< תהילים 81 >

למנצח על-הגתית לאסף ב הרנינו לאלהים עוזנו הריעו לאלהי יעקב 1
שאו-זמרה ותנו-תף כנור נעים עם-נבל 2
תקעו בחדש שופר בכסה ליום חגנו 3
כי חק לישראל הוא משפט לאלהי יעקב 4
עדות ביהוסף שמו-- בצאתו על-ארץ מצרים שפת לא-ידעתי אשמע 5
הסירותי מסבל שכמו כפיו מדוד תעברנה 6
בצרה קראת ואחלצך אענך בסתר רעם אבחנך על-מי מריבה סלה 7
שמע עמי ואעידה בך ישראל אם-תשמע-לי 8
לא-יהיה בך אל זר ולא תשתחוה לאל נכר 9
אנכי יהוה אלהיך-- המעלך מארץ מצרים הרחב-פיך ואמלאהו 10
ולא-שמע עמי לקולי וישראל לא-אבה לי 11
ואשלחהו בשרירות לבם ילכו במועצותיהם 12
לו--עמי שמע לי ישראל בדרכי יהלכו 13
כמעט אויביהם אכניע ועל צריהם אשיב ידי 14
משנאי יהוה יכחשו-לו ויהי עתם לעולם 15
ויאכילהו מחלב חטה ומצור דבש אשביעך 16

< תהילים 81 >