< Galatia 4 >
1 Au fee conto esa fai. Ana' sa na'ena hak simbo hata-heto' mia aman, mete ma aman mate. Te mete ma too na nda fe'e dai sa, nda bisa simbo hata-heto' naa, mae basa naa dei fo dad'i eni enan. Te mete ma toon nda fe'e dai sa, eni ona' ate nda na'ena hak fo ha'i malanggan hata-heto nara sa.
2 Huu naa, musi hambu atahori mete-se'u e no hata-heto nara. Ana' naa musi tungga mana mete-se'u a hihii-nanaun, losa fai' fo aman na'etu' nala', dei fo ana fe'e bisa simbo hata-heton.
3 Hita o ona' naa boe. Lele' Yesus Kristus nda fe'e nema sa, hita fe'e ona' anad'iki' naa. Huu hita fe'e nenepa'a' to raefafo' a hihii-nanaun ona' ate sa.
4 Te nandaa no lele' naa, Lamatualain haitua Anan nema dad'i atahori, naa fo atahori o neneso'u' dad'i Lamatua' ana nara. Lamatualain anan naa, nasod'a tungga atahori Yahudi ra agaman hohoro-lalanen, fo Ana bisa mbo'i basa atahori ma'ahulun mana rasod'a tungga hohoro-lalane' naa.
5
6 Huu hei dad'i Lamatulain ana nara ena, naeni de Ana fee Anan Dula-d'alen nema, nisi' hei rala mara. No dala' naa, hei mi'ena hak mimeli Lamatualain, mae “Ama B'onggi'”.
7 De ia naa, hei nda afi' dad'i ate mana nda na'ena hak simbo hata-heto' sa. Te hei dad'i Lamatualain anan mana na'ena hak simbo basa hata-heto' fo Ana helu-fuli' a.
8 Fe'esa'an, lele' hei nda fe'e mihine Lamatualain sa, tao ao mara dad'i ate fo songgo d'ala nda matetu' ra sa.
9 Te ia naa, hei mihine Lamatualain ena. Malole lena' au ufad'e ae, Lamatualain mana nahine nggi. Na, ta'o bee de hei mae songgo bali' dala' nda na'ena ngguna ma koasa saa sa boe? Hei mae to'u mihere' dala' naa ra, fo dad'i ate nara fai, do?
10 Au rena oi, hei tao tungga hohoro-lalane' tungga fai, fulan, ma too, fo mae sob'a tao Lamatualain ralan namaho'o.
11 Ia tao au du'a sosonat! Se'u-se'u te au b'engge unori nggi doon seli ena, te parsuma' a.
12 Toronoo susue nggara e! Au hule fo misod'a nenembo'it mia dala' naa ra, ona' au ia. Huu au usod'a nenembo'it mia agama hohoro-lalanen ena, ona' hei nda atahori Yahudi ra sa. Fe'esa'an, lele' hita ta'ab'ue, hei nda mi'isususa' au sa.
13 Basa hei bub'ulu', lele' au uma dui-b'engga Hara-lii Malole' neu hei fefeun, au mamahed'i'.
14 Ona' naa o, hei nda oi au sa, huu hei simbo au, ona' au ia, Lamatualain aten mia sorga. Lelenan fai, hei simbo au, ona' au ia, Yesus Kristus.
15 Lele' naa, basa nggita tamaho'o seli. Te, ta'o bee de ale' ia nda ta'o naa sa ena? Lele' naa hei sue mala au seli, sambe hei sad'ia ed'o mala mata heheli mara fo fee neu au.
16 Te ale' ia hei du'a mae au ia musu, huu au ola' ndoo-tetu' fee neu nggi, do?
17 Mana peko-leleko' ra nda nau au u'ub'ue o nggi sa, de ara manggate kokoe nggi, fo tungga basa atahori Yahudi ra agaman hohoro-lalanen. Ara nau hei mbute-mue tungga' a hihii-nanau nara.
18 De mete ma hei manggate tao d'ala malole', naa malole boe! Mae au u'ub'ue 'o hei, do hoko' o, tao' a malole'.
19 Ana susue nggara e! Ia na, au tao-ues ita mamate ngga fee nggi, de au doid'oso ona' ina' mana named'a nae b'onggi. Ma au nda uloe' tao ues sa, losa rala mara dad'i ona' Kristus ralan.
20 Te ia na, au nda ita' ae tao nggi ta'o bee sa boe! Au hii ae eti ola' mata' o nggi, naa fo au afi ola' deres ta'o ia.
21 Mete ma hei mae misod'a tungga atahori Yahudi ra agaman hohoro-lalanen, malole lena' hei mihine hohoro-lalane' a sosoan d'ei.
22 Te sia Lamatua' susura Meumaren dui so'al sira ba'i Abraham na ana toun rua. Ana hambu ana' esa mia aten, ma ana' esa mia sao kab'in na, fo nda ate sa.
23 Ate naa, b'onggi nala anan, huu tungga atahori hihii-nanaun. Te sao kab'in na b'onggi nala anan, huu Lamatualain helu-fuli mema' ta'o naa neu Abraham ena.
24 Ina ka rua' naa ra, dad'i nekendandaa' netud'u Lamatualain tao hehelu-fulin rua no atahori. Helu-fuli' esa, Ana helu neu ba'i Musa mia lete Sinai, lele' na'onda atahori Yahudi ra agaman hohoro-lalanen. Atahori mana to'u nahere' agama hohoro-lalanen naa, sira o ate ona' Hagar boe.
25 Mamana' naa sia Lete Sinai sia rae Arab, ona' Hagar e boe. Basa atahori Yerusalem mana fe'e to'u rahere' Agama Yahudi hohoro-lalanen, sira o ate ona' Hagar boe.
26 Te Hehelu-fufuli' laen a, natud'u kota Yerusalem esa sia sorga. Lamatualain ana nara mana leo sia na, nda ate sa. Sira, atahori nenembo'it nda mana nenepa'a' no agama hohoro-lalanen sa. Huu naa, sira ona' hita mama Sara na, Abraham sao kab'in na.
27 Huu sia Lamatua' Susura Meumaren nenesura', oi: “Woi! Ina nda mana b'onggi' sa e! tao mumuho'o ralam leo! Woi! Ina' rala nda mana named'a hed'i bob'onggi' sa e! sod'a no nemoho'ot leo! Ina rala mana mambalutu', huu saon nda taoafi' neu e sa ena, dei fo hambu ana' hetar lena' ina' fo saon tao mata' neu e.”
28 De toronoo nggara e! Lele ulu' a Lamatualain helu-fuli fo fee Abraham ana'. Te doo' dei de Lamatualain natetu hehelu-fufulin, fo fee Sara b'onggi Isak fee Abraham. Hita o ona' Isak boe, huu Lamatualain helu-fuli fee tititi-nonosi' laen fee Abraham.
29 Lele' ate a anan, fo neneb'onggi' tungga atahori hihii-nanaun, na'amoko ma, ana tao na'asususa' Isak, fo mana neneb'onggi' tungga Lamatualain Dula-d'alen hihii-nanaun. Naa o ona' a saa mana dad'i' ena.
30 Lamatualain Susura Meumaren sura' oi, “Mbuu hendi ate a no anan. Huu ate a anan nda na'ena hak simbo hata-heto' sa. Aka' sao kab'in a anan na'ena hak.”
31 De ta'o ia, toronoo nggara e! Hita nda ona' ate a anan sa, huu hita nda afi' to'u tahere' agama Yahudi hohoro-lalanen sa. Te hita ia, ona Abraham anan mia sao kab'in na, huu hita tamahere neu Yesus Kristus.
