Thuchihbu 2

1 Kachapa, kathusei ho na-ngaija, chule kathupeh ho gou banga na chintup jing ding,

2 Chihna thu nakhoh sah jing ding, chule lunggil tah’a thil hetkhen themna nanei ding ahi.

3 Hetgilna dingin peng jah-in, thil hetkhenna nanei thei nadin othong in peng jah in,

4 Dangka banga na hol ding; thil lutah kisel banga nahol ding ahi.

5 Chuteng Pakai gin kiti nahetdoh ding, Pathen hetna jong nanei ding ahi.

6 Ajeh chu chihna hi Pathen thilpeh ahin, Amakam sunga kon hetkhenna hung konji ahi.

7 Milungtheng hodin hetkhen themna apejin, lung limgeh cha lamlha te chunga lum-in apang jitai.

8 Midih ho lampi avetsuipeh in, amakoma kitah ho avengbit jing e.

9 Chuteng nang in adih le thudih chu nahin hetdoh ding, chule lamdih’a chejidan nahin kimu dohding ahi.

10 Ajeh chu nalung sunga chihna hunglut intin, chule hetna lhingset nahin nei ding, hichun nakipa sah ding ahi.

11 Hetkhan them chihna chun nahin venbit ding, hetthemna chun nahoibit ding ahi.

12 Hichun aphalou lampia kon navenbit jing ding, miphalou le milhem chavei hoa kon nahuhdoh ding ahi.

13 Hitobang miho chu lamdih’a kon lamvaija, lamdih lou ajot diu ahi.

14 Amaho thil dihlou jeng bol ding athanom un, chule thil phalou jenga kiman chah athanop piuvin ahi.

15 Amahon atohdoh jouseu aphalou ngan ahin, chule achonnau lamlhah jouse damun jeng ahi.

16 Chihna hin numei phalou akon nahoidoh sah ding, joulhep tothoa tuhchah ding nagot uva kon, nahoidoh thei ding ahi.

17 Hitobang numei hin ajipa adalhah’a chule Pathen henga akitepna jong aheimil ahitai.

18 Hiche numeinu hin a-insunga thina chan alhut ahin, alam lhahna jouse jong damun lam jeng ahi.

19 Ama henga lut pasal tapou mah thah ding, hinna lampi langa lutlou hel ding ahi tauve.

20 Hijeh chun nangman mipha ho lampi najui jing ding, michonpha ho lampi jeng bou najot ding ahi.

21 Ajeh chu Pathen ging hon bou gam sung alo diu, chule mikitah hobou gam sunga cheng diu ahi.

22 Amavang mi lungdih lou ho gam sunga kon kikai doh diu, chule lungthim dihlou ho chu gam sunga kon kipei doh jeng diu ahi.