תהילים 140

1 למנצח מזמור לדוד ב חלצני יהוה מאדם רע מאיש חמסים תנצרני

2 אשר חשבו רעות בלב כל-יום יגורו מלחמות

3 שננו לשונם כמו-נחש חמת עכשוב--תחת שפתימו סלה

4 שמרני יהוה מידי רשע-- מאיש חמסים תנצרני אשר חשבו לדחות פעמי

5 טמנו גאים פח לי-- וחבלים פרשו רשת ליד-מעגל מקשים שתו-לי סלה

6 אמרתי ליהוה אלי אתה האזינה יהוה קול תחנוני

7 יהוה אדני עז ישועתי סכתה לראשי ביום נשק

8 אל-תתן יהוה מאויי רשע זממו אל-תפק ירומו סלה

9 ראש מסבי-- עמל שפתימו יכסומו (יכסימו)

10 ימיטו (ימוטו) עליהם גחלים באש יפלם במהמרות בל-יקומו

11 איש לשון בל-יכון בארץ איש-חמס רע--יצודנו למדחפת

12 ידעת (ידעתי)--כי-יעשה יהוה דין עני משפט אבינים

13 אך צדיקים יודו לשמך ישבו ישרים את-פניך