೧ ಕರಿನ್ಥಿನಃ 11

1 ಹೇ ಭ್ರಾತರಃ, ಯೂಯಂ ಸರ್ವ್ವಸ್ಮಿನ್ ಕಾರ್ಯ್ಯೇ ಮಾಂ ಸ್ಮರಥ ಮಯಾ ಚ ಯಾದೃಗುಪದಿಷ್ಟಾಸ್ತಾದೃಗಾಚರಥೈತತ್ಕಾರಣಾತ್ ಮಯಾ ಪ್ರಶಂಸನೀಯಾ ಆಧ್ಬೇ|

2 ತಥಾಪಿ ಮಮೈಷಾ ವಾಞ್ಛಾ ಯದ್ ಯೂಯಮಿದಮ್ ಅವಗತಾ ಭವಥ,

3 ಏಕೈಕಸ್ಯ ಪುರುಷಸ್ಯೋತ್ತಮಾಙ್ಗಸ್ವರೂಪಃ ಖ್ರೀಷ್ಟಃ, ಯೋಷಿತಶ್ಚೋತ್ತಮಾಙ್ಗಸ್ವರೂಪಃ ಪುಮಾನ್, ಖ್ರೀಷ್ಟಸ್ಯ ಚೋತ್ತಮಾಙ್ಗಸ್ವರೂಪ ಈಶ್ವರಃ|

4 ಅಪರಮ್ ಆಚ್ಛಾದಿತೋತ್ತಮಾಙ್ಗೇನ ಯೇನ ಪುಂಸಾ ಪ್ರಾರ್ಥನಾ ಕ್ರಿಯತ ಈಶ್ವರೀಯವಾಣೀ ಕಥ್ಯತೇ ವಾ ತೇನ ಸ್ವೀಯೋತ್ತಮಾಙ್ಗಮ್ ಅವಜ್ಞಾಯತೇ|

5 ಅನಾಚ್ಛಾದಿತೋತ್ತಮಾಙ್ಗಯಾ ಯಯಾ ಯೋಷಿತಾ ಚ ಪ್ರಾರ್ಥನಾ ಕ್ರಿಯತ ಈಶ್ವರೀಯವಾಣೀ ಕಥ್ಯತೇ ವಾ ತಯಾಪಿ ಸ್ವೀಯೋತ್ತಮಾಙ್ಗಮ್ ಅವಜ್ಞಾಯತೇ ಯತಃ ಸಾ ಮುಣ್ಡಿತಶಿರಃಸದೃಶಾ|

6 ಅನಾಚ್ಛಾದಿತಮಸ್ತಕಾ ಯಾ ಯೋಷಿತ್ ತಸ್ಯಾಃ ಶಿರಃ ಮುಣ್ಡನೀಯಮೇವ ಕಿನ್ತು ಯೋಷಿತಃ ಕೇಶಚ್ಛೇದನಂ ಶಿರೋಮುಣ್ಡನಂ ವಾ ಯದಿ ಲಜ್ಜಾಜನಕಂ ಭವೇತ್ ತರ್ಹಿ ತಯಾ ಸ್ವಶಿರ ಆಚ್ಛಾದ್ಯತಾಂ|

7 ಪುಮಾನ್ ಈಶ್ವರಸ್ಯ ಪ್ರತಿಮೂರ್ತ್ತಿಃ ಪ್ರತಿತೇಜಃಸ್ವರೂಪಶ್ಚ ತಸ್ಮಾತ್ ತೇನ ಶಿರೋ ನಾಚ್ಛಾದನೀಯಂ ಕಿನ್ತು ಸೀಮನ್ತಿನೀ ಪುಂಸಃ ಪ್ರತಿಬಿಮ್ಬಸ್ವರೂಪಾ|

8 ಯತೋ ಯೋಷಾತಃ ಪುಮಾನ್ ನೋದಪಾದಿ ಕಿನ್ತು ಪುಂಸೋ ಯೋಷಿದ್ ಉದಪಾದಿ|

9 ಅಧಿಕನ್ತು ಯೋಷಿತಃ ಕೃತೇ ಪುಂಸಃ ಸೃಷ್ಟಿ ರ್ನ ಬಭೂವ ಕಿನ್ತು ಪುಂಸಃ ಕೃತೇ ಯೋಷಿತಃ ಸೃಷ್ಟಿ ರ್ಬಭೂವ|

10 ಇತಿ ಹೇತೋ ರ್ದೂತಾನಾಮ್ ಆದರಾದ್ ಯೋಷಿತಾ ಶಿರಸ್ಯಧೀನತಾಸೂಚಕಮ್ ಆವರಣಂ ಧರ್ತ್ತವ್ಯಂ|

11 ತಥಾಪಿ ಪ್ರಭೋ ರ್ವಿಧಿನಾ ಪುಮಾಂಸಂ ವಿನಾ ಯೋಷಿನ್ನ ಜಾಯತೇ ಯೋಷಿತಞ್ಚ ವಿನಾ ಪುಮಾನ್ ನ ಜಾಯತೇ|

12 ಯತೋ ಯಥಾ ಪುಂಸೋ ಯೋಷಿದ್ ಉದಪಾದಿ ತಥಾ ಯೋಷಿತಃ ಪುಮಾನ್ ಜಾಯತೇ, ಸರ್ವ್ವವಸ್ತೂನಿ ಚೇಶ್ವರಾದ್ ಉತ್ಪದ್ಯನ್ತೇ|

13 ಯುಷ್ಮಾಭಿರೇವೈತದ್ ವಿವಿಚ್ಯತಾಂ, ಅನಾವೃತಯಾ ಯೋಷಿತಾ ಪ್ರಾರ್ಥನಂ ಕಿಂ ಸುದೃಶ್ಯಂ ಭವೇತ್?

14 ಪುರುಷಸ್ಯ ದೀರ್ಘಕೇಶತ್ವಂ ತಸ್ಯ ಲಜ್ಜಾಜನಕಂ, ಕಿನ್ತು ಯೋಷಿತೋ ದೀರ್ಘಕೇಶತ್ವಂ ತಸ್ಯಾ ಗೌರವಜನಕಂ

15 ಯತ ಆಚ್ಛಾದನಾಯ ತಸ್ಯೈ ಕೇಶಾ ದತ್ತಾ ಇತಿ ಕಿಂ ಯುಷ್ಮಾಭಿಃ ಸ್ವಭಾವತೋ ನ ಶಿಕ್ಷ್ಯತೇ?

16 ಅತ್ರ ಯದಿ ಕಶ್ಚಿದ್ ವಿವದಿತುಮ್ ಇಚ್ಛೇತ್ ತರ್ಹ್ಯಸ್ಮಾಕಮ್ ಈಶ್ವರೀಯಸಮಿತೀನಾಞ್ಚ ತಾದೃಶೀ ರೀತಿ ರ್ನ ವಿದ್ಯತೇ|

17 ಯುಷ್ಮಾಭಿ ರ್ನ ಭದ್ರಾಯ ಕಿನ್ತು ಕುತ್ಸಿತಾಯ ಸಮಾಗಮ್ಯತೇ ತಸ್ಮಾದ್ ಏತಾನಿ ಭಾಷಮಾಣೇನ ಮಯಾ ಯೂಯಂ ನ ಪ್ರಶಂಸನೀಯಾಃ|

18 ಪ್ರಥಮತಃ ಸಮಿತೌ ಸಮಾಗತಾನಾಂ ಯುಷ್ಮಾಕಂ ಮಧ್ಯೇ ಭೇದಾಃ ಸನ್ತೀತಿ ವಾರ್ತ್ತಾ ಮಯಾ ಶ್ರೂಯತೇ ತನ್ಮಧ್ಯೇ ಕಿಞ್ಚಿತ್ ಸತ್ಯಂ ಮನ್ಯತೇ ಚ|

19 ಯತೋ ಹೇತೋ ರ್ಯುಷ್ಮನ್ಮಧ್ಯೇ ಯೇ ಪರೀಕ್ಷಿತಾಸ್ತೇ ಯತ್ ಪ್ರಕಾಶ್ಯನ್ತೇ ತದರ್ಥಂ ಭೇದೈ ರ್ಭವಿತವ್ಯಮೇವ|

20 ಏಕತ್ರ ಸಮಾಗತೈ ರ್ಯುಷ್ಮಾಭಿಃ ಪ್ರಭಾವಂ ಭೇಜ್ಯಂ ಭುಜ್ಯತ ಇತಿ ನಹಿ;

21 ಯತೋ ಭೋಜನಕಾಲೇ ಯುಷ್ಮಾಕಮೇಕೈಕೇನ ಸ್ವಕೀಯಂ ಭಕ್ಷ್ಯಂ ತೂರ್ಣಂ ಗ್ರಸ್ಯತೇ ತಸ್ಮಾದ್ ಏಕೋ ಜನೋ ಬುಭುಕ್ಷಿತಸ್ತಿಷ್ಠತಿ, ಅನ್ಯಶ್ಚ ಪರಿತೃಪ್ತೋ ಭವತಿ|

22 ಭೋಜನಪಾನಾರ್ಥಂ ಯುಷ್ಮಾಕಂ ಕಿಂ ವೇಶ್ಮಾನಿ ನ ಸನ್ತಿ? ಯುಷ್ಮಾಭಿ ರ್ವಾ ಕಿಮ್ ಈಶ್ವರಸ್ಯ ಸಮಿತಿಂ ತುಚ್ಛೀಕೃತ್ಯ ದೀನಾ ಲೋಕಾ ಅವಜ್ಞಾಯನ್ತೇ? ಇತ್ಯನೇನ ಮಯಾ ಕಿಂ ವಕ್ತವ್ಯಂ? ಯೂಯಂ ಕಿಂ ಮಯಾ ಪ್ರಶಂಸನೀಯಾಃ? ಏತಸ್ಮಿನ್ ಯೂಯಂ ನ ಪ್ರಶಂಸನೀಯಾಃ|

23 ಪ್ರಭುತೋ ಯ ಉಪದೇಶೋ ಮಯಾ ಲಬ್ಧೋ ಯುಷ್ಮಾಸು ಸಮರ್ಪಿತಶ್ಚ ಸ ಏಷಃ|

24 ಪರಕರಸಮರ್ಪಣಕ್ಷಪಾಯಾಂ ಪ್ರಭು ರ್ಯೀಶುಃ ಪೂಪಮಾದಾಯೇಶ್ವರಂ ಧನ್ಯಂ ವ್ಯಾಹೃತ್ಯ ತಂ ಭಙ್ಕ್ತ್ವಾ ಭಾಷಿತವಾನ್ ಯುಷ್ಮಾಭಿರೇತದ್ ಗೃಹ್ಯತಾಂ ಭುಜ್ಯತಾಞ್ಚ ತದ್ ಯುಷ್ಮತ್ಕೃತೇ ಭಗ್ನಂ ಮಮ ಶರೀರಂ; ಮಮ ಸ್ಮರಣಾರ್ಥಂ ಯುಷ್ಮಾಭಿರೇತತ್ ಕ್ರಿಯತಾಂ|

25 ಪುನಶ್ಚ ಭೇಜನಾತ್ ಪರಂ ತಥೈವ ಕಂಸಮ್ ಆದಾಯ ತೇನೋಕ್ತಂ ಕಂಸೋಽಯಂ ಮಮ ಶೋಣಿತೇನ ಸ್ಥಾಪಿತೋ ನೂತನನಿಯಮಃ; ಯತಿವಾರಂ ಯುಷ್ಮಾಭಿರೇತತ್ ಪೀಯತೇ ತತಿವಾರಂ ಮಮ ಸ್ಮರಣಾರ್ಥಂ ಪೀಯತಾಂ|

26 ಯತಿವಾರಂ ಯುಷ್ಮಾಭಿರೇಷ ಪೂಪೋ ಭುಜ್ಯತೇ ಭಾಜನೇನಾನೇನ ಪೀಯತೇ ಚ ತತಿವಾರಂ ಪ್ರಭೋರಾಗಮನಂ ಯಾವತ್ ತಸ್ಯ ಮೃತ್ಯುಃ ಪ್ರಕಾಶ್ಯತೇ|

27 ಅಪರಞ್ಚ ಯಃ ಕಶ್ಚಿದ್ ಅಯೋಗ್ಯತ್ವೇನ ಪ್ರಭೋರಿಮಂ ಪೂಪಮ್ ಅಶ್ನಾತಿ ತಸ್ಯಾನೇನ ಭಾಜನೇನ ಪಿವತಿ ಚ ಸ ಪ್ರಭೋಃ ಕಾಯರುಧಿರಯೋ ರ್ದಣ್ಡದಾಯೀ ಭವಿಷ್ಯತಿ|

28 ತಸ್ಮಾತ್ ಮಾನವೇನಾಗ್ರ ಆತ್ಮಾನ ಪರೀಕ್ಷ್ಯ ಪಶ್ಚಾದ್ ಏಷ ಪೂಪೋ ಭುಜ್ಯತಾಂ ಕಂಸೇನಾನೇನ ಚ ಪೀಯತಾಂ|

29 ಯೇನ ಚಾನರ್ಹತ್ವೇನ ಭುಜ್ಯತೇ ಪೀಯತೇ ಚ ಪ್ರಭೋಃ ಕಾಯಮ್ ಅವಿಮೃಶತಾ ತೇನ ದಣ್ಡಪ್ರಾಪ್ತಯೇ ಭುಜ್ಯತೇ ಪೀಯತೇ ಚ|

30 ಏತತ್ಕಾರಣಾದ್ ಯುಷ್ಮಾಕಂ ಭೂರಿಶೋ ಲೋಕಾ ದುರ್ಬ್ಬಲಾ ರೋಗಿಣಶ್ಚ ಸನ್ತಿ ಬಹವಶ್ಚ ಮಹಾನಿದ್ರಾಂ ಗತಾಃ|

31 ಅಸ್ಮಾಭಿ ರ್ಯದ್ಯಾತ್ಮವಿಚಾರೋಽಕಾರಿಷ್ಯತ ತರ್ಹಿ ದಣ್ಡೋ ನಾಲಪ್ಸ್ಯತ;

32 ಕಿನ್ತು ಯದಾಸ್ಮಾಕಂ ವಿಚಾರೋ ಭವತಿ ತದಾ ವಯಂ ಜಗತೋ ಜನೈಃ ಸಮಂ ಯದ್ ದಣ್ಡಂ ನ ಲಭಾಮಹೇ ತದರ್ಥಂ ಪ್ರಭುನಾ ಶಾಸ್ತಿಂ ಭುಂಜ್ಮಹೇ|

33 ಹೇ ಮಮ ಭ್ರಾತರಃ, ಭೋಜನಾರ್ಥಂ ಮಿಲಿತಾನಾಂ ಯುಷ್ಮಾಕಮ್ ಏಕೇನೇತರೋಽನುಗೃಹ್ಯತಾಂ|

34 ಯಶ್ಚ ಬುಭುಕ್ಷಿತಃ ಸ ಸ್ವಗೃಹೇ ಭುಙ್ಕ್ತಾಂ| ದಣ್ಡಪ್ರಾಪ್ತಯೇ ಯುಷ್ಮಾಭಿ ರ್ನ ಸಮಾಗಮ್ಯತಾಂ| ಏತದ್ಭಿನ್ನಂ ಯದ್ ಆದೇಷ್ಟವ್ಯಂ ತದ್ ಯುಷ್ಮತ್ಸಮೀಪಾಗಮನಕಾಲೇ ಮಯಾದೇಕ್ಷ್ಯತೇ|