Solomona 6

1 E KUU keiki, ina e hoohiki oe e panai no kou hoalauna, Ina i pai kou lima me ka malihini,

2 A i puni oe i ka olelo a kou waha, A i punihei oe i ka olelo a kou waha.

3 Ano la, e kuu keiki, e hana oe i keia, i pakele. I kou lilo ana i ka lima o kou hoalauna: O hele, e hoohaabaa ia oe iho, e hoolaulea i kou hoalauna.

4 Mai haawi i ka hiamoe i kou mau maka, Aole hoi e pipili kou mau lihilihi:

5 E hemo aku oe me he dia la mailoko ae o ka lima, A e like hoi me ka manu mai ka lima ae o ke kuhea manu.

6 E ka mea hiamoe, e hele oe i ka anonanona, E nana i kona aoao a e hoonaauao iho:

7 Aohe alii ia ia, Aole haku, aole hoi lunakanawai;

8 Hoahu no oia i kana ai i ke kau, I ka wa e ohi ai, hoiliili oia i kana mea ai.

9 E ka mea hiamoe, pehea ka loibi o kou hiamoe ana? Ahea la oe e ala mai ai mai kou hiamoe ana mai?

10 He moe iki ae, he hiamoe iki ae, He pelu hou iki ae i ka lima a hiamoe:

11 A e hiki mai kou ilihune me he kanaka hele la, A me kou nele e like me ke kanaka kaua.

12 O ke kanaka aia, o ke kanaka hewa, Hele no oia me ka waha hoopunipuni.

13 Iimo oia me ka maka, ao aku oia me ka wawae, Kuhikuhi oia me kona manamanalima;

14 He kolohe no ma kona naau, Noonoo ino oia i na la a pau, Hookonokono oia i ka hakaka.

15 Nolaila, e loohia koke mai oia e ka make; E haihai koke ia oia, aole mea nana e hoola,

16 O keia mau mea eono, he mau mea e inaina mai ai o Iehova; Ehiku hoi e hoopailua ai o kona naau.

17 O na maka kiekie, o ke elelo wahahee, A me na lima hookahe koko hala ole,

18 O ka naau e imi ana i na manao kolohe, A me na wawae e holo kiki ana i ka hewa,

19 O ka mea hoike hoopunipuni e hana ana i ka wahahee, A me ka mea hookonokono i ka hakaka mawaena o na hoahanau.

20 E kuu keiki, e malama oe i ke kanoha a kou makuakane, Mai haalele hoi i ke kanawai o kon makuwahine.

21 E hawele mau oe ia mau mea ma kou naau, E nakii oe ia mau mea ma kou a-i.

22 I kou hele ana, ea, e kai aku ia ia oe; I kou moe ana e kiai oia maluna ou; I kou ala ana iluna, oia ke kamailio pu me oe.

23 No ka mea, he kukui ke kauoha, He malamalama ke kanawai, O ka aoao o ke ola oia ke ao ana e naauao ai:

24 I malamaia oe i ka wahine ino, I ka malihini i hoomalimali me kona elelo.

25 Mai kuko aku i kona maikai maloko o kou naau, Aole hoi e puniheiia e kona mau lihilihi.

26 No ka mea, no ka wahine hookamakama, E nele ke kanaka a i ka apana ai; Hoohalua no ka wahine moe kolohe i ka uhane i minaminaia.

27 E lawe anei ke kanaka i ke ahi ma kona poli, Aole hoi e wela kona kapa?

28 Ina o hele ke kanaka ma na nanahu e aa ana, Aole anei e wela kona kapuwai?

29 Pela ka mea e komo ae ana i ka wahine a kona hoalauna; Aole e aponoia na mea hoopa ia ia.

30 Aole i hoowahawahaia ka aihue i kona aihue ana, Ina he mea ia e maona ai kona pololi.

31 Aka, i loaa oia, e uku pahiku no, E haawi oia i ka waiwai a pau o kona hale.

32 O ka mea moe kolohe me ka wahine, aole ona naauao; O ka make o kona uhane kana i hana'i.

33 E loaa ia ia ka eha a me ka hoowahawahaia mai. Aole hoi o holoiia kona mea e hilahila ai.

34 No ka mea, o ka lili, oia ko ke kanaka mea e ukiuki ai; Aole oia e hoopakele i kona la e hoopai aku ai.

35 Aole oia e manao mai i ka uku; Aole hoi oia o oluolu, ke haawi mai oe i na makana he nui.