Lukas 9

1 Lao esa, Yesus na'ab'ue ana ded'enun atahori sanahulu rua. Boe ma Ana fee se koasa fo reu oi nitur ra, ma tao rahai' atahori mamahed'i' mata'-mata'. 2 Ana denu se, fo reu rafad'e atahori so'al Lamatualain to'u parenda'. Ana o denu se fo reu tao rahai' atahori mamahed'i' sia bee-b'ee. 3 Te Ana nafad'e se nae, “Misined'a malolole! Afi' mendi saa-saa boe sia dala'. Mendi' a bad'u sia' ao mara. Afi' mendi teteas, do tas, do lepa-ngges, ma d'oi'. Afi' mendi bad'u seluao' boe! 4 Mete ma hei misi' kambo' sa, ma hambu atahori nau simbo nggi, na, mii leo sia ume nara. Afi' heheli ume. Leo mikindoo sia naa, losa hei lao hela kambo' naa. 5 Mete ma misi' kambo' sa, ma atahori sia kambo' naa, nda nau simbo ma nda rena nggi sa, na, so'u ei mara fo lao hela se leo. Mete ma hei lao hela mamana' naa, na, tao tungga had'at fo henda' hendi afu mia ei mara. Mifad'e se mae, ‘Hei nda nau rena sa, na, hela neu fo hei lemba-misaa ao mara!’” 6 Basa ma, ana ded'enu' ra lao mia kambo' risi kambo'. Ara reu rafad'e Lamatualain Hara-lii Malolen neu atahori ra. Ma ara tao rahai' atahori mamahed'i' ra boe. 7 Lele' naa, Mane Herodes Antipas rena dud'uit mata'-mata' so'al Yesus. Ana rena dud'uit naa ra, ma ana bingun, huu hambu atahori hira rafad'e rae, “Yesus naa, naeni Yohanis Mana Sarani' a nasod'a bali' ena.” 8 Hambu ruma fai rafad'e rae, “Eni ia, ba'i Elia mana nasod'a bali' ena.” Hambu ruma fai rae, “Eni ia, esa mia Lamatua' mana ola-olan laen ra eni' a dalahulun.” 9 Te Herodes nasaned'a nae, “Fai' naa, au mana denu tati etu Yohanis langgan. Ana nasod'a bali', do saa? Te ia, seka fai?” Boe ma ana sangga dala' fo nae nandaa mata' no Yesus. 10 Lao esa, Yesus ana ded'enun fo ana d'enu' ra, bali' fo ra'ab'ue ro E fai. Ara rafad'e neu E basa saa fo sira tao' ra ena. Basa ma Yesus se lao' nee-nee risi' mamana' sa deka no kambo Betsaida, fo reu hahae ao nara sia naa. 11 Te atahori hetar rahine Yesus se rae reu sia bee, de ara tungga E. Dad'i Yesus simbo se no malole', ma tao nahai' basa atahori mamahed'i ra, ma dui se so'al Lamatualain to'u parenda'. 12 B'ob'on ma, Ana ded'enu kasanahulu rua' ra, roe mbali Yesus rae, “Malole lena' Ama' denu atahori ia ra risi' kambo' mana deka-deka ia ra, fo sangga nanaat ao nara. Ma hela neu fo ara sangga mamana susunggu'. Huu mamana rou' ona' ia, ta'o bee fo ara hambu raa?” 13 Te Yesus nataa nae, “Ta'o ia! Hela fo hei mana mihao se!” Te ara rareresi rae, “Awe', Ama' dei! Nda bisa ta'o naa sa ma? Atahori ia ra, rifon lima lena'! Naa fe'e aka' tou' ra, nda fe'e reken ina' ra ro ana ka ra sa! Ma hai roti ma aka' b'ue' lima' a, ma u'u boa' rua' a. Mete ma Ama' nau hai mihao atahori ia ra, na, ta'o bee fo hai bisa hasa nanaat nae' fee se?!” Boe ma Yesus denu se nae, “D'enu atahori ia ra endo' ra'ab'ue reu mamana' sa na lima nulu-lima nulu'.” 14 15 Boe ma reu ator se endo' ta'o naa. 16 Lele' ara endo' rala ma, Yesus ha'i nala roti b'ue ka lima' ma u'u boa' ka rua' naa ra. De Ana oro'a lalai ata neu, ma hule-o'e no'e makasi. Basa de Ana bib'ib'i roti no u'u ra, de loo fee neu ana ded'enu nara fo reu bab'anggi fee neu atahori naa ra. 17 Basa se raa losa ra'ab'eta. Basa de, ara rad'uru rala nanaa lena' ra, sofe boa sanahulu rua. 18 Lao esa, Yesus mesa' ne hule-o'e sia mamana' sa. Basa ma, ana ded'enu nara ra'ab'ue ro E. Hule-o'e basa ma, Ana natane se nae, “Hei rena-rena' atahori ola-ola' rae, Au ia, seka? 19 Ara rataa rae, “Ruma rae Ama' ia, Yohanis Mana Sarani' a. Laen ra rae, mbei ma Ama' ia, ba'i Elia. Hoko' na, esa mia Lamatualain mana ola-olan ma'ahulun nasod'a bali' ena.” 20 Boe ma Yesus natane se fai nae, “Mete ma tungga hei, na, hei mae Au ia, se?” Basa ma Petrus nataa nae, “Ama' ia, Kristus, naeni Atahori fo Lamatualain dud'u mema' eni' a dalahulun!” 21 Basa ma Yesus na'angge se nae afi' mifad'e neu see-see boe mae, Au ia, Kristus. 22 Basa ma, Yesus ola' selu nae, “Au ia, Atahori Matetu' a. Au musi lemba doid'oso beran mata'-mata'. Dei fo atahori Yahudi ra lasi-lasi ad'at, ma malangga agama nara, ro meser agama ra nda nau simbo rae, Au ia, Kristus. Basa fo ara risa Au. Mema' Au mate, te finiesan ma, Au usod'a bali'!” 23 Basa ma, Ana nafad'e atahori hetar nae, “Atahori mana nae tungga Au, na, musi na'atataa' tungga nakandoo fais-fais. Ana musi mbo'i hendi hihii-nanaun. Musi tungga nakandoo' a, ona' mae atahori ra rae tao risa e, ona' atahori rasaa hau ngganggen fo neu nisi' eni mamana mamates na. 24 Te atahori mana nahehere mate huu tungga Au, dei fo ana hambu masod'a' nakandoo no Lamatua'. Te atahori fo nau nasod'a soa' neu aka' aon, dei fo ana saranggaa no Lamatualain. 25 Mete ma atahori sa hambu basa raefafo' no isi oen, te Lamatualain nda simbo e sa, na, ana hambu onton saa? 26 Au ia, Atahori Matetu' a. Dad'i atahori mana mae tungga Au, ma mae to'u nenori ngga, dei fo Au o mae utaa e sia Lamatualain matan lele' Au bali' mia sorga uma. Huu dei fo Au onda uma o Ama ngga koasa manaselin, o basa ate nara mia sorga ra. 27 Au ufad'e teb'e-teb'e' neu nggi. Hambu hira mia hei mana sia ia ra, dei fo rita rala Lamatua' to'u parenda', fo ara fe'e mate na.” 28 Basa fai kafalun, ma Yesus no'e no Petrus, Yohanis ma Yakobis reu sia lete' esa fo hule-o'e. 29 Lele' Yesus hule-o'e, boe ma mata-aon dad'i laen, ma bua-ba'u nara dad'i muti makahahad'o'. 30 Aib'oi' ma, atahori rua rema boe. Ru'a se, naeni ba'i Musa no ba'i Elia. Boe ma ara ola-ola' ro Yesus. 31 Ara o randela-rasa'a. Telu' se ola-ola' so'al Yesus mamaten sia Yerusalem. 32 Lele' naa, Petrus no nonoon karua' ra nduar kau-kau de ara sunggu'. Lele' ara fela, boe ma rita Yesus nambarii' no atahori rua. Ara o rita Yesus naronda manggarelo' boe. 33 Lele' ba'i Musa no ba'i Elia rae lao, ma Petrus bingun, nda nita' nae tao saa sa boe. Boe ma ana ola' leli nae, “Papa! Sia ia malole', o! Dad'i malole lena' hai miririi lalaa' telu. Esa fee neu Papa, esa fee neu ba'i Musa, ma esa fai fee neu ba'i Elia.” 34 Te lele' ana fe'e ola-ola' ta'o naa, ma lelee bub'ue' sa nema tatana nala se. Boe ma Petrus se ramatau. 35 Boe ma ara rena hara' sa mia lelee' naa nae, “Ia, Au Ana ngga fo Au pili mema' a! Ana ola', na, rena malolole neu E!” 36 Ola' basa ma, Petrus se rita aka' Yesus mesa' ne. Telu' se nee-nee' a ma nda dui neu esa sa boe, saa fo sira rita' naa. Doo-doo dei de ara fe'e dui neu atahori laen. 37 Mbila' neu ma, Lele' Yesus no Petrus se onda mia lete' naa, atahori hetar rema randaa ro Yesus. 38 Boe ma atahori sa nameli mbali E nae, “Ama Meser, e! Tulun se'u ana mone ise ngga dei! 39 Te nitu aka' to'u nala e, fo tao e nggasi aiboi'-aiboi', ma mbembesi' e losa fufure' lua mia b'afan. Nitu naa o, aka' momoko e, ma neu kakaur e nakandoo' a. 40 Au o'e tulun Ama' ana ded'enun nara fo oi hendi nitu naa, te ara nda bole e sa!” 41 Rena ta'o naa, ma Yesus b'ua basa se nae, “Woi! Hei nda mimihere mae Lamatua' bisa tao nahai' nala atahori, sa do? Hei ia ra, mema' atahori nda mana mihine misod'a tungga d'ala ndoos sa! Au musi u'ub'ue o hei losa fai hira' fai, dei fo hei nau mimihere neu Au? Au musi u'utataa' o hei losa fai' bee fai!?” Basa ma Ana ola' no ama' naa nae, “Mo anam ia nema leo!” 42 Lele' ara roo ana' naa nisi' Yesus, boe ma nitu a rupa ana' naa neu rae a, ma mbembesi' na'amimina' e. Te Yesus parenda nitu a fo lao hela ana' naa, boe ma ana' naa hai neu' ena. Basa de Yesus fee ana' naa neu aman. 43 Atahori mana rita Lamatua' koasa manaselin naa, basa se titindindii. Lele' basa atahori ra fe'e ola-ola' so'al manad'ad'i' fo Yesus tao' ra, Ana nafad'e ana ded'enun nara nae, 44 “Misined'a malolole o'ola ngga ia! Nda doo' sa te, atahori rae seo hendi Au, Atahori Matetu' ia. Ara fee Au isi' atahori d'ea' ra.” 45 Te ana ded'enun nara titindindii' a. Ara nda rahine dud'u'an sa. Ara o ramatau ratane naa sosoan saa. 46 Lao esa, Yesus ana ded'enun nara rareresi seka mia sira e dei fo mana dad'i malangga. 47 Te Yesus bub'ulu' saa fo rareresi' a. Boe ma Ana no'e anadiki' sa, de fee ne nambarii' neu bob'oan. 48 Basa ma nafad'e se nae, “Rena malolole! Atahori mana tungga Au fo mete-se'u atahori anadiki' ona' ana' ia, naa sosoan, eni mete-se'u Au. Ma eni o mete-se'u Ama Ngga sia sorga mana denu Au raefafo' uma. Hambu atahori nae' hii' a raloe-rad'ae se. Ona' atahori mana tud'a-loloe', atahori manasusa', atahori nda papake' ra sa, atahori mana soe', ma atahori anak ra. Naa! Atahori mana hii' a mete-se'u atahori mata' naa ra, Lamatualain du'a nae sira manaseli' ra.” 49 Basa ma Yohanis nafad'e Yesus nae, “Papa! Lao esa, hai mita atahori sa oi nitur nendi' Papa naran. Dad'i hai 'ai fo afi' ingga-ingga' Papa naran, huu eni nda hita atahorin sa.” 50 Te Yesus nataa nae, “Afi'! Huu atahori nda mana lab'an hita sa, eni hita nonoon.” 51 Yesus bub'ulu' nae, Eni fai hehene sorga neu deka-deka ena. Boe ma Ana na'etu' fo lao kota Yerusalem neu. 52 Ana denu atahori lao ra'ahulu' se, naa fo ara ralalau hela nanaa-nininu'. Boe ma ara risi' kambo' sa sia propensi Samaria de rae ralalau mamana leleo'. 53 Te atahori Samaria naa ra nda nau simbo Yesus se sa, huu Ana nae lao neu hule-o'e neu Lamatualain sia kota Yerusalem. 54 Lele' Yakobis no Yohanis rena atahori Samaria ra tatao nara, ma ara kokoe Yesus rae, “Papa! Ta'o bee, ata to'e Lamatualain na'onda' ai mia lalai nema naa hendi basa se?” 55 Te Yesus mete mbali ru'a se, ma ai nae, “Sud'i boe du'a ta'o naa fai.” 56 Basa ma ara lao rakandoo risi' kambo' laen. 57 Lele' ara fe'e lao-lao', hambu atahori sa ola' no Yesus nae, “Ama'! Ama' neu sia bee o, au nau tungga ukundoo o Ama'!” 58 Te Yesus nataa nae, “Malole, boe! Te musuned'a ta'o ia. Basa atahori ro banda ra esa' no mamana lu'u-leleon. Busa fui bali' nisi' ndolan. Mbui' b'ali' nisi' ndunan. Te Au, Atahori Matetu' ia, nda maume' fo bali' uu sa. Mamana' fo ndae langga' o, nese boe.” 59 Lao esa, Yesus no'e atahori laen sa nae, “Uma tungga Au, fo dad'i atahori ngga.” Atahori naa nataa nae, “Neu! Te ta'o ia, Lamatua'. Hela fo au bali' mete-se'u ala ina-ama nggara dei. Mete ma ama ngga mate ena, dei fo au fe'e tungga na.” 60 Te Yesus nafad'e neu e nae, “Ta'o ia! Hela fo atahori nda mana ramahere neu Lamatua' sa, ralalau sira atahori mates nara. Te hei mana mimihere neu Lamatua', hei ue-tataos mara mii mifad'e so'al Lamatualain to'u parenda'.” 61 Hambu atahori sa fai nae, “Malole boe, Lamatua'! Au ae tungga Lamatua' ukundoo. Te fee kaka'e' fo uu id'u ala bob'onggi nggara, dei fo au bali' uma tungga Lamatua'.” 62 Te Yesus nafad'e neu e nae, “Ta'o ia! Mete ma atahori tatati rala osi nara, basa ma ara mbute-mue ro' a ue-tatao laen ra losa ara lilii' sela, na, osi naa nda dad'i sa. Ona' naa boe atahori mana na'etu' nae tungga Au, te aka' nasaned'a masod'a ma'ahulun. Atahori mata' naa nda na'ena ngguna dad'i atahori mana ue-tao sia Lamatualain parendan sa.