Job 26

1 Hatei Job ni a pathung teh,

2 Hnotithainae ka tawn hoeh e teh, bangtelamaw na kabawp, thaonae ka tawn hoeh e kut teh, bangtelamaw na rungngang thai.

3 Lungangnae ka tawn hoeh e teh, bangtelamaw na toun thai, tami moikapap koevah kalan e pouknae hah bangtelamaw na poe thai.

4 Api koe maw lawk teh na pâpho pouh. Apie muitha maw nama koe ka phat.

5 Tami kadout hah a pâyaw teh, tui rahim vah ao teh, haw vah kaawm e naw hoi a pâyaw awh.

6 A hmalah duenae caici lah ao. Rawkphainae ni ramuknae tawn hoeh. (Sheol h7585)

7 Kalvan teh ahrawnghrang dawk a kangdue. Talai hai ahrawnghrang dawk a kâbang.

8 Katha poung e tâmai dawk tui hah mek a racut teh, a rahim e tâmai hah kâbawng awh hoeh.

9 A bawitungkhung e hmalah a ramuk teh, a lathueng vah tâmai a tabo sak.

10 Angnae hoi hmonae langri a ta nahanelah tui dawk a langri a ruen pouh.

11 Kalvan toenae khom a kâhuet teh, a tounnae hah kângai lah a ru.

12 A hnotithainae lahoi tuipui a thaw sak. Bahu lahoi tûilî hah thawk a kapek.

13 A muitha lahoi kalvan a pathoup sak. Kamleng e khorui hai a kut hoi a sak.

14 Khenhaw! hetnaw heh lamthung nueng kamtawngnae doeh. Ahnimouh koe e thai awh e hrolawk teh, banghloimaw a thoung. Hateiteh, keitat hnotithainae hah, apinimaw a panue thai.