< Mga Salmo 115 >

1 Dili alang kanamo, Yahweh, dili alang kanamo, apan alang sa imong ngalan ang pasidungog, tungod sa imong matinud-anon nga kasabotan ug sa imong pagkamasaligan. 2 Nganong misulti man ang kanasoran, “Asa man ang ilang Dios?” 3 Ang among Dios anaa sa langit; buhaton niya ang bisan unsa nga makapahimuot kaniya. 4 Ang diosdios sa kanasoran hinimo sa plata ug bulawan, hinimo sa kamot sa mga tawo. 5 Kadto nga mga diosdios adunay mga baba, apan dili (sila) makasulti; aduna silay mga mata, apan dili (sila) makakita; 6 aduna silay mga dalunggan, apan dili (sila) makadungog; aduna silay mga ilong, apan dili (sila) makasimhot. 7 Kadto nga mga diosdios adunay mga kamot, apan dili (sila) makabati; aduna silay tiil, apan dili (sila) makalakaw; dili gani (sila) makasulti pinaagi sa ilang mga baba. 8 Kadtong naghimo kanila sama kanila, lakip usab kadtong tanan nga nagsalig kanila. 9 Israel, salig kang Yahweh; siya ang inyong tabang ug taming. 10 Panimalay ni Aaron, salig kang Yahweh, siya ang inyong tabang ug taming. 11 Kamo nga nagtahod kang Yahweh, salig kaniya; siya ang inyong tabang ug taming. 12 Gibantayan kita ni Yahweh ug panalanginan kita niya; panalanginan niya ang pamilya ni Israel; panalanginan niya ang panimalay ni Aaron. 13 Panalanginan niya kadtong nagtahod kaniya, bata man o tigulang. 14 Hinaot nga padaghanon kamo ni Yahweh sa hilabihan, kamo ug ang inyong kaliwatan'. 15 Hinaot nga panalanginan kamo ni Yahweh, nga nagbuhat sa langit ug yuta. 16 Ang kalangitan gipanag-iyahan ni Yahweh; apan ang kalibotan iyang gihatag sa katawhan. 17 Ang mga patay dili magdayeg kang Yahweh, ni bisan kinsa niadtong mopaubos padulong sa kamingawan; 18 apan among dayegon si Yahweh karon ug sa walay kataposan. Dalaygon si Yahweh.

< Mga Salmo 115 >