< Yohanis 14 >
1 Yesus tute o'olan nae, “Ama afi' du'a-du'a'. Mimihere neu Lamatualain. Ma mimihere neu Au boe.
2 Sia Au Ama ngga mamana leleon, hambu kama hetar. Mete ma mamana' nda dai sa, na, ne'o Au ufad'e mema' neu nggi ena. Lele' ia Au ae uu sad'ia hela fee nggi mamana' sia naa.
3 Lele' Au uu ena, ma sad'ia ala hei mamana mara ena na, dei fo Au bali' uma fo ama tungga mimilolo' mo Au. No ta'o naa, Au sia bee naa, hei o sia naa boe.
4 Huu, hei mihine dala' nisi' mamana' fo Au ae uu' a.”
5 Te Tomas natane E nae, “Papa, e! Hai nda bub'ulu' Papa nae neu sia bee saa boe. Dad'i ta'o bee fo hai bisa mihine dala' nisi' naa neu?”
6 Boe ma Yesus nafad'e nae, “Nda hambu dala' laen mana noo atahori reu risi' Ama' sia sorga sa. Tungga aka' Au mesa' nggo. Huu Au ia, dala' mana neu sia Lamatualain. Au ia, mana to'u saa fo ndoo-tetu' a. Ma Au ia, mana fee atahori masod'a ndoo-tetu' a. Nda hambu dala' laen sa.
7 Mete ma hei mihine teb'e Au, na, hei o mihine Au Ama ngga boe. Dad'i eni' a mia lele' ia, hei mihine Eni ena, ma mita Eni ena boe.”
8 Filipus no'e nae, “Papa, e! Tulun mutud'u Amam neu hai dei! Huu aka' naa o dai ena.”
9 Boe ma Yesus nafad'e e nae, “Filipus, e. Au u'ub'ue o nggi doon basa ia ena, te ama nda fe'e mihine Au teb'e-teb'e' sa, do? Huu atahori mana nita Au ena, naa ona' ana nita Ama ngga ena. Saa de, fa' ra mo'e mae, ‘Mutud'u Amam neu hai’ fai?
10 Ona bee? Lele' Au ae, Au nenepa'a o Ama ngga, ma Ama ngga nenepa'a no Au, na, mumuhere Au, do hoko'? Ded'ea-o'ola' fo Au ola' fee neu nggi naa, nda na'oka sia Au mesa' nggo sa, te na'oka sia Ama ngga. Ma Ana pake Au fo ulalao ukundoo Eni ue-tataon.
11 Mimihere Au lele' ae, Au nenepa'a' malole' o Ama ngga, ma Ana nenepa'a' malole' no Au boe. Te mete ma hei nda mimihere ta'o naa sa, na, mimihere Au huu ama mita dala' fo Au tao' ra.
12 Au o'ola ngga naa, teb'e! Huu atahori mana namahere Au, dei fo ana o tao dala' ona' Au tao' ra boe. Te, huu Au uu sia Ama ngga, de saa fo atahori naa tao, dei fo manaseli' lena' mia Au tao' ra.
13 Hei mana nenepa'a' mo Au, mi'ena hak fo mendi Au nara ngga. Dad'i mete ma ama hule-o'e mo'e sud'i' a saa, mendi' Au nara ngga, dei fo Au tao fee nggi. No ta'o naa, Au so'u unanaru Ama ngga, naa fo basa atahori bub'ulu'.
14 Au ufad'e selu' fai: ama hule-o'e mo'e sud'i' a saa, mendi' Au nara ngga, dei fo Au tao fee nggi.”
15 Yesus tute o'olan nae, “Mete ma hei sue Au, na, ama tao tungga Au parenda ngga.
16 Au o'e Ama ngga, dei fo, mete ma Au nda u'ub'ue o nggi sa ena, na, Ana fee nggi Mana Nuni esa fo natud'u dala' fee nggi. Eni, Lamatualain Dula-dalen, mana nanori nggi ndoo-tetu' a. Atahori ruma sia raefafo' ia nda nau simbo E sa, huu ara nda bisa rita ma nda rahine E sa. Te ama mihine E huu Eni nenepa'a' noo nggi. Dei fo Ana nasod'a sia rala mara. Ma dei fo Ana na'ab'ue nakandoo noo nggi boe. (aiōn )
17
18 No ta'o na, Au nda lao hela mesa' nggi ona' ana maat sa. Te misined'a, dei fo Au bali' uma sia nggi.
19 Nda doo' sa te, atahori laen sia raefafo' ia nda rita Au sa ena. Te dei fo hei mita Au. Huu Au usod'a bali', de hei o hambu masod'a ndoo-tetu' a boe.
20 Lele' Au usod'a bali', na hei mihine teb'e mae, Au nenepa'a' o Ama ngga; hei nenepa'a' mo Au; ma Au nenepa'a' o nggi boe.
21 Atahori mana simbo ma tao tungga Au parenda ngga ra, na, eni mana sue Au. Ma Ama ngga o sue atahori mana sue Au ona' naa boe. Au o sue eni, ma utud'u Ao ngga neu e boe.”
22 Sia naa hambu atahori esa, naran, Yudas. Eni, nda Yudas Iskariot sa. Lele' ana rena Yesus o'olan, boe ma natane nae, “Papa nau mutud'u Aom neu hai. Te ta'o bee de Papa nda nau mutud'u aom neu atahori laen sia raefafo' ia sa?”
23 Yesus nataa nae, “Ta'o ia. Atahori mana sue Au, dei fo ana tao tungga Ded'ea-o'ola ngga. Ama ngga o sue eni boe. Boe ma, Au o Ama ngga misod'a rala' esa mo e boe.
24 Te atahori nda mana sue Au sa, ana nda tao tungga Ded'ea-o'ola ngga sa. Naa, basa dala' fo hei rena mia Au ia, nda na'oka sia Au sa, te na'oka sia Ama ngga mana denu Au ia.
25 Lele' ia Au fe'e u'ub'ue o nggi. Naa de Au ufad'e mema' dala' ia ra.
26 Te doo-doo, Ama ngga haitua Mana Nuni esa nema, naeni Eni Dula-dale Meumaren. Dula-dale' naa dei fo nggati Au sia raefafo' ia. Eni tataon, naeni: nenori basa dala' ra reu nggi, ma fee nesenened'a' basa dala' fo Au parna ufad'e neu nggi' a ena.
27 Lele' Au lao ena, Au tao fo ama bisa misod'a no mole-dame ma nenee-linolino. Aka' Au mana fee mole-dame mata' naa. Basa mana sia raefafo' ia nda bisa tao rala mara nenee-linolino ona' naa sa. Dad'i afi' fee rala mara dud'u'a leli, ma nemetau.
28 Hei rena Au ufad'e ita nggi ena ae, ‘Au lao hela nggi, basa dei fo bali' uma.’ Rala mara afi' susa. Mete ma hei sue Au, na, rala mara mimiho'o, huu Au uu sia Ama ngga. Au Ama ngga naa, manaseli' lena' Au.
29 Misined'a, Au ufad'e mema' neu nggi ena. No ta'o naa, lele' dala' ia ra dad'i, na hei bisa mimihere Au ena.
30 Nda doo' sa te, Au nda ola-ola' o nggi sa ena. Huu nitu ra malanggan nema ena. Ana to'u parenda' sia raefafo' ia, te koasan nda dai Au sa.
31 Mae ana nema, te Au lao' ukundoo fo tao tungga Ama ngga parendan. Naa natud'u neu atahori sia raefafo' ia oi, Au sue useli' Ama ngga. De, ima fo teu leo!”
