< Ded'enu' ra Dud'uin 3 >
1 Fai' esa, lii' telu bob'o na, Petrus no Yohanis risi Lamatua' Ume Hule-O'e Huu Na. Rae hule-o'e ro atahori fea' ra.
2 Ara rae maso' tungga lelesu ine' esa nara na ‘Lelesu Meulau'’. Sia naa ara rita tou' keko' esa. Tungga fai atahori lu'a rendi e nisi' mamana' naa fo ana bisa hule-hule' sud'i' a saa sia atahori mana maso' risi' Ume Hule O'e-Huu' a.
3 Ana nita Petrus no Yohanis rae rala reu, ma ana loo lima na de no'e oi, “Ama nggare! Sue au dei. Fee au saa mbei dei.”
4 Ru'a se mete e, ma Petrus oi, “A'a! Mete ia dei!”
5 Atahori naa boti' mata na fo mete ru'a se, ma dud'u'a nae, “Wi! Ru'a se, rae fee au saa o.”
6 Te Petrus oi, “A'a! Au nda ma d'oi' sen esa sa' boe. Te au ae fee nggo, saa fo au hambu oras ia. A'a rena malolole, e! No koasa mia Yesus Karistus, atahori Nasaret naa, au denu nggo mumburi' fo lao' leon!”
7 Boe ma Petrus to'u atahori keko' naa lima onan, de nafefela e. Ma ei nara hai reu' ena.
8 Aiboi' ma, ana teteek nambarii', ma lao' neu-nema, fo sob'a ei nara. Basa de ana tungga maso' nisi' Ume Hule-O'e' rala neu no ka rua' naa ra. Ana lao' teteek no koa-kio Lamatualain.
9 Ma basa atahori ra rita e lao' no koa-kio Lamatualain.
10 Ara rahine e ma titindindi. Ara oi, “Eni atahori keko' mana hule-hule' ma soa endo' sia Lelesu Meulau' a, to? Saa de ta'o naa, e?”
11 Basa ma, atahori naa tungga deka-deka Petrus no Yohanis. Telu' se losa ume los esa naran ‘Ume Los Mane Soleman’. Boe ma, basa atahori rema heo rala se no titindindi.
12 Petrus mete atahori naa ra, boe ma ola' oi, “He! Atahori Isra'el re! Ta'o bee de toronoo' ra titindindi mete dala' ia? Ta'o bee de hei mete mimemeu mikindoo' a hai? Hei mae atahori ia lao' huu hai pake mod'o, do, huu hai manggate tungga Lamatualain? Do, ta'o bee?
13 Au ae ufad'e ta'o ia: Hita bei-ba'i nara, Abraham, Isak, no Yakob, be'utee neu Lamatualain. Ana mana so'u boti' Yesus, Eni atahori na, fo Ana tengga nala' a. Yesus naa, atahori fo fai ma'ahulu na hei nggari hendi fee neu Hofernur Pilatus. Hofernur nae mbo'i hendi E, te hei lab'an hihii na, naa fo ana nda mbo'i E sa.
14 Te Yesus, Atahori nda masala' sa. Rala na malole'. Hofernur nae mbo'i E, te basa nggi lab'an e. De'ulaka' mana seli' fai, hei dunggu-mbau denu e mbo'i atahori de'ulaka' esa, tukan tati nisa atahori, fo fee bali' neu hei.
15 Hei mana tao misa Yesus. Te huu Eni mana tao hita tasod'a. Mema' Ana mate ena, te Lamatualain tao nasod'a bali' E mia mamate Na. Hai mita E no mata mara ena.
16 Hei mihine atahori keko' ia. Ia naa, ana ma'adere ena, te hai nda mana tao mihai' e sa. Hai nda mi'ena koasa saa sa' boe. Koasa naa mema' mia Yesus. Atahori ia ma'adere bali' ena, huu namahere Lamatua' Yesus. Yesus mana na'ahahai' e sia hei mata mara.
17 Toronoo nggare! Ia naa au bub'ulu' ae hei, mo malangga mara, tao de'ulaka' neu Yesus te hei nda bub'ulu' eni nenendi na sa.
18 Te Lamatualain nafad'e mema' soal Kristus mia doo na neu pake mana ola-ola nara nae, Atahori fo Ana tengga nala' a, musi lemba doid'oso'. Ia naa, dala' naa dad'i ena.
19 Huu naa, hei musi lao hela sala mara, fo bali' misi' Lamatualain fo Ana fee ambon ma nda nasaned'a hei sala mara sa ena.
20 Dei fo Lamatualain tao manggatee hei rala mara. Ana o nae haitua bali' fee hei, Kristus fo Ana tengga nala' a. Kristus naa, naeni Yesus fo ma'ahulu na Ana haitua fee hei' a.
21 Ma'ahulu na, Ana ola' pake mana ola-ola Nara oi, ‘Dei fo Lamatualain natetu basa' e dad'i feu'!’ Naa de, Yesus musi nahati, sia Mamana Meumare Na losa fai na nema, fo Ana nafeu basa dala' ra. (aiōn )
22 Ma'ahulu na, bai Musa o ola' fee atahori Isra'el ra nae, ‘Dei fo hei malangga ma, Lamatualain, denu atahori esa mia hei fo dad'i mana ola-ola na, ona' Ana pake au dad'i mana ola-ola' na. Dad'i hei musi pasa ndiki mara fo rena saa fo Ana nae nafad'e hei.
23 Te seka nda hii rena Atahori naa o'ola na sa, dei fo ana saranggaa mia Lamatualain atahori Nara, ma nda ma hak no se sa fai.’
24 Nda aka' a ba'i Musa ola' ta'o naa sa. Te Lamatualain o pake atahori fea' ra fo dad'i mana ola-ola nara. Ara rafad'e ta'o naa boe. Ona' a Lamatualain pake ba'i Samuel fo nafad'e saa fo hita tita no mata tara ale' ia.
25 Lamatualain o helu hita ba'i Abraham na nae, ‘Mia ho tititi-nonosi mara, au fee papala-bab'anggi' neu atahori mia basa nusa' sia raefafo' ia.’ De ia naa, hehelu-fufuli' fo ma'ahulu na Lamatualain fee neu mana ola-ola nara, dad'i sia hei, au toronoo atahori Isra'el nggara.
26 Lamatualain haitua Ana Na, fo Ana tengga nala' a, nema natud'u dala' fo hei lao hela sala mara. No ta'o naa, Ana natud'u rala malole na neu nggi. Lamatualain haitua Ana' naa na'ahulu' fee hei, dei fo fee nusa fea' ra. Naa dad'i papala-bab'anggi' fee basa hita.’
