Job 13

1 Khenah, hae hmuennawk hae ka mik mah hnuk boeh; ka naa mah thaih moe, panoek boeh.

2 Na panoek ih hmuen to, ka panoek toeng; nang pongah ka hnaem kue ai.

3 Toe Thacak Sithaw khaeah ka thuih moe, Sithaw hoi angaek hanah ka koeh.

4 Toe nangcae loe amsawnlok thui kami, tidoeh avang ai siboi ah ni na oh o.

5 Lok apae ai ah na oh o duem nahaeloe, nangmacae palunghahaih ah om tih.

6 Ka thuih han ih lok to tahngai oh loe, pahni hoiah ka thuih han ih lok hae tahngai oh.

7 Sithaw kasae na thuih o han maw? Anih to na ling o han maw?

8 Anih mikhmai maw na khet o han? Sithaw han lok na aek pae o han maw?

9 Anih mah ang khet o naah hoih, tiah thui tih maw? Kami aling baktiah Sithaw to aling thai maw?

10 Tamquta hoi mikhmai na khet o nahaeloe, anih mah na thuitaek o tih.

11 A lensawkhaih loe nang han zitthok ai maw? Anih zit thohhaih na nuiah krah mak ai maw?

12 Nangcae panoek thaihaih loe maiphu baktiah ni oh, nangcae abuephaih ahmuen doeh long hoiah sak ih abuephaih ah ni oh.

13 Anghngai o duem ah, lok ka thuih han vop; to pacoengah kawbaktih hmuen doeh ka nuiah pha nasoe.

14 Toe kai loe ka ngan hae kaek moe, ka hinghaih hae ban hoi ka sin han.

15 Anih mah kai na hum cadoeh, a nuiah oephaih ka tawn vop tih; a hmaa ah zae loihhaih lok to ka thuih han vop.

16 Anih loe kai pahlonghaih ah om tih; amoek kaminawk loe a hmaa ah angzo o mak ai.

17 Ka lok hae palung tang hoi tahngai oh; ka thuih ih lok hae naa patueng oh.

18 Khenah, vaihi kaimah kawng taphong hanah ka oh coek, ka zaehaih loih tih boeh, tiah ka panoek.

19 Mi mah maw kai hae zaehaih net tang tih? To tiah zaehaih na net nahaeloe, lok apae ai ah kang hngai duem moe, ka duek halat han boeh.

20 Hmuen hnetto khue ni kang hnik; nang paek nahaeloe na hmaa hoiah kang hawk ving mak ai.

21 Kai khae hoi na ban to azuk ving ah, na zitthohhaih hoiah na pazih hmah.

22 To pacoengah na kawk ah, kang pathim han; to tih ai boeh loe kai ka thuih hmaloe han, to pacoengah nang mah pathim ah.

23 Ka sakpazaehaih hoi zaehaih nazetto maw oh? Ka sakpazaehaih hoi ka zaehaih to na patuek ah.

24 Tipongah mikhmai na hawk moe, na misa ah nang suek loe?

25 Takhi mah hmuh ih thingqam to na zit maw? Kangqo thingqam to na patom han maw?

26 Kakhaa parai ka zaehaih to na pakuem moe, thendoeng nathuem ah ka sak ih zaehaih atho to vaihi kai han nang tongsak boeh.

27 Ka khok ah thlong nang thuk moe, ka caehhaih loklamnawk boih to na khet; ka cawh ih khokkong doeh na parui boih.

28 To tiah raihaih tongh kami loe, kaqong hmuen baktih, karaa mah caak ih laihaw kaprawn baktiah, thazok moe, anghmat zuep boeh.