Proverbiorum 13

1 Filius sapiens, doctrina patris: qui autem illusor est, non audit cum arguitur.

filius sapiens doctrina patris qui autem inlusor est non audit cum arguitur

2 De fructu oris sui homo satiabitur bonis: anima autem prævaricatorum iniqua.

de fructu oris homo saturabitur bonis anima autem praevaricatorum iniqua

3 Qui custodit os suum, custodit animam suam: qui autem inconsideratus est ad loquendum, sentiet mala.

qui custodit os suum custodit animam suam qui autem inconsideratus est ad loquendum sentiet mala

4 Vult et non vult piger: anima autem operantium impinguabitur.

vult et non vult piger anima autem operantium inpinguabitur

5 Verbum mendax iustus detestabitur: impius autem confundit, et confundetur.

verbum mendax iustus detestabitur impius confundit et confundetur

6 Iustitia custodit innocentis viam: impietas autem peccatorem supplantat.

iustitia custodit innocentis viam impietas vero peccato subplantat

7 Est quasi dives cum nihil habeat: et est quasi pauper, cum in multis divitiis sit.

est quasi dives cum nihil habeat et est quasi pauper cum in multis divitiis sit

8 Redemptio animæ viri, divitiæ suæ: qui autem pauper est, increpationem non sustinet.

redemptio animae viri divitiae suae qui autem pauper est increpationem non sustinet

9 Lux iustorum lætificat: lucerna autem impiorum extinguetur.

lux iustorum laetificat lucerna autem impiorum extinguetur

10 Inter superbos semper iurgia sunt: qui autem agunt omnia cum consilio, reguntur sapientia.

inter superbos semper iurgia sunt qui autem agunt cuncta consilio reguntur sapientia

11 Substantia festinata minuetur: quæ autem paulatim colligitur manu, multiplicabitur.

substantia festinata minuetur quae autem paulatim colligitur manu multiplicabitur

12 Spes, quæ differtur, affligit animam: lignum vitæ desiderium veniens.

spes quae differtur adfligit animam lignum vitae desiderium veniens

13 Qui detrahit alicui rei, ipse se in futurum obligat: qui autem timet præceptum, in pace versabitur. Animæ dolosæ errant in peccatis: iusti autem misericordes sunt, et miserantur.

qui detrahit alicui rei ipse se in futurum obligat qui autem timet praeceptum in pace versabitur

14 Lex sapientis fons vitæ, ut declinet a ruina mortis.

lex sapientis fons vitae ut declinet a ruina mortis

15 Doctrina bona dabit gratiam: in itinere contemptorum vorago.

doctrina bona dabit gratiam in itinere contemptorum vorago

16 Astutus omnia agit cum consilio: qui autem fatuus est, aperit stultitiam.

astutus omnia agit cum consilio qui autem fatuus est aperit stultitiam

17 Nuncius impii cadet in malum: legatus autem fidelis, sanitas.

nuntius impii cadet in malum legatus fidelis sanitas

18 Egestas, et ignominia ei, qui deserit disciplinam: qui autem acquiescit arguenti, glorificabitur.

egestas et ignominia ei qui deserit disciplinam qui autem adquiescit arguenti glorificabitur

19 Desiderium si compleatur, delectat animam: detestantur stulti eos, qui fugiunt mala.

desiderium si conpleatur delectat animam detestantur stulti eos qui fugiunt mala

20 Qui cum sapientibus graditur, sapiens erit: amicus stultorum similis efficietur.

qui cum sapientibus graditur sapiens erit amicus stultorum efficietur similis

21 Peccatores persequitur malum: et iustis retribuentur bona.

peccatores persequetur malum et iustis retribuentur bona

22 Bonus reliquit heredes filios, et nepotes: et custoditur iusto substantia peccatoris.

bonus relinquet heredes filios et nepotes et custoditur iusto substantia peccatoris

23 Multi cibi in novalibus patrum: et aliis congregantur absque iudicio.

multi cibi in novalibus patrum et alii congregantur absque iudicio

24 Qui parcit virgæ, odit filium suum: qui autem diligit illum, instanter erudit.

qui parcit virgae suae odit filium suum qui autem diligit illum instanter erudit

25 Iustus comedit, et replet animam suam: venter autem impiorum insaturabilis.

iustus comedit et replet animam suam venter autem impiorum insaturabilis