Job 20

1 Na Zophar el fahk,

2 “Job, kom arulana aktoasryeyu. Inge nga semutengla, ac kena tari topuk kom.

3 Ma kom fahk ah kas in na pirakak, Tusruktu nga etu lah nga ac topuk fuka.

4 “Kom etu na lah oemeet me, Ke mutawauk in fili mwet uh fin faclu ah,

5 Wangin sie mwet koluk ku in engan paht.

6 Sahp el ac ku in kapak in mwet na fulat se, Nwe ke na insifal sun pukunyeng uh,

7 Tusruktu el ac ukyukla oana kutkut uh. Mwet ma etal meet ah, Ac suk lah el som nu ya.

8 El ac wanginla oana sie mweme, oana sie aruruma ke fong, Ac tiana sifil liyeyuk.

9 El ac wanginla liki acn ma el tuh muta we meet ah;

10 Ac tulik natul ac fah akfalyela ma lun mwet sukasrup ma el tuh pisrala ah.

11 Meet, manol fusr ac el arulana fokoko, Tusruktu ac tia pat, ac fah ekla nu ke kutkut.

12 “Ma koluk uh finne oana sie ma emwem nu ke oalul, Ac el finne okanla oan ye lohul,

13 Ac tia lungse sisla, a kena in oanna inwalul elan engankin ema uh.

14 Tusruktu mongo inge ac ekla mwen ke sun insial — Mwen oana pwasin uh.

15 Mwet koluk uh wihtacla mwe kasrup ma el pisrala uh; Ac God El ac eisla sel, finne oan insial.

16 Ma su mwet koluk se ukumya uu oana pwasin; Ac fah unilya oana ngalngul lun soko wet pwasin uh.

17 El ac fah tia moul in liye infacl ma oil in olive soror we uh, Ku infacl srisrik ma oasr milk ac honey soror kac.

18 El ac enenu in fuhleak nufon ma el kemkatu kac meet ah; Ac fah wangin pacl elan insewowokin mwe kasrup lal,

19 Mweyen el tuh akkeokye ac pilesru mwet sukasrup, Ac eisla lohm ma siena mwet musaela.

20 Rapku lal uh oru el tia ku in muti.

21 Ke pacl el mongo uh, wanginna luwa, Ac inge, pacl in mut lal uh safla.

22 Ke pacl se el sun na pwaye kasrpal, Na toasriyen mwe keok ma el oru inge nufon ac fah putatyang nu facl ac toanilya.

23 Lela elan kang ma nukewa ma el ke kang uh! God El ac fah kael ke kasrkusrak ac folo lal.

24 El fin srike elan kaingkunla cutlass osra uh, Na soko osra in pisr, su muta uh orekla ke bronze, ac fah faksilya.

25 Soko osra in pisr ac fah sasla ke manol; Ac srah kacl uh ac fah tultul ke acn saromrom ke mutun osra uh, Ac el ac arulana tuninfongla.

26 Ma lal nukewa ma el elosak, ac fah kunausyukla; Sie e su tia ma tayak ke poun mwet Ac fah esukulak wi mwet nukewa in lohm sel.

27 Kusrao ac akkalemyela koluk lun mwet se inge, Ac faclu fah orek loh lainul.

28 Sie sronot ac fah pokla mwe kasrup lal nukewa Ke len se ma God El nununku mwet koluk in kasrkusrak lal.

29 “Pa inge safla lun mwet koluk uh, Safla se ma God El nuna akoela nu selos.”