Psalms 124

1 Nkunga Davidi wunyimbudulu mu nzila yikuendila ku nzo Yave. Bika Iseli katuba: Enati Yave kasia ba ku ndambu'eto ko;

2 Enati Yave kasia ba ku ndambu eto ko mu thangu batu batelama mu kutunuanisa;

3 mu thangu nganzi awu yitubuila, keti nganu mina batumina bamoyo;

4 khuka nlangu yitumbu kutuvitumuna ayi nguma yi nlangu yitudiamisa,

5 minlangu mi nguma mitulalumuna.

6 Nzitusu wuba kuidi Yave mutu wowo wukambu kutuyekula batukanzuna mu meno ma miunu miawu.

7 Tutina banga nuni bu keti tinina mu dikondi di ntambi wu zinuni. Dikondi dikanzuka ayi beto tutina.

8 Lusadusu lueto luidi mu dizina di Yave, mvangi wu diyilu ayi ntoto.