Oekyuk 26

1 Tukun mas upa sac, LEUM GOD El fahk nu sel Moses ac Eleazar wen natul Aaron,

2 “Oru sie oaoa lulap ke pisen mwet uh ke sou nukewa in kais sie sruf lun Israel, ke mukul nukewa yac longoulyak matwa su fal in wi mweun.”

3 Moses ac Eleazar pangon mukul nukewa in toeni in acn mwesis lun Moab, kutulap in Infacl Jordan, tulanang Jericho. Eltal fahk nu selos,

4 “Kowos in oakla mukul nukewa ma yac longoulyak,” oana LEUM GOD El sapkin nu sel Moses. Pa inge mwet Israel su tuku liki facl Egypt:

5 Sruf lal Reuben pa inge (Reuben pa wounse mukul natul Jacob): sou lulap lal Hanoch, lal Pallu,

6 lal Hezron, ac lal Carmi.

7 Pisen mukul ke sou lulap inge kewa oasr ke angngaul tolu tausin itfoko tolngoul.

8 Fwilin tulik natul Pallu pa Eliab,

9 ac wen natul inge: Nemuel, Dathan, ac Abiram. (Dathan ac Abiram pa tuh solla in mwet kol lun mwet uh. Eltal tuh lainul Moses ac Aaron ke eltal srola wela mwet ke u lal Korah ke pacl se elos tunyuna lain LEUM GOD.

10 Infohk uh mangelik ac okomulosla, ac elos misa welul Korah ac mwet lal ke pacl se e uh onela mwet luofoko lumngaul. Lumah se inge tuh sie mwe akul in sensenkakin mwet Israel nukewa.

11 Tusruktu wen natul Korah tiana anwukla.)

12 Sruf lal Simeon pa inge: sou lulap lal Nemuel, lal Jamin, lal Jachin,

13 lal Zerah, ac lal Shaul.

14 Pisen mukul ke sou lulap inge kewa oasr ke longoul luo tausin luofoko.

15 Sruf lal Gad pa inge: sou lulap lal Zephon, lal Haggi, lal Shuni,

16 lal Ozni, lal Eri,

17 lal Arod, ac lal Areli.

18 Pisen mukul ke sou lulap inge kewa oasr ke angngaul tausin lumfoko.

19 Sruf lal Judah pa inge: (Wen luo natul Judah pa Er ac Onan, tuh eltal misa na in acn Canaan.)

20 Sou lulap lal Shelah, lal Perez, ac lal Zerah.

21 Fwilin tulik natul Perez pa tulik natul Hezron, ac tulik natul Hamul.

22 Pisen mukul ke sou lulap inge kewa oasr ke itngoul onkosr tausin lumfoko.

23 Sruf lal Issachar pa inge: sou lulap lal Tola, lal Puah,

24 lal Jashub, ac lal Shimron.

25 Pisen mukul ke sou lulap inge kewa oasr ke onngoul akosr tausin tolfoko.

26 Sruf lal Zebulun pa inge: sou lulap lal Sered, lal Elon, ac lal Jahleel.

27 Pisen mukul ke sou lulap inge kewa oasr ke onngoul tausin lumfoko.

28 Sruf luo lal Joseph, pa Manasseh ac Ephraim, wen luo natul.

29 Sruf lal Manasseh pa inge: Machir wen natul Manasseh pa papa tumal Gilead, ac sou lulap takla inge, takme tokol Gilead, su papa matu tumalos:

30 sou lulap lal Iezer, lal Helek,

31 lal Asriel, lal Shechem,

32 lal Shemida, ac lal Hepher.

33 Zelophehad wen natul Hepher, wangin wen natul, a acn mukena — inelos pa Mahlah, Noah, Hoglah, Milcah, ac Tirzah.

34 Pisen mukul ke sou lulap inge kewa oasr ke lumngaul luo tausin ac itfoko.

35 Sruf lal Ephraim pa inge: sou lulap lal Shuthelah, lal Becher, ac lal Tahan.

36 Sou lulap lal Eran mutawauk yorol Shuthelah.

37 Pisen mukul ke sou lulap inge kewa oasr ke tolngoul luo tausin ac lumfoko. Sou lulap inge kewa ma tuku kacl Joseph.

38 Sruf lal Benjamin pa inge: sou lulap lal Bela, lal Ashbel, lal Ahiram,

39 lal Shephupham, ac lal Hupham.

40 Sou lulap lal Ard ac lal Naaman mutawauk kacl Bela.

41 Pisen mukul ke sou lulap inge kewa oasr ke angngaul limekosr tausin ac onfoko.

42 Sruf lal Dan pa inge: sou lulap lal Shuham.

43 Pisen mukul ke sou lulap se inge oasr ke onngoul akosr tausin ac angfoko.

44 Sruf lal Asher pa inge: sou lulap lal Imnah, lal Ishvi, ac lal Beriah.

45 Sou lulap lal Heber ac lal Malchiel mutawauk kacl Beriah.

46 Oasr acn se natul Asher, inel pa Serah.

47 Pisen mukul ke sou lulap inge kewa oasr ke lumngaul tolu tausin ac angfoko.

48 Sruf lal Naphtali pa inge: sou lulap lal Jahzeel, lal Guni,

49 lal Jezer, ac lal Shillem.

50 Pisen mukul ke sou lulap inge kewa oasr ke angngaul limekosr tausin ac angfoko.

51 Pisen mukul Israel nukewa toeni orala tausin onfoko sie ac itfoko tolngoul.

52 LEUM GOD El fahk nu sel Moses,

53 “Kitalik acn uh nu sin sruf nukewa, fal nu ke pisen mwet ke kais sie sruf.

54 Nu sin sie sruf lulap kom fah sang sie acn yohk tuh in acn selos, ac nu sin sie sruf srisrik kom fah sang sie acn srisrik tuh in acn selos. Sang nu sin sruf nukewa sie acn fal nu ke pisalos.

55 Tusruktu acn an ac fah kitakatelik ke fa; fal nu ke inen papa tumun kais sie sruf.

56 Sruf lulap ac fah usrui acn lulap, ac sruf srisrik ac fah usrui acn srisrik.

57 Sruf lal Levi pa inge: sou lulap lal Gershon, lal Kohath, ac lal Merari.

58 Fwilin tulik natulos pa ke sou lal Libni, lal Hebron, lal Mahli, lal Mushi, ac lal Korah. Kohath pa papa tumal Amram,

59 su tuh payukyak sel Jochebed, acn natul Levi. Jochebed el tuh isusla in acn Egypt, ac el osweang nu sel Amram wen luo: Aaron ac Moses, ac acn se, Miriam.

60 Oasr wen akosr natul Aaron: inelos pa Nadab, Abihu, Eleazar, ac Ithamar.

61 Nadab ac Abihu eltal misa ke sripen eltal tuh orek kisa nu sin LEUM GOD ke sie e tia mutal.

62 Pisen mukul in sruf lal Levi su malem seyak matwa, oasr ke tausin longoul tolu. Elos oaoala sayen mwet Israel nukewa, ke sripen wangin acn itukyang lalos ke acn lun Israel.

63 Sou lulap inge nukewa simla sel Moses ac Eleazar pacl se elos eis oaoa lulap ke mwet Israel in acn mwesis lun Moab, su oan layen nu kutulap ke Infacl Jordan tulanang Jericho.

64 Wangin siefanna mukul lula ke oaoa se meet ma Moses ac Aaron tuh oru yen mwesis Sinai.

65 LEUM GOD El tuh fahk mu elos nukewa ac misa yen mwesis, sayal Caleb wen natul Jephunneh, ac Joshua wen natul Nun.