< Yohanis 5 >
1 Basa naa ma, hambu fai malole agama Yahudi esa. Naeni de Yesus se lao risi' Yerusalem.
2 Sia naa, hambu lifu esa na'ena nembeleon lima mana deka-deka no lelesu esa, naran Lelesu Bib'i Lombo. Sia sira ded'ea Aram, lifu naa naran ‘Batesda’.
3 Hambu atahori mamahed'i' hetar biasa reu rahani sia nembeleo' naa ra. Conto ona': atahori poke', atahori keko', ma atahori nda mana na'aunda' nala sa. [Ara rahani fai' bee fo oe a nanggongga.
4 Huu lao-lao esa, Lamatualain aten mia sorga oe rala neu, fo tao oe a nanggongga. Basa naa fo seka nahulu' oe rala neu, na, eni hai mia hed'i-nggaraun.]
5 Naa, sia naa hambu atahori esa namahed'i too telu nulu falu ena.
6 Boe ma Yesus nita atahori naa sunggu' sia naa. Ana bub'ulu' atahori naa namahed'i eni' a doo' ena, boe ma natane nae, “A'a, e! Mae hai, do?”
7 Ana nataa nae, “Au nau, Papa. Te eni kai-baa na, naeni: lele' oe a nanggongga, nda hambu atahori o'o au oe rala uu sa. Mete ma au sob'a ao ngga, na, atahori laen rala reu ra'ahulu' au ena.”
8 Boe ma Yesus denu e nae, “Mumburii' leo! Lulu mala nenei ma, fo bali' leo.”
9 Yesus ola' basa ta'o naa, boe ma atahori naa hai neu' ena. Basa ma ana fela, o'o nenein, de ana lao bali' neu' ena. Manadad'i' naa nandaa no atahori Yahudi ra fai hule-o'en.
10 Basa ma atahori Yahudi ra malangga nara rafad'e mbali atahori mana fe'e hai' na rae, “Woi! Bub'ulu', do hoko'? Fai' ia, fai hahae tao ue-osa'. Tungga hita agaman hohoro-lalanen, atahori nda bole o'o nenei' sa, huu naa o naran, tao ue-osa' boe!”
11 Ana nataa nae, “Aduu, ama nggara, e! Ama' se afi' miminasa. Huu Atahori mana tao nahai' au naa, mana parenda au nae, ‘Lulu neneim, fo bali' leo.’”
12 Basa ma ara ratane mbali e rae, “Heh! Mana denu nggo lulu nenei' naa, seka?”
13 Te atahori naa, nda nahine Yesus naa, seka sa boe. Huu Yesus dea neu nee-nee tungga atahori hetar talad'a.
14 Nda doo' sa, ma Yesus nandaa bali' no atahori naa mia Ume Hule-o'e Huu' a sod'an. Boe ma Yesus nafad'e nae, “Rena, e! Ia naa ho hai ena. Afi' tao sala' fai, naa fo afi' hambu dala nda malole' lena' sa fai.”
15 Basa ma, atahori naa neu sangga atahori Yahudi ra malangga nara, de nafad'e nae, “Mana tao nahai' au naa, Eni naran, Yesus.”
16 Naeni de ara mulai tao doid'oso Yesus, huu Ana na'ahahai' atahori, nandaa no fai hule-o'e'.
17 Te Yesus nafad'e neu se nae, “Ta'o ia. Au Ama ngga nda hahae tao ue-osa' sa. Dad'i Au o tao ues ukundoo' a boe.”
18 Huu atahori Yahudi ra malangga nara cap rae, Yesus nalena-langga sira hohoro-lalane fai hahae tao ue-osa', naeni de ara sangga dala deres lena' fo rae tao risa E. Lelenan fai, Ana o nae, Lamatualain naa, Eni Aman. No ola' ta'o naa, Ana so'u Aon ona' Lamatualain boe.
19 Yesus nafad'e neu se nae, “Teb'e! Au ufad'e mema' ae, Au mesa' nggo nda tao ala saa-saa mia Ao ngga sa boe. Huu Au ia, Lamatualain Anan. Naeni de Au bisa tao tungga aka' saa fo Au ita Ama ngga tao' a. Au ita Ama ngga tao saa, na, Au o tao tungga ta'o naa boe.
20 Au Ama ngga sia sorga sue nala Au seli, naeni Eni Anan. Ana o natud'u neu Au basa-b'asa' fo Ana tao' ra. Dei fo Ana nau natud'u neu Au dala-dala' manaseli' lena' fai, naa fo ama tabangangaa!
21 Au Ama ngga tao nasod'a bali' atahori mates ra. Ona' naa boe, dei fo Au fee masod'a ndoo-tetu' a neu sud'i' a seka, tungga hihii-nanau ngga.
22 Matetun, ta'o ia: Ama' mesa' ne nda na'etu' huku-doki' fee neu atahori sa. Te Ana fee basa' e neu Au ena, huu Au ia, Eni Anan. Basa fo Au mana u'etu' ae, atahori tao ndoo-tetu', do hoko'.
23 Au Ama ngga nau fo basa atahori fee had'a-hormat neu Au, ona' ara fee had'a-hormat neu Eni boe. Huu atahori nda mana fee had'a-hormat neu Au sa, naeni Eni Anan ia, na, ana o nda fee had'a-hormat neu Ama' mana denu Au sa.
24 Teb'e! Au ufad'e mema'. Atahori mana rena Au o'ola ngga, ma namahere Lamatualain mana denu Au, na, ana hambu masod'a ndoo-tetu' nda mana basa' a sa. Lamatualain nda huku-doki e sa ena. Huu atahori naa nda hambu huku-doki mamates a ena, te ana dad'i neu atahori mana nasod'a nakandoo no Lamatualain. (aiōnios )
25 Teb'e! Au ufad'e mema'. Fain deka-deka nema ena, naa de eni' a mia lele' ia, atahori mate' ra o rena hara' mia Au boe, naeni Lamatualain Anan. Huu atahori mana rena ma simbo malole' Au o'ola ngga, dei fo ana hambu masod'a ndoo-tetu' a.
26 Basa masod'a' ra ra'oka sia Au Ama ngga. Ana o fee Au masod'a ndoo-tetu' a boe. Huu Au ia, Eni Anan.
27 Au Ama ngga o fee hak no koasa neu Au, fo u'etu' basa atahori huku-doki nara, huu Au ia, naeni Atahori Matetu' a.
28 Ama afi' nggengger, huu mbei anak fai te basa atahori mana mate' ra rena Au hara ngga.
29 Basa fo ara rasod'a bali'. Boe ma ara dea rema mia rates ra. Atahori fo dalahulun tao malole', hambu masod'a ndoo-tetu' a nda mana basa' sa. Te atahori fo dalahulun tao' a de'ulaka', hambu huku-doki' nakandoo' a.”
30 Yesus tute o'olan nae, “Au nda tao ala saa-saa sa, mete ma Au nda fe'e rena mia Ama ngga sa. Au rena ala dei fo Au fe'e u'etu' atahori ded'eat na. Huu naa, saa fo Au u'etu' naa, ndaa. Huu Au nda tungga' a hihii-nanau ngga sa, te tungga' a Ama ngga hihii-nanaun. Huu Eni mana denu Au na!
31 Mete ma aka' Au mesa' nggo ufad'e so'al Au ao ngga, na, Au o'ola ngga naa, nda nenesimbo tungga hohoro-lalane' sa.
32 Te hambu atahori laen dad'i sakasii so'al Au. Ma Au bub'ulu' ara ola' no matetu' so'al Au.
33 Hei denu mita atahori reu ratane Yohanis mana sarani' a. Ma ana ola' no matetu' so'al Au.
34 Tao-tao te, Au nda parlu atahori netaan sa. Te Au fee nesenened'a' dala' ia ra, naa fo ama bisa hambu masoi-masod'a' mia sala-kilu mara.
35 Yohanis o'olan naa, ona' lambu esa naronda manggarelo'. Lele' rondan fe'e manggarelo', rala mara mimiho'o.
36 Tao-tao te hambu Atahori manaseli' lena' Yohanis mana ola' matetu' so'al Au. Naeni Ama ngga sia sorga mana fee Au ue-tataos hetar, fo ulalao losa basa. Ue-tataos ia ra mana ratud'u bukti oi, Ama' mana denu Au.
37 Eni mana denu Au, ma ola' no matetu' so'al Au boe. Naa, hei nda fe'e rena mita haran sa, do, mete mita mata Aon sa.
38 Lamatualain Ded'ea-o'olan nda nasod'a sia rala mara sa, huu nda mimihere Au, fo Ana denu' a sa.
39 Hei hii' a paresa' lutu-lelo' Lamatualain Susura Meumaren, huu du'a mae dei fo hei hambu dala' sia naa fo misod'a ndoo-tetu' nda mana'etu' sa. Tao-tao te, Susura naa ra, rafad'e so'al Au. (aiōnios )
40 Te hei nda nau ima misi' Au, fo dad'i Au atahori ngga, naa fo ama bisa hambu masod'a ndoo-tetu' nda mana basa' sa.
41 Au nda parlu atahori so'u rananaru Au sa.
42 Te Au uhine teb'e-teb'e' hei rala mara. Naeni de Au bub'ulu' ae, hei nda mi'ena susue-lalai' neu Lamatualain sa.
43 Au uma sia raefafo' ia, huu Ama ngga mana to'u koasa denu Au uma. Te hei nda simbo Au sa. Tao-tao te, mete ma hambu atahori laen nema nendi koasan, na, hei simbo e no malole'.
44 Hei esa no esa hii' a kokoat a. Te hei nda taoafi', Lamatualain koa nggi, do hoko' sa. Tao-tao te, Eni, Lamatualain! Nda hambu laen sa ena. Dad'i mete ma hei nda taoafi' neu E sa, ona bee fo hei bisa mimihere neu E?
45 Afi' du'a mae, Au mana mbia sala' neu nggi sia Au Ama ngga matan. Hoko'. Mana mbia sala' neu nggi, naeni ba'i Musa. Tao-tao te, hei mimihena neu e, huu eni mana fee nggi Lamatualain Hohoro-lalanen.
46 Mete ma hei mimihere teb'e neu Musa, tantu hei o mimihere neu Au boe. Huu eni sura' so'al Au.
47 Te, huu hei nda mimihere teb'e neu saa fo ana sura' a sa, ona bee fo hei nau mimihere saa fo Au ola' a? Ne'o hoko', to!”
