< Efesus 1 >
1 Sod'a-mole' mia au, Paulus. Au sura' susura ia fee neu basa hei, mana dad'i Yesus Kristus atahorin sia Efesus, ma mana ma'atataa' misod'a meumare' tungga hihii-nanaun. Eni ia, mana denu au tungga Lamatualain hihii-nanaun.
2 Naa! Lamatualain, hita Aman. Ma Yesus Kristus, hita Lamatuan. Au hule fo Ara ratud'u rala malole Nara fo hei leo-lao no mole-d'ame.
3 Koa-kio Lamatualain! Koa-kio hita Lamatuan Yesus Kristus Aman Lamatualain. Huu Lamatua' fee hita papala-bab'anggi' mata'-mata' mia sorga, huu hita dad'i Yesus Kristus atahorin ena.
4 Te lele' raefafo' fe'e nese, Lamatualain sue ma pili nala hita ena, fo dad'i teu Kristus atahorin. Ana nau hita tasod'a no meumare' fo atahori nda bisa rundu sala' neu nggita sa.
5 Ana na'etu' basa eni' a ma'ahulun, fo pake Yesus Kristus tao hita dad'i Anan. Ia mana tao ralan namaho'o.
6 Naa de hita koa-kio E. Huu natud'u rala malolen neu hita, fo tasod'a ta'ab'ue to Ana susuen.
7 Mae ma'ahulun hita nda tasod'a meumare' tungga Lamatualain d'ala masod'an sa o, Ana natud'u rala malolen, ma haitua Anan, fo raan nandali losa mate. No dala' naa, Anan soi-tefa nggita mia sala-singgo tara.
8 Huu sue naseli' hita, de Ana o tao manggarelo hita ralan, fo bisa tahine hihii-nanaun.
9 Ma'ahulun, Lamatualain nda fe'e nafad'e basa hihii-nanaun neu atahori sa. Te ale' ia, Ana fee hita tahine tae, eni' a lele ulu' a Ana na'etu' nala nae pake Yesus Kristus fo nad'ame' atahori no Lamatualain.
10 Losa fain, Yesus Kristus dad'i Malangga fo nalalao basa mana sia raefafo ma sia sorga ra.
11 Huu hita tasod'a to Kristus, naa de hita simbo tala hata-heto' mia Lamatualain. Te mia fefeun, Ana pili hai atahori Yahudi, dad'i Eni atahorin ena. Ana nae pake hai fo soi dala' fee neu nusa' laen ra, naa fo basa atahori bisa ramahere Kristus. Basa ia ra dad'i, tungga saa fo Ana na'etu' basa ena. No ta'o naa, basa hita bisa so'u-boti' Lamatualain nara manaselin.
12
13 Huu hai soi dala' ena, naa de hei mia nusa' laen o bisa maso' dad'i Kristus atahorin, sad'i hei mimihere Hara-lii Malole matetun naa. Huu hara-lii Malole' naa fee masod'a neu nggi. Mete ma mimihere ta'o naa, na hei simbo Lamatualain Dula-d'ale Meumaren fo Ana helu-fuli' a. Te Dula-d'ale Meumare' naa, ona' cap fo dad'i tatanda' oi, hei dad'i Eni enan ena.
14 Dula-d'ale Meumaren o dad'i tanda nemehere' oi, dei fo Lamatualain fee basa saa fo Ana helu-fuli' naa, losa soi-tefa hita dad'i Eni atahori nara, de nene koa-kio', huu manaseli'.
15 Au rena nae' ena, so'al hei nemehere mara neu Hita Lamatuan Yesus Kristus, ma susue mara neu atahori mamahere' ra. Naa de
16 au nda uloe' o'e makasi neu Lamatualain sa.
17 Au hule-o'e ae, “Ama B'onggi'! Ama', au Lamatua ngga Yesus Kristus Lamatualain na. Ma Ama', manaseli'. Au o'e Ama' fee Dula-d'alem neu atahori Efesus ra, fo rahine d'ala-d'ala ndoo-tetu', ma rahine Ama' no malole'.
18 Au o'e fo Ama' Lamatualain soi rala dud'u'a nara, ma tao munggurelo rala nara, fo rahine basa saa fo Ama' helu-fuli nae fee neu se. Au o nau fo ara rahine hata-heto' fo Ama' helu-fuli mae fee neu se. Te hata-heto' naa, manaseli' teb'e, na!
19 Au o o'e fo Ama' tulun, fo rahine malole selu' Ama' koasa mana selim. Huu Ama' pake koasa naa fo tulun atahori mamahere' ra.
20 Te Lamatualain koasan naa, manaseli' teb'e! Ana tao nasod'a bali' Yesus Kristus mia mamaten nendi' koasa naa. Basa ma Lamatualain so'u Yesus Kristus sorga neu, de na'e'endo E sia Lamatualain bob'oa onan sia mamana' nene fee had'a-hormat seli.
21 Ana sia ata' lena' basa mana sia raefafo' ma sia sorga ena. Huu Ana manaseli' lena' basa koasa, ma mana to'u parenda' ra. Ana to'u koasa manaselin naa, nda aka' lele' ia sa. Huu Ana to'u nakandoo losa doo ndu'u doon. (aiōn )
22 Lamatualain mana fee basa' e be'utee neu Kristus. Ma Ana o mana so'u Kristus dad'i Malangga fo nauli basa dala' nato'u' no atahori mamahere' ra.
23 De mete ma Ana dad'i Langga', na hita atahori mamahere' ra dad'i ona' Eni aon. Dei fo hita mana tao tabasa' saa fo Ana tao lele' Ana fe'e mia raefafo'. Huu Eni mana na'ena koasa fo tao basa' e dad'i, tungga Lamatualain hihii-nanaun.” Au hule-o'e fee nggi ta'o naa.
