2 Yohanis 1

1 Mama bo'i! Susura ia mia au, Yohanis, mana nalalao nggarei'. Au sura' susura ia fee mama, fo Lamatualain pili nala dad'i atahorin ena, ma fee mama ana nara boe. Au sue-lai basa hei fo rala mana nenepa'a' no dala ndoo-tetu' ra. Basa atahori laen mana rahine dala ndoo-tetu' ra, sue-lai nggi boe.

2 Hai sue-lai nggi, huu dala ndoo-tetu' ra nenesela' sia rala tara, ma dei fo rasod'a rakandoo sia hita e. (aiōn g165)

3 Au hule-o'e fo Lamatualain, no Anan, Yesus Kristus, ratud'u rala malole nara ma rala susue nara neu nggita, fo ata bisa tasod'a no mole-dame, esa sue-lai esa, ma nenepa'a takandoo to dala ndoo-tetu' ra.

4 Au umuho'o ala seli, lele' undaa o mama ana nara ruma, ma ita masod'a nara malolole, tungga dala masod'a ndoo-tetu', ona' Ama' Lamatualain fee parendan neu nggita ena.

5 Mama bo'i! Lele' ia au o'e fo basa nggita tasod'a no susue-lalai', au o'o'e ngga naa, nda parenda feu' sa, te au fee' a nesened'a' sia parenda' fo hita to'u mema' mia fefeun.

6 Hita bisa tatud'u susue-lalai' tara, mete ma ata tao tungga Lamatualain parenda nara. Eni' a mia lele ulu' a, Ana parenda nggita fo tasod'a esa sue-lai esa. Ia nda d'ala feu' sa, te hei rena parenda' ia eni' lele ulu' a.

7 Mana peko-leleko' hetar lao ndule raefafo' ia ena. Ara ranori rae, Yesus Kristus nema sia raefafo' ia, te Eni nda atahori teteb'es sa. Sira o, mana peko-leleko' mana lab'an Kristus, ma nda nau simbo rae, Yesus naa, naeni Kristus sa, fo Lamatualain pili nala mema' eni' a lele ulu' a.

8 Minea matalolole, fo beb'engge tara afi mopo hendi se. Dad'i hei musi manggate tao ues mikindoo, fo ama bisa hambu basa papala-bab'anggin fo Lamatua' helu-fuli' nae fee nggi sia sorga.

9 Te atahori mana lao hela Kristus nenorin, eni nda ne'eb'ue no Lamatualain sa. Te atahori mana to'u nahere' nenori' naa ra, eni na'ab'ue no Lamatualain, ma Anan, Yesus Kristus.

10 Mete ma hambu atahori rema ranori dala-dala nda matetu' so'al Kristus, na, afi' simbo e sia ume mara, ma afi' taoafi' neu e.

11 Te mete ma taoafi' neu e, na, hei tungga ue-tatao de'ulaka nara ena.

12 Au fe'e ae ufad'e dala' hetar neu nggi, te malole lena' au afi sura' neu susura. Huu nda doo' sa te, au ae eti ola-ola' mema' o nggi, fo basa nggita tamaho'o ona esa'.

13 Lamatualain pili nala mama a'a inan boe. Ana ara haitua hara malole' fee mama se sia naa. Ba'u a naa ena. Sod'a-mole' mia au, Yohanis.