Dagiti Proverbio 23

1 No makisangoka a mangan iti maysa a turay, paliiwem a nasayaat ti adda iti sangoanam,

2 ket mangikabilka iti kampit iti karabukobmo no sika tay tao a pagaayatna ti mangan iti adu a taraon.

3 Saanmo a tarigagayan dagiti naimas a taraon, ta taraon daytoy ti kinaulbod.

4 Saanka nga agtrabaho iti kasta unay tapno bumaknangka; ammom koma no kaanoka nga aginana.

5 No dagita matam ket masisirap iti kuarta, agpukaw daytoy, ket kasla giddato nga iyunnatna dagiti payakna sa tumayab iti tangatang a kasla agila.

6 Saanmo a kankanen ti taraon ti dakes a tao- isu ti tao a nabayagen a kumitkita iti taraonmo- ken saanmo a tarigagayan dagiti naimas a taraonna,

7 ta isuna tay kita iti tao a mangbilbilang ti gatad ti taraon. Kunana kenka, “Manganka ken uminomka!” ngem saan a dayta ti adda iti pusona.

8 Kayatmo pay ketdin nga isarua ti sangabassit a nakanmo, ket sayang laeng ti panagyamanmo kenkuana.

9 Saanmo a kasarsarita ti maag, ta umsiennanto dagiti nasirib a sasaom.

10 Saanmo nga iyakar ti nagkakauna a mohon wenno agumen dagiti talon dagiti ulila,

11 ta napigsa ti Mannubbotda, ket isunanto ti mangirupir iti kalinteganda a maibusor kenka.

12 Ipapusom dagiti sursuro, ken denggem dagiti sasao iti kinasirib.

13 Saanka a bumdeng a mangisuro iti ubing, ta no bautem isuna, saan isuna a matay.

14 No bautem isuna, maisalakanmo ti kararuana manipud iti sheol. (Sheol h7585)

15 Anakko, no nasirib ta pusom, naragsak met ngarud toy pusok;

16 agrag-o toy kaunggak no agisawsawang dagita bibigmo iti nasayaat.

17 Saanmo nga ipalubos nga apalan ta pusom dagiti managbasol, ngem itultuloymo ketdi ti agbuteng kenni Yahweh iti inaldaw.

18 Awan duadua nga adda masakbayan ket saanto a mapukaw ti namnamam.

19 Dumngegka, anakko, ket agbalinka a masirib ken agbiagka iti umno a wagas.

20 Saanka a makikadua kadagiti mammartek, wenno kadagiti narawet a mangan iti karne,

21 ta pumanglawto dagiti mammartek ken narawet, ket agkawesdanto iti rutay rutay.

22 Dengggem ti amam a nangiputot kenka ken saanmo a laisen ti inam inton bumaket isuna.

23 Arigna a gatangem ti kinapudno, ngem saanmo nga ilaklako; arigna a gatangem ti kinasirib, panangisuro ken pannakaawat.

24 Agrag-o iti kasta unay ti ama ti tao nga agar-aramid iti nalinteg, ken agragsak met ti makin-anak iti maysa a masirib nga anak.

25 Maragsakan koma da amam ken inam ken agrag-o koma ti nangisikog kenka.

26 Anakko, itedmo kaniak ta pusom, ket paliiwen koma dagita matam dagiti wagasko.

27 Ta ti maysa a balangkantis ket maiyarig iti nauneg nga abut, ken maiyarig met iti akikid nga abut ti asawa ti sabali pay a lalaki.

28 Aglemlemmeng isuna nga agur-uray a kas iti agtatakaw, ken papaaddoenna ti bilang dagiti nagulib iti sangkataoan.

29 Siasino aya ti kakaasi? Siasino aya ti agladladingit? Siasino aya ti makirangranget? Siasino aya ti agrekreklamo? Siasino aya ti nasugatan nga awan gapgapuna? Siasino aya ti limmablabbaga ti matana?

30 Dagidiay naigamer iti arak, dagidiay agin-inom iti naglalaok nga arak.

31 Saanmo a kitkitaen ti arak no nalabaga daytoy, no rumimat-rimat ti uneg ti kopa ken mayat ti panagaruyotna.

32 Iti udina, kumagat a kasla karasaen ken kumagat a kasla nagita nga uleg.

33 Makakitanto dagiti matam kadagiti karkarna a banbanag, ket agisawangto ta pusom kadagiti saan nga um-umno a banbanag.

34 Agbalinkanto a maysa kadagiti matmaturog kadagiti nangangato a taaw wenno agid-idda kadagiti tali ken kawar ti barko.

35 “Kinabildak!” kunamto, “ngem saanak a nasaktan. Pinang-ordak, ngem diak narikna. Kaanoakto a makariing? Mangbirukak pay iti sabali a mainum.”