< Dud'uit Fefeu' a 41 >
1 Seli too rua ma, mane Masir a nalamein nae, eni nambari sia loe Nil suu na.
2 Aiboi' ma, nita sapi mbaruna hitu. Rou nara manggadidila'. Ara dea reu mia loe a, de raa uru sia naa.
3 Boe ma, sapi hitu fai, dea reu mia loe a. Ao nara nggoda' ra. Ara rambarii' deka ro sapi maao ka hitu' ra.
4 Basa ma, sapi nggoda ka hitu' ra od'o hendi sapi maao' ra. Boe ma mane' a nggengger de fela.
5 Nda doo' sa ma, ana sunggu' selu' fai, de nalamein. Nita are mbule maisi' hitu dea rema mia are huu meulau' esa.
6 Basa ma, nita selu', are mbule laka' hitu, loe-lesu rae reu, dai ani matob'i'.
7 Boe ma basa are mbule laka' ra od'o hendi are mbule maisi ka hitu' ra. Basa naa ma, mane' a fela. Dei de ana nahine, eni nalamein fai.
8 Fefetu anan ma, mane' a named'a nda malole' sa. De ana parenda atahori ra reu ro'e basa mana tiroura ra ma atahori mahine' sia Masir ra. Basa de ana dui meit na neu se, te nda hambu esa nahine meit na sosoa na sa.
9 Basa ma, pagau mana tao mata' neu mane' a nininu na, nasaned'a Yusuf. De nafad'e mane' a nae, “Ama mane'. Au musi utaa sala.
10 Ma'ahulu naa, ama' namanasa au, o nonoo ngga, de tao hai bui rala mi.
11 Tetemba' esa ma, hai ru'a nggi milimein. Esa-esa' no meit na, ma meit naa ra, esa-esa' no sosoa na.
12 Sia bui rala o hambu atahori Ibrani esa fe'e soru'. Malangga bui a so'u e dad'i malangga mana tao mata' sia bui. Hai dui meit mara neu e. Boe ma ana nafad'e meit naa ra sosoa na.
13 De ama mane' so'u bali' au. Te nonoo ngga naa, nenehukun mate. De basa naa ra, ona' atahori Ibrani naa o'ola na!”
14 Mane' a rena nala ma, ana denu atahori lai-lai reu ha'i Yusuf mia bui a. De Yusuf neu eu timi fulu na, tao ao na meu'-meu', ma nggati bua-ba'u na, fo neu nandaa no mane' a.
15 Ana losa, boe ma mane' a ola' nae, “Ta'o ia. Au ulumein, te nda hambu atahori esa nahine meit naa sosoa na sa. Te atahori rafad'e au rae, ho mala'.”
16 Boe ma Yusuf nataa nae, “Ama mane'. Au o nda ala' saa sa' boe. Aka' a Lamatualain mana nala' teb'e meit ma sosoa na. Ana nau nafad'e dala malole' neu ama mane'.”
17 Boe ma, mane' a dui nae, “Sia meit ngga, au umburi' sia loe Nil suu na.
18 Hambu sapi maao' hitu, rou nara manggadidila'. Ara dea rema mia loe a, de raa uru mia loe suu na.
19 Basa ma sapi fea' hitu rema. Te sapi naa ra nggoda rui'. Sia rae Masir ia, au nda fe'e ita sapi nggoda' ona' naa sa!
20 De au titindindi' a. Huu aiboi' ma, sapi nggoda kahitu' ra, od'o hendi sapi maao kahitu' ra.
21 Ara od'o basa ma, ao nara nggoda' fe'e na ena. Boe ma au fela boe.
22 Basa ma, au sunggu' selu', de ulumein fai. Ita are mbule maisi' hitu, dea rema mia are hau' esa.
23 Boe ma, ita are mbule' laka' hitu, loe-lesu rae reu, dai ani matob'i'.
24 Boe ma are mbule laka' ra, od'o hendi are mbule maisi ka hitu' ra. Ma au fela boe. Au dui meit naa ra reu atahori mahine' ra. Te nda hambu esa nahine sosoa na sa' boe.”
25 Dei de Yusuf nafad'e nae, “Ama mane'. Meit ka rua' naa ra sosoa na aka' esa. Lamatualain nafad'e mema' ama mane', saa fo Eni nae tao.
26 Meit naa ra sosoa na ta'o ia: sapi ka hitu maao' naa ra, ma are mbule maisi ka hitu' naa ra, naeni fula-fai betas too hitu. Sosoa nara aka' esa' a.
27 Boe ma, sapi nggoda kahitu' ra, ma are mbule laka kahitu' naa ra, fula-fai ndoe-la'as too hitu.
28 No ta'o naa, Lamatualain nafad'e mema' saa fo Eni nae tao' a. Naa, ona' au ola' fa' ra.
29 Dei fo hita hambu fula-fai betas too hitu ndule mamana' sia nusa Masir ia.
30 Basa fo hita hambu fula-fai ndoe-la'as too hitu. Fula-fai ndoe-la'as naa manaseli', losa nda hambu nanaat sia nusa' ia sa. Basa atahori ndoe rala seli, de nda afi' rasaned'a fula-fai betas naa sa ena.
31
32 Dad'i ama mane' nalamein lao rua naa ra, sosoa na nae, Lamatualain nafad'e mema' saa fo Eni nae tao' naa. Nda doo sa te, ara sangga rae dad'i ena.
33 Huu naa, au o'e ta'o ia: malole lena' ama mane' sangga atahori mahine' esa mana tao mata' nala' no malole'. Fo so'u e fo tao malolole nusa' ia.
34 Fula-fai betas too hitu naa, malole lena' ama mane' so'u atahori fea' fai, fo rad'uru nanaat lena', fo banggi neu lima ma mbeda' babanggi' esa.
35 Ara musi tungga ama mane' parenda na, fo reu ha'i are mia basa kambo' sia Masir. Fo ara mbeda' are sia soka-pole' ra fo nenea malolole.
36 Fo too hitu ndoe-la'as losa, te, hita fe'e ta'ena nanaat. Naa fo nda hambu atahori mate ndoes sa.”
37 Mane' no pagau monae' ra rena Yusuf o'ola na ma, ara tungga e.
38 Mane' a ola' nae, “Lamatualain Dula-dalen koasa na, sia Yusuf. Naa de, hita nda bisa hambu atahori fea' lena' e sa.”
39 Mane' a ola' no Yusuf nae, “Lamatualain nafad'e basa ia neu nggo. Ia naa, hai fe'e bub'ulu' ho mahine'. Ma ho dud'u'a ma lena' basa atahori.
40 Naa de, ia naa au so'u nggo dad'i fetor ngga. Dei fo basa rauinggu nggara tungga parenda ma. Te aka' a au fo lena' nggo.”
41 Basa naa ma, mane' a olu hendi ndeli stempel na, de olu neu Yusuf lima u'u na. Boe ma ola' nae, “No ndeli ia, au so'u nggo dad'i fetor ngga sia basa nusa Masir ia.” Boe ma ana olu bad'u naru meulau' esa neu Yusuf, ma bo'oli rante lilo' neu boto na.
42
43 Ma ana fee kareta ndara karua na neu Yusuf fo sae. Atahori rela ra'ahulu' reu mata' ma nggasi rasafafali rae, “We! Soi dala' o! Fee hadat! Fetor nema tungga ia.” No ta'o naa, mane' a so'u Yusuf dad'i fetor sia nusa Masir.
44 Basa naa ma, mane' a ola' no Yusuf nae, “Ta'o ia. Ho bub'ulu' au ia mane'. Te au ufad'e basa atahori sia Masir ia ae, mete ma ho nda munggolo' sa naa, ara nda bole tao saa sa' boe.”
45 Basa naa ma, mane' a bab'ae Yusuf Safnat Panea, tungga atahori Masir ra naran. Ana na'asasao' Yusuf no ina' esa, naran Asnat. Yusuf ama ari na, naran Potifera. Eni mana tao mata' neu agama sia kambo On. No ta'o naa, Yusuf dad'i atahori monae' sia nusa Masir.
46 Lele' mane' a so'u Yusuf, ana too telu nulu ena. Basa ma, ana neu lao ndule basa mamana' sia nusa Masir.
47 Sia too hitu fula-fai betas naa, osi ra nanaat nara nae na seli.
48 Yusuf denu rad'uru nanaat lena' ra, de mbeda' se. Are mia mamana deka kambo' bee naa, mbeda' se sia soka-pole' sia kambo' naa.
49 Are fo ana nad'uru' naa, nae na seli. Ona' saraae' sia tasi suu na, de nda hambu atahori uku rala sa ena.
50 Fula-fai ndoe-la'as nda fe'e losa sa te, Yusuf sao na Asnat b'onggi ana tou' rua.
51 Yusuf ola' nae, “Lamatualain tao au lilii' doid'oso ngga lele' au lao hela ama ngga ume na.” Naa de ana bab'ae ana ulu na Manase (lii na na'e a ona' ded'ea fea', fo sosoa na ‘lilii'’).
52 Ana hambu ana karua na, boe ma ola' fai nae, “Au hambu doid'oso' nae' sia mamana' ia. Te Lamatualain fee papala-bab'anggi', ma au hambu ana' sia ia.” De ana bab'ae ana' naa Efraim (sosoa na ‘hambu ana'’).
53 Fula-fai betas too hita a basa ma,
54 fula-fai ndoe-la'as too hita losa, nandaa no saa fo Yusuf nafad'e ma'ahulu na. Sia mamana fea', atahori ndoe, te basa mamana' sia Masir, hambu nanaat.
55 D'oo-d'oo ma, atahori Masir ra o ndoe boe. De ara reu ro'e nanaat sia mane' a. Boe ma ana denu se risi' Yusuf, fo tungga' a Yusuf parenda na.
56 Te ndoe-la'as manaseli', de basa atahori sia Masir o ndoe boe. Dei de, Yusuf sefi soka-pole' ra de seo are fee atahori Masir ra.
57 Basa naa ma, atahori ra mia bee-b'ee rema hasa nanaat mia Yusuf sia Masir. Huu ndoe-la'as manaseli'.
