< Soakas 4 >

1 Tulik nutik, kowos in porongo mwe luti lun papa tomowos. Arulana lohang nu kac, na ac fah oasr etauk lowos. 2 Nga luti kowos ke inkanek wo. Nimet kowos pilesru. 3 Ke nga srakna tulik srisrik, wen sefanna nutin papa ac nina, 4 papa el ac fahk, “Esamya ma nga fahk inge, ac nimet mulkunla. Oru in oana ke nga fahk uh, na kom fah moul. 5 Eis lalmwetmet ac liyaten! Nimet mulkunla ku pilesru ma nga fahk uh. 6 Nimet sisla lalmwetmet, na el ac loangekom. Lungse el, ac el fah liyekomyang wo. 7 Ma se ma yohk sripa emeet nu sum pa in suk lalmwetmet. Kutena ma kom ac sifil suk saya, kom in suk etauk. 8 Lungse lalmwetmet, ac el ac fah oru kom in fulat. Apsilya ku, ac el ac fah oru in kaksakinyuk kom. 9 El ac fah oana sie tefuro wolana nu fin sifom.” 10 Lohngyu, tulik nutik. Nunku akwoye ma nga fahk nu sum uh, na ac fah loes moul lom. 11 Nga luti nu sum lalmwetmet ac ouiyen moul pwaye kom in fahsr kac. 12 Wangin ma ac kosrala inkanek lom kom fin fahsr in lalmwetmet, ac kom ac tia tukulkul ke pacl kom kasrusr. 13 Esam ma kom luti uh pacl nukewa. Lutlut lom uh pa moul lom — liyaung akwoya. 14 Nimet fahsr nu yen mwet koluk uh fahsr nu we. Nimet ukwe ouiyen moul lalos. 15 Fahsr liki ma koluk! Nimet apkuranyang nu kac! Kuhfla liki ac fahsrot ke inkanek lom. 16 Mwet koluk uh tia ku in motulla nwe ke na elos orala sie ma koluk. Elos ac ngetnget na elos fin tia orala mwe lokoalok nu sin mwet. 17 Ma koluk ac sulallal uh oana mwe mongo ac mwe nim nu selos. 18 Inkanek lun mwet suwoswos uh oana takak lun faht uh, ma kais kutu kalmwelik nwe ke na lenelik. 19 Inkanek lun mwet koluk uh lohsr matoltol. Elos ikori tuh elos tia ku in liye lah mea se oru elos ikori uh. 20 Tulik nutik, lohng akwoya ma nga fahk uh. 21 Esam kas luk ac karinganang in tia wanginla liki kom. 22 Kas inge ac sang moul ac ku lun mano nu sin kutena mwet su kalem kac. 23 Arulana karinganang nunak lom an — mweyen moul lom ac sikyak oana ma kom nunku. 24 Nimet fahk kutena ma su tia pwaye, ac tia orekmakin kas kikiap ku kutena ouiya ma ac kiapu mwet uh. 25 Ngetot suwohs nu meeto ke inse pulaik. Nimet ngetnget in tonong. 26 Akola akwoye ma kom ac oru an, na ma nukewa kom oru ac ku in orekla wo. 27 Kaingkin ma koluk ac fahsr suwohs nu meeto. Nimet kuhfla liki inkanek pwaye.

< Soakas 4 >