Matthew 10

1 Jesun aseijui som le ni ho chu akoukhomin chule amaho chu lhagao gilou ho nodoh theina le hivei namkim le natna ho damsah theina thuneina apen ahi. 2 Seijui som le ni ho min: Amasapen, Simon (Peter jong akitin), aban Andrew (Peter sopipa), Jacob (Zebedee chapa), John (Jacob sopipa), 3 Philip, Bartholomew, Thomas, Matthew (kaidongpa ahin), Jacob (Alpheus chapa), Thaddaeus, 4 Simon (Zealot mi) chule Iscariot'a kon Judas (ama matsah a pang), hi chengse hi ahiuve. 5 Jesun seijui som le ni ho hiti hin ahil in: “Nangho chidang namdang ho kom ahilou leh Samaria mite koma che hih-un. 6 Pathen kelngoi mangna Israel te koma bou cheuvin. 7 Chule nache nauva Van gam chu ahung naitai ti phongdoh un. 8 Ana sudamun, mithi kaithouvun, phahvei ho ngimsah un, chule lhagao bohho nodoh un. Man beiya kilah a nahi bangun phaldoh jengun! 9 “Na sumdip uva sum na-konggah uvah Sana, dangka ahilouleh sum goi jeng jong kipoh hih-un. 10 Kholjinna a sakhau jeng jong akop in pohih un, kengchot ho le tenggol jeng jong kiken hih un, chule min najen phat uleh kiphalam hih un, ijeh inem itileh natonga chun aneh ding dol ahi. 11 “Khopi sung hihen, khoneo sung hijongleh nalutnauva chun lhunna theija kilom michu holdoh un chule khosung ho nadalhah kahseuvin hichepa in a chun umun. 12 In nalut tenguleh phattheina chu peuvin. 13 Achang dinga kilom in ahiuleh naphatthei nau chu umden hen; kilom lou In ahiuleh phattheina chu nunglah doh un. 14 Koi insung hihen, ahilouleh khopi sung hijongleh nalamdot lou'uva, ahilouleh nathupoh u angainom lou uleh, na dalhah ding teng uleh nakeng uva vutvai geiyin thing lhauvin. 15 Thutahbeh kaseipeh nahiuve, thutan nikho teng chuleh chutobang khopin athoh ding chu, gitlouna dim khopi teni: Sodom le Gomorrah thoh gamchenga oljo ding ahi. 16 “Veuvin, keiman ngeihon lah a kelngoi tobanga kasol nahiuve. Hiti chun gul ho tobang'in chingthei-jun chule vapal ho tobang'in suhset khoiset neihih un. 17 Hinlah chingtheiyun! Ijeh inem itileh thutanho khut a nahin pehdoh dingu chule kikhopna in-hoa sakol jepna'a nahin jep dingu ahi. 18 Nangho kanungjui nahi jeh uva gamvaipo hole lengho angsunga na chung thu'u kitan ding ahi. Ahin hiche chu vaipoa pangho le atahsan louho henga keima thu nasei theina dingu phat kijentah hung hiding ahi. 19 Amahon nahin mat tengu leh, iti kadonbut ding ham tin lungkham hih un; naseidiu apettah a Pathen in napeh dingu ahi. 20 Ijeh nem itileh thuseija chu nangho hitalouva napau Lhagao chun nanghoa kona thu ahin seidoh ding ahi. 21 “Sopi khat chun asopi chu thi dinga apeh doh ding, apa chun acha tahbeh jong chu apehdoh ding, chule achaten anule pa adou uva chule athasah dingu ahi. 22 Chule nanghon keima nung najuijeh uva nam jousen nahin hotbol dingu ahi. Hijongleh achaina geiya thoh lhung jou chengse bou chu huhhing hi ding ahiuve. 23 Nangho khopi khat abol hesohna nato tenguleh, aban khoa jam lut un. Thutahbeh kaseipeh nahiuve, Israel kho jouse naphah masang'uva Mihem Chapa hi hung ding ahi. 24 “Ahil-uva pangpa sangin akihil ho alenjo ngaipoi, chule soh ho jong apu sangin alenjo pouve! 25 Akihil ho chu ahilpau to abah uva chule soh ho jong apu uto abah diu chu phaset a ahi. Chule keima insung pumpi neipa bon lhagao bohho lengpa eitiuva ahileh ka-insung mite jouse chu hisanga phamo joa akou dingu ahi. 26 “Hijongleh nagih uva pangho chu kicha hihbeh un. Ajeh chu akiselguh jouse kiphondoh phat hung lhug ding ahi. Chule aguh a kisel jouse jong mijouse het a um ding ahi. 27 Tua keiman muthim lah a kasei hi kho ahungvah tengleh lhang phonga kiphongdoh ding ahi. Keiman nakoluva othola kasei hi mi jouse jah dinga in-chunga kisam doh ding ahi! 28 “Natahsau that go ho kicha hih un, amahon na lhagao atongkha thei pouve. Pathen bou gingun, Ama chun na lhagao le na tahsau asuhmang theichule damuna akoithei ahi. (Geenna g1067) 29 Inva nin ijat amat na het-em? Paisa khat man bou ahi. Hinlah inva khat jeng jong napau hetlouva leiseta lhalou ahi. 30 Chule nalu uva nasamjang'u geiya kisima ahi. 31 Hijeh chun kicha hih un, inva ho abonchauva sanga manlu joa nahiuve. 32 “Hiche leiset chunga Keima mipiho lah a eiphongdoh a chu, Keiman jong vana Kapa ang sunga Kaphondoh ding ahi. 33 Hinlah hiche leiset chunga hi koi hijongleh eiseilep chan chu Vana um Kapa angsunga jong kaseilep ding ahi. 34 “Keima leiset a hi chamna hinpo lut dingin nei gel hih un! Keima chamna poa hung hijo louvin, chemjam joh kahinpoh ahi. 35 ‘Mikhat chun apa adou ding chule achanu chun anu adou ding, chule mounutah chun atehpi adou dinga hunga kahi, 36 namelmateu chu na-insungmi ho lah a kona hiding ahi.’ 37 “Nangman napa ahilouleh nanu chu keima sanga nangailut joh ahileh, nangma keiya hidinga kiloma nahipoi; ahilou jongleh nachapa ahilouleh nachanu chu keima sanga nangailut joh'a ahileh, nangma keiya hidinga kiloma nahipoi. 38 Thingpel chu nakilah a chule kiput ding nanop louva ahileh, keiya hidinga kiloma nahipoi. 39 Nahinna nakikol chah a ahileh namansah ding; hinlah nangman keima dinga nahinna chu napeh doh jenga ahileh, nakimu ding ahi. 40 “Nangma nasanga chun keima eisan ahi, chule keima eisanga chun, eisola Pachu asan ahi. 41 Nangman themgao khat chu Pathena dinga thuseiphong ahi chu nasana ahileh, themgao khat hina a kipaman chu nasan ding ahi. Chule nangman mihong phal ho chu achonphat jeh uva nasana ahileh, nangman jong amahoa tobang kipaman namu ding ahi. 42 Chule nangman twi-dap khon khat kanungjui ho lah a aneopen jeng jong napeh a ahileh, nangman kipaman namutei ding ahi.” ati.