< Job 32 >

1 Job in nolna bei kahi tia apanchah kheh phat in aloi agolte thumho chun donbut be ding anom tapouve. 2 Hichun Ram phunga Buz mi Barakel chapa Elihu chu ahung lunghang tai. Job in chonset kana bol nai chuleh Pathen in eigim bolna hi adih e ti ding anop lou jeh a lunghangah ahi. 3 Job in anel nau adonbut thei uva Pathen joh chu dihmo dinga akilah jeh uva Job loile golte thum chunga jong kinga ahi. 4 Elihun adangho Job koma thu asei diu chu anga nga jeng ahi. Ijeh inem itile amaho chu ama sanga upajo ahiuve. 5 Ahinlah amahon adonbut be tahlou u amu phat in lunghang tah in ahung paodoh e. 6 Buz mi Barakel chapa Elihun aseitai. Keima khangdong kahin nangho upa nahiuve. Hijeh a chu nangho komma kalunggel kasei ding chu kakhongai ahi. 7 Keigel in ateh jep hon thu seiju hen, ijeh inem itile upa ho a hi chihna hung ahi. 8 Ahin mihem te sunga chu lhagao um ahi. Hatchungnungpa hu haikhuma amaho sunga um hiche chun achihsah u ahi. 9 Phatkhat tengle upa ho jong aching ji pouve. Khatvei vei teng thutan dihje ahe pouve. 10 Hijeh chun kasei ngaijun chuleh kalunggel seipeh uvinge. 11 Keiman nang thusei phat hitih chan sung hin kahin ngah in nakinel nahou lunglut tah in kahin ngaijin, khomulouva nathusei doh hou kangaije. 12 Nathusei hou kangaije, ahin khat chan jong nanel thei pouve. Ahiloule aminelna nadonbut thei pouve. 13 Amapa hi eiho dingin aching beh seh e, Pathen bouvin ama ajo ding ahi tin kakoma sei hih un. 14 Job chun keima einel hihen hileh nanghon namanchah u hettheina bangin donbut ponge. 15 Seibe ding helouva lunggimma tou nahiuve. 16 Tua nangho thipbeh a naum bang uva hi ken kanga nga nahlai dingu ham? Keijong thipbeh a kaum jing ding ham? 17 Ahipoi halkhat beh kaseija kalunggel kasei ding ahi. 18 Ijeh inem itile, kalung in adol joulou thu cheng tampi ho seidoh hi kasunga ka lhagaovin seidoh dingin eino tuntun e. 19 Keima ahom umlou jubom tobang kahin, jupohna thah pohkeh ding sa tobang kahi. 20 Kalung ol theina dinga kasei ding ahi. Hijeh chun ka donbutna penge. 21 Kadei tah in jong kichem ponge, ahiloule koimacha pachat lhem bol ponge. 22 Keiman joulhep ding kagot a ahile eisempan gangtah in eisumang jeng hen.

< Job 32 >