< איוב 35 >

ויען אליהו ויאמר 1
הזאת חשבת למשפט אמרת צדקי מאל 2
כי-תאמר מה-יסכן-לך מה-אעיל מחטאתי 3
אני אשיבך מלין-- ואת-רעיך עמך 4
הבט שמים וראה ושור שחקים גבהו ממך 5
אם-חטאת מה-תפעל-בו ורבו פשעיך מה-תעשה-לו 6
אם-צדקת מה-תתן-לו או מה-מידך יקח 7
לאיש-כמוך רשעך ולבן-אדם צדקתך 8
מרב עשוקים יזעיקו ישועו מזרוע רבים 9
ולא-אמר--איה אלוה עשי נתן זמרות בלילה 10
מלפנו מבהמות ארץ ומעוף השמים יחכמנו 11
שם יצעקו ולא יענה-- מפני גאון רעים 12
אך-שוא לא-ישמע אל ושדי לא ישורנה 13
אף כי-תאמר לא תשורנו דין לפניו ותחולל לו 14
ועתה--כי-אין פקד אפו ולא-ידע בפש מאד 15
ואיוב הבל יפצה-פיהו בבלי-דעת מלין יכבר 16

< איוב 35 >