< Ibrani 12 >
1 Dad'i hita mana tasod'a lele' ia, ta'o bee? Ata ona' atahori mana tungga nekesesesu' nenelat ra. Bei-ba'i tara mana ramahere Lamatualain ma'ahulun, ara ona' mana manilu ra rambarii' rereo' fo huhuar nggita. Te mete ma hita fe'e nenepa'a to sala-kilu' ra, naa tao nggita nda tela' be'i sa. Naa de ata musi nggari hendi basa sala-kilu' ra, naa fo ata bisa tela' tahere'. Huu Lamatualain tengga nala hita ena fo tungga nekesesesu' ia, dad'i ta'atataa' fo tela' takandoo losa nggaris mate'en a.
2 Boe ma tela' naa afi' mete d'ii-ona, te mete' a Yesus. Huu Eni mana natud'u dala' fo bisa tamahere neu Lamatualain. Ma dei fo Ana tulu-fali nggita fo tamahere takandoo losa bab'asan. Misined'a do hoko'? Lele' Yesus doid'oso sia hau nggangge' a, atahori raneneut E, te Ana na'atataa' nakandoo. Huu Ana bub'ulu' nae mete ma doid'oson basa, dei fo Eni ralan namaho'o. Naa teb'e. Huu Ana mate de basa ma, Lamatualain so'u E fo endo' sia Lamatualain bob'oa onan, de Ru'a se parenda ra'ab'ue.
3 Mae atahori tao de'ulaka E o, na'atataa' nakandoo' a. De ama afi' lilii' Yesus doid'oson ia, naa fo hei o mi'itataa' mikindoo, ma nda bengge sa.
4 Hei lab'an dala de'ulaka ra ena, te nda fe'e lab'an mihere' losa raa mara sai sa. Teb'e, to?
5 Mbei ma hei lilii' Lamatualain Ded'ea-o'olan fo Ana nafad'e neu nggi, ona' ama' sa ola' no anan nae, “Ana ngge! Mete ma hita Lamatuan huku-doki fo nanori nggo, naa fo musod'a tungga dala ndoo-tetu' a, na, afi mae naa nda papake' sa! Do mete ma Ana na'angge fo nanori nggo, na, ralam afi' na'aana.
6 Huu hita Malanggan na'angge ma nanori atahori fo Ana sue' ra. Mema' basa atahori fo Ana simbo dad'i anan, dei fo Ana na'angge fo nanori se.”
7 De mete ma Lamatualain na'angge fo nanori nggi misod'a tungga dala ndoo-tetu' a, na, mi'itataa'. Ana tao ta'o naa, huu hei dad'i anan ena. Te ama' musi na'angge fo nanori anan, losa anan nahine nasod'a tungga dala ndoo-tetu' a.
8 De mete ma Lamatualain nda na'angge fo nanori nggi ona' anan laen ra sa, naa sosoan nae, hei ia, nda Eni anan sa.
9 Hita biasa fee had'a-hormat neu ama bonggi tara sia raefafo' ia, huu nanori nggita lele' ata fe'e anad'iki'. Naa ndaa ena. Te lelenan fai, ata musi tao rerena' neu Lamatualain, huu Eni, hita Aman sia sorga, de Ana na'angge fo nanori nggita tasod'a tungga dala ndoo-tetun.
10 Hita ama bonggin na'angge fo nanori nggita no' a hate mata', tungga saa fo nae malole'. Te Lamatualain nahine lena' saa fo hita parlu tanori' a. Naa de Ana na'angge fo nanori nggita tasod'a meumare' ona' E.
11 Mema' nda malole' sa mete ma hambu ne'engges. Te dod'oo na rala tara lino-lende, huu tahine tasod'a tungga Lamatua' hihii-nanaun.
12 Toronoo nggare! Tao mi'idere lima mana bengge mara, ma mingganggafa ei mana manggu' mara. Afi' mela' penggo-panggi, te mela' no ndoos mikindoo, fo atahori mamahere' mana male-ma'a' ra, ma'ad'ere bali' fo rela' rakandoo boe. Hei musi tao manggate rala mara ma mi'itataa' mikindoo ma mimihere neu Kristus.
13
14 Toronoo mana mimihere neu Kristus! Hei musi mihehere' fo misod'a dame mo basa atahori. Ma mihehere fo misod'a meumare'. Te atahori nda meumare' sa, nda bisa nita Lamatualain sa.
15 Esa huhuar esa, naa fo afi' losa hei ruma dinggo' ao mara de nda mimed'a mita Lamatualain rala malolen sa. Minea matalolole fo afi' hela esa o named'a rala mera' sia talad'a mara boe. Te naa ona' raso mana meru', mana tao nalutu atahori hetar.
16 Ma besa-b'esa, ma minea fo ruma afi' tao leli. Boe ma besa-b'esa ma minea fo masod'a mara afi' dinggo' hela Lamatualain, ona' Esau. Esau naa, ba'i Isak ana ulun. Fai' sa, Esau bali' no ndoen. De ana no'e nanaat pingga' sa mia od'in Yakob, de bae nendi' hak ulun.
17 Te nda doo' sa ma, ata bub'ulu' Esau fale ralan boe. Huu lele' ama Isak no'e Lamatua' fo fee papala-bab'anggi' ana ulu' neu e, Isak nda bisa no'e sa ena, huu Esau fee hendi parsuma' a hak na. Naa de mae ana nggae ei-ei o, ana nda hambu bali' saa fo ana nggari hendi' ma'ahulun sa ena.
18 Ta'o ia, toronoo nggara e! hita o bisa tema tisi' Lamatualain matan, tungga dala feu' fo Ana soi fee neu nggita. Te lele ulu' a bei-ba'i tara nda fe'e bisa ta'o naa sa. Huu lele' Lamatualain hengge-nee hehelu-fufulin no se, ara deka ro lete' sa, naran Sinai. Sia lete' naa ata ai a mbila. Hambu sanggu-anin boe. Ma Lete' a hatu kib'u-kib'u', de ramatau rae mate.
19 Ara o rena ma'oa liin, boe ma rena Lamatua' haran manaseli' a mia lete' naa. Rena Lamatua' o'olan ma, ara bau ramatau, de ro'e ba'i Musa rae, “Aduu! Hai nda mi'itataa' rena hara' ia sa ena”!
20 Mema' ara nda ra'atataa' sa ena, huu saa fo Lamatua' parenda' naa, beran seli. Huu Ana nafad'e nae, “Esa o nda bole tab'u lete' ia sa boe! Mae atahori do, banda o! Huu se tab'u lete' ia, musi honda se rendi' fatu losa mate.”
21 Saa fo ara rita sia lete' naa, mema' nemetaus teb'e. Losa ba'i Musa o ngge'e-ngge'e boe.
22 Te ia na dala' nisi' Lamatua' nenesoi' ena, de ata bisa ola-ola' mata' to E. Ia na hita tema sia lete' sa, naran Sion. Sia naa hambu kota Yerusalem. Nda kota Yerusalem sia raefafo' sa, te kota Yerusalem feu' sia sorga, naeni Lamatualain mamana leleo-lulu'un. Sia naa, hambu Lamatua' ate nara hetar, losa rifon-rifon, ara aka' feta-dote ra'ab'ub'ue.
23 Kota naa o, dad'i mamana ne'eb'uet mia basa atahori mana ramahere neu Kristus ena. Huu Lamatua' tao susura fo sura' nala nara nara esa-esa' sia sorga ena. Lamatualain o sia naa boe, dei fo Ana mana paresa' ma timba-tai basa atahori masod'an. Basa atahori lele ulu' fo Lamatualain simbo se no malole', ra'ab'ub'ue sia naa boe, huu ramahere neu E. Ara dad'i matetu'-manad'ai' sia naa ena.
24 Yesus o sia naa boe, fo dad'i lelete fee Lamatualain no atahori. Yesus mate raan nandali, fo Lamatualain hengge-nee hehelu-fufuli feu' no nggita. Naa de Yesus raan, tao ma'asufu Lamatualain ralan. Te ia fea' no Habel raan sia Dud'uit Fefeu' a. Huu lele' Kaen nisa Habel, Habel raan mana mandali' naa, tao Lamatualain namanasa, de Ana fee huku-doki' neu Kaen.
25 Pasa ndiki mara malolole fo rena saa fo Lamatualain nae ola' fee nggi. Afi' tao ona' bei-ba'i tara, fo nda simbo ba'i Musa o'olan sa, lele' ana dad'i Lamatualain mana ola-olan mia raefafo' ia. Basa ma Lamatua' fee huku-d'oki' neu se. Ona bee fai hita! Mete ma hita nda nau rena o'olan mia sorga sa, dei fo Ana huku-doki nggita beran lena'.
26 Lele' bei-ba'i tara rambarii' mia lete Sinai, Lamatua' hara manaselin, tao rae a nanggongga'. Ia na, Ana helu-fuli nae, “Dei fo Au tao rae a nanggongga lao esa fai, te nda aka' rae a nanggongga sa, huu lalai a o, nanggongga tungga boe.”
27 Lele' Lamatua' ola' nae, Eni nae tao nanggongga basa' e “lao esa fai”, sosoan nae, Lamatua' nae uli-fae basa saa fo Eni tao sia lalai no raefafo' ia, losa nda mana ma'atataa' ra sa, mopo hendi se. Te huu mana ma'atataa' ra, dei fo rahani rakandoo.
28 Lamatualain to'u parenda' sia sorga. Naa nda bisa nambalutu sa. Sofe' no mole-dame. Huu nae simbo nggi fo dad'i atahorin sia naa, de, ima fo to'e makasi neu E, be'utee neu E, ma tananaru E huu manaselin!
29 Te ata musi besa-b'esa, te Lamatualain nasan, ona' ai a hotu hendi basa' e losa bab'asan.
