< Yohanis 8 >
1 Te Yesus neu sia lete Saitun.
2 Mbila fefetu anan, boe ma Ana neu mia Ume Hule-o'e Huu' a sod'an rala. Atahori hetar reu ra'ab'ue ro E. Boe ma Ana endo' nanori se.
3 Lele' naa, hambu ina' esa fo ara humu rala e lele' ana hohongge. Boe ma meser agama ro atahori Farisi hira o lea rendi e nisi' Yesus. De Ara ra'asusuu' ina' naa nambarii' sia basa se mata nara.
4 Boe ma rafad'e Yesus rae, “Papa Meser. Ina' ia hambu rala e lele' ana hohongge.
5 Naa, tungga ba'i Musa Hohoro-lalanen nara, hambu parenda' oi, ‘atahori mana hohongge musi nene honda' fatu neu losa mate.’ Tungga Papa, na, ta'o bee?”
6 Ara rae te'e-sii sob'a E, fo ara bisa rundu sala' ma ra'atutud'a' E. Yesus nda nataa neu' ena sa, te Ana endo' daka'-daka' de sura' sia rae a, nendi' lima u'u na.
7 Ara aka' ratane rakandodoo' E. Basa ma Ana nambarii', de nafad'e se nae, “Ta'o ia. Mete ma hambu mia hei nda tao mita sala' sa, na, eni mana mbia fatu na'ahulu' fo hukun ina' ia.”
8 Basa ma Ana endo' daka'-daka' fai, de sura' selu' neu rae a.
9 Lele' ara rena o'olan ma, ara mae. Huu sia rala nara, ara bub'ulu' rae, sira o tao rita sala' boe. Basa ma ara lao esa-esa, mia lasi' losa soru' ra. Doo-doo ma, hela' a Yesus no ina' a mesa' ne sia naa.
10 Boe ma Yesus nambarii' fai, ma natane nae, “Hee? Ara sia bee ena? Nda hambu atahori laen sia ia, fo nau fee sala' do hukun nggo, do?”
11 Boe ma nataa nae, “Nese, Papa.” Yesus nafad'e e nae, “Au o nda nau hukun nggo sa boe. Bali' leo. Te musuned'a. Afi' tao sala' fai!”]
12 Yesus ola' selu' no atahori hetar naa ra nae, “Au ia, ona' manggarelo' soa' neu atahori sia raefafo' ia. Atahori mana tungga Au nda nasod'a sia ma'ahatu' a sa, te ana leo sia manggarelo' mana nendi masod'a ndoo-tetu' a.”
13 Hambu atahori Farisi hira rasapaa rae, “Weh! Mae dad'i sakasii soa' neu aom, do? Nda bisa sa! Huu tungga hita hohoro-lalanen, musi atahori laen dad'i sakasii soa' neu atahori esa, nda aka' atahori na mesa' ne sa. Dad'i hai nda simbo, ma nda nau mimihere sa.”
14 Yesus nataa nae, “Ta'o ia. Mae Au dad'i sakasii soa' neu ao Ngga, te o'ola Ngga naa, teb'e. Huu Au mesa' nggo bub'ulu' teb'e Au lao' mia bee uma, boe ma ae bee uu. Hei nda bub'ulu' Au mia bee uma sa, boe ma nda bub'ulu' dei fo Au bee uu sa boe.
15 Hei nile atahori mendi' atahori timba-tai na. Te Au nda pake atahori timba-tain fo nile atahori esa sa boe.
16 Mete ma Au nile atahori, Au timba-tai ngga naa, ndaa. Huu Au nda nile mesa' nggo sa, te Au tao basa-b'asa naa ra u'ub'ue o Ama ngga mana denu Au' a.
17 Afi' lilii'. Huu nenesura' sia hei hohoro-lalane agama ma oi, ‘Mete ma hambu atahori sakasii rua ola' ona esa' dala' esa, na, dei fo fe'e nenesimbo tungga hita hohoro-lalanen.’
18 Dad'i nda aka' Au mesa' nggo dad'i sakasii so'al ao ngga sa. Huu Ama ngga mana denu Au' a o dad'i sakasii ma ola' so'al Au boe.”
19 Ara ratane rae, “Amam naa, sia bee?” Boe ma Yesus nataa nae, “Hei nda mihine teb'e Au sa. Hei o nda mihine Au Ama ngga sa boe. Huu mete ma hei mihine teb'e Au, tantu mihine Eni boe.”
20 Basa ia ra, Yesus nafad'e lele' Ana nanori sia Ume Hule-o'e Huu' a, deka-deka sia mamana' fo rad'uru rendi' neu doi kolete. Nda hambu esa humu E sa boe, huu fain nda fe'e losa sa.
21 Yesus tute o'olan mbali se nae, “Dei fo Au lao hela nggi, uu sia mamana' laen. Dei fo ama sangga Au, te nda hambu sa, huu hei nda mi'ena hak mii sia mamana' naa sa. De mete ma hei mate, naa ama fe'e lemba-misaa sala-kilum.”
22 Basa ma atahori Yahudi ra malangga nara esa natane esa rae, “Ana ola' saa ia? Ana nae tao nisa aon, do? Huu Ana oi, ‘Hei nda bisa mii sia mamana' naa sa.’”
23 Boe ma Yesus nafad'e mbali se nae, “Hei mia raefafo' sia rae'. Te Au mia lalai sia ata'. Hei atahori mia raefafo' ia. Te Au atahori nda mia raefafo' ia sa.
24 Naeni de Au ufad'e fa' ra ae, mete ma hei mate, ama fe'e lemba-misaa sala-kilu mara. Huu mete ma hei nda mimihere mae, Au ia, naeni Kristus, fo Lamatualain haitua nema' a ena, dei fo hei mate, na tantu ama fe'e lemba-misaa sala-kilu mara.”
25 Basa ma ratane rae, “Weh! Ho ia, seka?” Yesus nataa nae, “Au ufad'e mema' mia fefeun ena.
26 Hambu dala' hetar fo Au bisa ufad'e so'al hei. Hei sala mara nae' boe. Te Au nda nau utud'u dala' naa ra sa. Naa, Mana denu Au uma sia ia na, mete ma Ana ola', Ana ola' aka' ndoo-tetu' a. Ma Au ufad'e neu aka' atahori sia raefafo' ia, dala-dala' fo Au rena mia Eni ena.”
27 (Eni masud na, Aman sia sorga. Te ara nda rahine masud na sa boe).
28 Boe ma Yesus ola' selu' fai nae, “Dei fo mete ma hei londa nggangge Au, Atahori Matetu' ia, sia hau nggangge' ata, dei fo hei mihine mae, Au ia, naeni Kristus. Au nda tao saa-saa mia Au ao ngga sa, te Au unori aka' dala-dala' fo Ama ngga sia sorga nanori neu Au ena.
29 Mana denu Au a, na'ab'ue no Au nakandoo' a. Ana nda parna hela nita Au mesa' nggo sa, huu Au aka' tao tungga Eni hihii-nanaun.”
30 Lele' Yesus nafad'e dala' ia ra, ma atahori hetar ramahere E boe.
31 Basa ma, Yesus nafad'e neu atahori Yahudi ra mana ramahere neu Eni a nae, “Mete ma hei misod'a nenepa'a' mo Au Ded'ea-o'ola ngga ra, ma hei minori mikindoo mia Au, na, hei dad'i Au ana mana tungga ngga teb'e-teb'e'.
32 Basa fo, hei bisa bub'ulu' dala-dala ndoo-tetu' ra. Ma dala-dala ndoo-tetu' naa, mana mbo'i' nggi, de ama nda afi' dad'i ate sa ena.”
33 Basa ma ara rasapaa rae, “Hee! Hai ia, nda atahori aten sa! Huu hai ia, ba'i Abraham tititi-nonosin! Dad'i ta'o bee de ola' mae, dei fo hai nenembo'it?”
34 Boe ma Yesus nafad'e neu se nae, “Au o'ola ngga naa, teb'e. Huu basa atahori fo rasod'a' tao sala' ra, dad'i ona' ate esa aka' tungga-tungga' a sala' hihii-nanaun.
35 Te eni biasa na, ta'o ia: ate ra nda biasa simbo hata-heto' mia malangga sa. Huu aka' malangga anan mana simbo hata-heto' naa. (aiōn )
36 Dad'i mete ma Au, naeni Lamatualain Anan, fee ambon neu sala-kilu mara, na, hei nenembo'it ena, ma nda dad'i sala' a aten sa ena. No ta'o naa, hei nenembo'it teb'e ena, de sud'i boe tungga sala' a hihii-nanaun fai!
37 Au bub'ulu' hei ia, naeni ba'i Abraham tititi-nonosin. Mae ona' naa boe o, hei aka' sangga-sangga dala' fo mae tao misa Au, huu ama nda nau simbo Au nenori ngga sa. Huu sia rala mara, nda hambu mamana' fo mbeda' Au Ded'ea-o'ola ngga sa ena.
38 Au ufad'e dala-dala' fo ita' ra, fo Ama ngga natud'u neu Au ena. Ma hei tao tungga dala-dala' fo hei rena mia ama mara.”
39 Ara rataa rae, “Hai ia, ba'i Abraham tititi-nonosin!” Yesus nafad'e nae, “Mete ma hei dad'i ba'i Abraham tititi-nonosin teb'e, na, hei tao tungga e.
40 Te ba'i Abraham nda tao nita de'ulaka' ona' hei tao' naa sa! Huu hei aka' sangga dala' fo mae tao misa Au. Tao-tao te Au ia, mana ufad'e neu nggi dala-dala ndoo-tetu' a, fo Au rena mia Lamatualain.
41 Hei tatao mara, mema' nda nela na'adoo' mia hei amam sa.” Te ara rasapaa rae, “Hee! Hai ia, ana nene hengge nee'! Afi' mae, hai ia, ana tias! Huu hai Amam, aka' esa' a, naeni Lamatualain!”
42 Boe ma Yesus nafad'e se nae, “Te mete ma Lamatualain teb'e-teb'e' dad'i hei Amam, tantu hei sue Au. Huu Au uma mia E, ma Au sia ia. Au nda uma tungga' a hihii-nanau ngga sa. Te Au uma, huu Eni mana denu Au.
43 Ta'o bee de hei nda mihine Au o'ola ngga sa? Mbei ma hei nda nau rena, sa!
44 Hei ia, mata' sa ona' nitu ra malanggan. Huu hei hii' a tao tungga eni hihii-nanaun! Mia fefeun, eni mana tao nisa atahori. Eni lab'an dala ndoo-tetu' ra, ana tola hendi basa ndoo-tetu' ra. Mete ma ana peko-leleko', naa mema' eni biasa na. Huu eni mana peko-leleko', ma mana ombo-koson huun.
45 Au ia, mana ufad'e dala ndoo-tetu' a. Te hei nda mimihere Au sa.
46 Sob'a! Seka mia hei bisa natud'u nala' bukti nae, Au tao sala' ena? Heran, e! Mete ma Au ola' ndoo-tetu', tao' bee de hei nda nau mimihere Au sa?
47 Naa, atahori mana lao' mia Lamatualain rena Ded'ea-o'olan. Te hei ia, nda lao' mia Lamatualain sa, naeni de hei nda hii rena Au sa.”
48 Atahori Yahudi ra malangga nara, rataa rae, “Weh! Hai ola' naa teb'e ena. Huu hai mifad'e ena, Ho ia, nda atahori Yahudi matetu' sa, te Ho atahori Samaria. Ho o nitu a sia ralam ena!”
49 Boe ma Yesus nataa nae, “Nitu a nda sia Au rala ngga sa. Au fee hada-hormat neu Ama ngga sia sorga, te hei nda fee hada-hormat neu Au sa.
50 Au nda so'u ao ngga fo utud'u manaseli ngga sa. Te hambu Esa nau natud'u Au manaseli ngga. Hela Eni mana na'etu' nae Au o'ola ngga nda, do hoko'.
51 Au Ded'ea-o'ola ngga, mema' teb'e! Ma, atahori mana rena ma tao tungga Ded'ea o'ola ngga, nda mate sa.” (aiōn )
52 Rena ona' naa, ma atahori Yahudi ra malangga nara rafad'e E rae, “Ia naa, hai bub'ulu' ho ola' ona' mulu' e, huu nitu a sia ralam ena. Ba'i Abraham mate ena. Lamatualain mana ola-ola dalahulu nara, o mate ena boe. Te ho mae, ‘atahori mana rena ma tao tungga Au Ded'ea-o'ola ngga ra, nda mate sa.’ Mema' ho mumulu ena! (aiōn )
53 Do du'a mae ho manaseli' lena' ba'i Abraham mana mate' a? Do, Ho manaseli' lena' Lamatualain mana ola-olan fo mana mate' ra ena do? Ho du'a, mae Ho ia, seka?”
54 Boe ma Yesus nataa, nae “Mete ma Au mana so'u Ao ngga, atahori nda nau simbo sa. Tao-tao te, Au nda so'u-so'u' ao ngga sa, te Ama ngga mana so'u nanaru Au. Eni fo hei mitaa mae, hei Lamatualain ma.
55 Te hei nda mihine E sa. Au uhine no malole'. Mete ma Au ae nda uhine malole' E sa, na, Au mana ombo-koson, ona' hei boe. Te Au uhine malole' E, ma Au o tao tungga Ded'ea-o'olan boe.
56 Hei ba'i Abraham ma ralan namaho'o seli, lele' ana nahani nae nita Au u'uma ngga. Mema' Ana nita ena, de ana ma'ahee.”
57 Atahori Yahudi ra malangga nara rafad'e rae, “Ho nda fe'e too lima nulu sa boe! Te mae ho mita ba'i Abraham ena. Teb'e, do?”
58 Boe ma Yesus nataa nae, “Teb'e! Huu ba'i Abraham nda fe'e sia sa, te Au sia ena.”
59 Boe ma, atahori naa ra ha'i fatu fo rae honda E, huu Ana so'u Aon ona' Lamatualain. Te Ana lao' bambi-bambi de dea neu mia Ume Hule-o'e Huu' a sod'an.
