipentur inimici eius, et fugiant qui oderunt eum, a facie eius.
in finem David psalmus cantici exsurgat Deus et dissipentur inimici eius et fugiant qui oderunt eum a facie eius
2 Sicut deficit fumus, deficiant: sicut fluit cera a facie ignis, sic pereant peccatores a facie Dei.
sicut deficit fumus deficiant sicut fluit cera a facie ignis sic pereant peccatores a facie Dei
3 Et iusti epulentur, et exultent in conspectu Dei: et delectentur in lætitia.
et iusti epulentur exultent in conspectu Dei delectentur in laetitia
4 Cantate Deo, psalmum dicite nomini eius: iter facite ei, qui ascendit super occasum: Dominus nomen illi. Exultate in conspectu eius, turbabuntur a facie eius,
cantate Deo psalmum dicite nomini eius iter facite ei qui ascendit super occasum Dominus nomen illi et exultate in conspectu eius turbabuntur a facie eius
5 patris orphanorum, et iudicis viduarum. Deus in loco sancto suo:
patris orfanorum et iudicis viduarum Deus in loco sancto suo
6 Deus qui inhabitare facit unius moris in domo: Qui educit vinctos in fortitudine, similiter eos, qui exasperant, qui habitant in sepulchris.
Deus inhabitare facit unius moris in domo qui educit vinctos in fortitudine similiter eos qui exasperant qui habitant in sepulchris
7 Deus cum egredereris in conspectu populi tui, cum pertransires in deserto,
Deus cum egredereris in conspectu populi tui cum pertransieris in deserto diapsalma
8 terra mota est, etenim cæli distillaverunt a facie Dei Sinai, a facie Dei Israel.
terra mota est etenim caeli distillaverunt a facie Dei Sinai a facie Dei Israhel
9 Pluviam voluntariam segregabis Deus hereditati tuæ: et infirmata est, tu vero perfecisti eam.
pluviam voluntariam segregabis Deus hereditati tuae et infirmata est tu vero perfecisti eam
10 Animalia tua habitabunt in ea: parasti in dulcedine tua pauperi, Deus.
animalia tua habitant in ea parasti in dulcedine tua pauperi Deus
11 Dominus dabit verbum evangelizantibus, virtute multa.
Dominus dabit verbum evangelizantibus virtute multa
12 Rex virtutum dilecti dilecti: et speciei domus dividere spolia.
rex virtutum dilecti dilecti; et speciei domus dividere spolia
13 Si dormiatis inter medios cleros, pennæ columbæ deargentatæ, et posteriora dorsi eius in pallore auri.
si dormiatis inter medios cleros pinnae columbae deargentatae et posteriora dorsi eius in pallore auri
14 Dum discernit cælestis reges super eam, nive dealbabuntur in Selmon:
dum discernit Caelestis reges super eam nive dealbabuntur in Selmon
15 mons Dei, mons pinguis. Mons coagulatus, mons pinguis:
mons Dei mons pinguis mons coagulatus mons pinguis
16 ut quid suspicamini montes coagulatos? Mons, in quo beneplacitum est Deo habitare in eo: etenim Dominus habitabit in finem.
ut quid suspicamini montes coagulatos mons in quo beneplacitum est Deo habitare in eo etenim Dominus habitabit in finem
17 Currus Dei decem millibus multiplex, millia lætantium: Dominus in eis in Sina in sancto.
currus Dei decem milibus multiplex milia laetantium Dominus in eis in Sina in sancto
18 Ascendisti in altum, cepisti captivitatem: accepisti dona in hominibus: Etenim non credentes, inhabitare Dominum Deum.
ascendisti in altum cepisti captivitatem accepisti dona in hominibus etenim non credentes inhabitare Dominum Deus
19 Benedictus Dominus die quotidie: prosperum iter faciet nobis Deus salutarium nostrorum.
benedictus Dominus die cotidie prosperum iter faciet nobis Deus salutarium nostrorum diapsalma
20 Deus noster, Deus salvos faciendi: et Domini, Domini exitus mortis.
Deus noster Deus salvos faciendi et Domini Domini exitus mortis
21 Verumtamen Deus confringet capita inimicorum suorum: verticem capilli perambulantium in delictis suis.
verumtamen Deus confringet capita inimicorum suorum verticem capilli perambulantium in delictis suis
22 Dixit Dominus: Ex Basan convertam, convertam in profundum maris:
dixit Dominus ex Basan convertam convertam in profundis maris
23 Ut intingatur pes tuus in sanguine: lingua canum tuorum ex inimicis, ab ipso.
ut intinguatur pes tuus in sanguine lingua canum tuorum ex inimicis ab ipso
24 Viderunt ingressus tuos Deus, ingressus Dei mei: regis mei qui est in sancto.
viderunt ingressus tui Deus ingressus Dei mei regis mei qui est in sancto
25 Prævenerunt principes coniuncti psallentibus, in medio iuvencularum tympanistriarum.
praevenerunt principes coniuncti psallentibus in medio iuvencularum tympanistriarum
26 In ecclesiis, benedicite Deo Domino, de fontibus Israel.
in ecclesiis benedicite Deum Dominum de fontibus Israhel
27 Ibi Beniamin adolescentulus, in mentis excessu. Principes Iuda, duces eorum: principes Zabulon, principes Nephthali.
ibi Beniamin adulescentulus in mentis excessu principes Iuda duces eorum principes Zabulon principes Nepthali
28 Manda Deus virtuti tuæ: confirma hoc Deus, quod operatus es in nobis.
manda Deus virtutem tuam confirma Deus hoc quod operatus es nobis
29 A templo tuo in Ierusalem, tibi offerent reges munera.
a templo tuo in Hierusalem tibi adferent reges munera
30 Increpa feras arundinis, congregatio taurorum in vaccis populorum: ut excludant eos, qui probati sunt argento. Dissipa gentes, quæ bella volunt:
increpa feras harundinis congregatio taurorum in vaccis populorum ut excludant eos qui probati sunt argento dissipa gentes quae bella volunt
31 venient legati ex Ægypto: Æthiopia præveniet manus eius Deo.
venient legati ex Aegypto Aethiopia praeveniet manus eius Deo
32 Regna terræ, cantate Deo: psallite Domino: psallite Deo.
regna terrae cantate Deo psallite Domino diapsalma psallite Deo
33 qui ascendit super cælum cæli, ad Orientem. Ecce dabit voci suæ vocem virtutis,
qui ascendit super caelum caeli ad orientem ecce dabit voci suae vocem virtutis
34 date gloriam Deo super Israel, magnificentia eius, et virtus eius in nubibus.
date gloriam Deo super Israhel magnificentia eius et virtus eius in nubibus
35 Mirabilis Deus in sanctis suis, Deus Israel ipse dabit virtutem, et fortitudinem plebi suæ, benedictus Deus.
mirabilis Deus in sanctis suis Deus Israhel ipse dabit virtutem et fortitudinem plebi suae benedictus Deus
