< Markus 11 >
1 Lele' ara deka ro kota Yerusalem, ara losa kambo' rua, nara na Betfage no Betania, sia Lete' Saitun suu na. Mia naa Yesus se rahani mbei'. De Ana haitua mana tungga na rua lao ra'ahulu'.
2 Ana denu nae, “Hei ru'a nggi mi'ihulu' misi' kambo' naa. Mete ma hei losa, hei mita keledei ana' esa, mana pa'a' sia naa. Atahori nda fe'e sae rita e sa. Hei mi sefi hendi tali na fo lea mendi e nema.
3 Te mete ma atahori ratane hei rae, ‘Ta'o bee de hei sefi mendi keledei naa?’ hei musi mitaa mae, ‘Lamatua' nae pake. Mete ma pake basa na, Ana fee bali' e'.’”
4 Basa ma, atahori karua' ra reu, boe ma rita keledei ana' nene pa'a' sia ume sa mata' sia dala' a bob'oa na. Ara sefi rendi e.
5 Te atahori mana sia nara, ratane rae, “He! Ta'o bee de hei sefi mendi atahori keledei naa?”
6 Rataa rae, “Hai Lamatua ma nae pake. Mete ma Ana pake basa, hai mendi bali' e.” Boe ma atahori naa ra lao hela se nore rendi keledei a.
7 Ara nore rendi nisi' Yesus. Basa de, ara laka' lafe nara neu keledei a, de Yesus sae.
8 Lele' ara rae losa kota rala, atahori nae' ha'i rala lafe nara, de bela neu dala'. Hambu ruma reu tati hau palam roo' mia dala' bife na, de bela neu dala' talad'an. Ara tao ta'o naa, fo dad'i tatanda' rae sira simbo Lamatua' Yesus no had'at. Ona' a sira simbo atahori monae nara boe.
9 Boe ma atahori ruma lao ra'ahulu' Yesus, no ruma ra'ab'uit. De ara eki randu rae, “Hosana! Hai koa-kio Lamatualain! Lamatualain na'onda' pala-banggi fee atahori mana nema pake Lamatualain nara na, huu Lamatualain mana denu E!
10 Hosana! Hai koa-kio Lamatualain! Huu Lamatualain nae nafefela bali' Mane Daud parenda na! Hosana! Hai koa-kio Lamatualain! Huu Lamatualain endo' parenda mema' ena, sia lalai naru ata!”
11 Losa kota rala, Yesus se reu risi' Ume Hule-o'e Huu' nembeleo na. Yesus mete matalolole ndule basa mamana' naa. Te na'e a hatu' ena, de ara lao bali' risi' kambo Betania.
12 Mbila fefetu na, ara lao hela Betania de bali' risi' kota Yerusalem. Mia dala' talad'an, Yesus named'a ndoe.
13 Ana nita hau huu' esa mia dala' bife na. Atahori biasa raa boa na. De Yesus neu deka-deka hau huu naa, nae mete sob'a hambu boa', do hoko'. Losa hau huu' naa, Ana nda nita saa-saa sa' bee. Te mema' nda fai nab'oa na sa. Ana fe'e nae naroo naa.
14 Boe ma Yesus ola' fee hau huu' naa nae, “Ho nda fee boa ma neu Au sa, de mia fai' ia, ho nda bisa fee boa ma neu atahori laen sa!” Mana tungga nara rena Ana ola' nahere' ta'o naa. (aiōn )
15 Basa ma ara lao rakandoo, losa Yerusalem, boe ma Yesus neu selu' nisi' Ume Hule-o'e Huu na. Sia Ume Hule-o'e a nembeleo na, atahori tao dad'i pasar, fo raseo' mbui lunda fo atahori tao neu tutunu-hohotu'. Nita ta'o naa boe, Yesus neu oi hendi se. Ana timba lenggu-babara hendi mei-mei fo ara pake tukar doi', ma timba hendi banggu-banggu fo ara pake raseo' neu mbui' ra.
16 Ana o na'angge basa atahori fo nda bole ha'i rendi sira saa-saa nara fo lao nggero tungga nembeleo naa sa.
17 Boe ma Ana nanori se nae, “Hei mihine mema' saa fo Lamatualain mana dui-b'engga nara sura' hela rae, ‘Au ufefela Au Ume ngga ia fo atahori mia basa nusa' ra rema hule-o'e sia ia.’ Te hei tao mala Ume ia dad'i neu na'o ra mamana ne'eb'ue na!”
18 Lele' malangga agama ra ro meser agama ra rena Yesus tao ta'o naa ena, ara ramanasa E, de sangga dala' fo rae risa E. Te ara o hia boe, huu atahori nae' hii a rena nanori na.
19 Lele' relo a nae mopo, boe ma Yesus se lao hela kota Yerusalem, de bali' reu sunggu' sia kambo Betania.
20 Mbila fefetu ana na ma, Yesus se bali' risi' Yerusalem. Mia dala' talad'an ara tungga bali' hau afis a. Mana tungga nara kakaler, huu hau naa mate meto losa oka-oka na. Boe ma Petrus nasaned'a Yesus o'ola naa afis a. Nafad'e nae, “Papa! Mete dei! Hau fo afis a Papa ndoondoon a, mate ena!”
21
22 Yesus nataa nae, “Mema' teb'e! Sad'i hei mimihere Lamatualain ta'o naa boe.
23 Mete ma hei mimihere teb'e-teb'e', hei bisa denu lete' esa lali tasi' rala neu. Boe ma Lamatualain fee lete' naa lali, sad'i hei afi' mimihere mo rala mana banggi'! Hei musi mimihere teb'e-teb'e' neu Lamatualain.
24 Afi' lili'! Sad'i hei mimihere teb'e-teb'e' Lamatualain bisa fee saa fo hei mo'e, naa, Ana fee hei!
25 Te mete ma hei hule-o'e, te hei esa rala na nda malole' no atahori laen sa, eni musi malolole no atahori naa dei. Ta'o naa, dei fo hei Papa ma sia sorga nau tao nameu hei sala mara.
26 [Mete ma hei esa mimbed'a rala', no nda nau fee ambon neu atahori sa, hei Papa ma sia sorga boe o nda fee ambon neu hei sala mara sa.”]
27 Basa boe ma, ara lao' rakandoo. Losa Yerusalem, ara maso' bali' risi' Ume Hule-o'e Huu' a. Lele' ara maso' losa nembeleon naa, malangga agama ra ro meser agama ra rema,
28 de ratane Yesus rae, “Seka denu Nggo uma mumue mia ia afis a? Seka fee Nggo hak!”
29 Te Yesus nahine sira sangga dala' fo rae ra'atutud'a E. Basa ma Ana nataa nae, “Au o ae utane hei bee. Hei mitaa Au, dei fo Au utaa hei.
30 Au utane ta'o ia: Basa hei mihine Yohanis, Mana Sarani' naa, do? Seka denu e fo sarani atahori? Lamatualain, do atahori?”
31 Boe ma ara dud'u'a neu-nema, no rala' esa rae, “Awe! Dai hita ena! Mete ma hita tataa tae, ‘Lamatualain mana denu’, naa, Ana nataa nae, ‘Mete ma ta'o naa, saa de hei nda mimihere Yohanis sa!’
32 Te hita o nda bisa tae ‘atahori mana denu’ sa. Te basa atahori ra ramue. Huu ara ramahere rae Yohanis naa, Lamatualain mana dui-b'engga na.”
33 Basa de rataa rae, “Hai nda mihine sa!” Boe ma Yesus nataa bali' nae, “Mete ma ta'o naa, Au o nda nau ufad'e seka mana denu Au sa bee.”
