2 Korintus 7

1 Toronoo susue nggara e! Huu Lamatua' helu-fuli basa dala' ia ra fee neu nggita, naeni de ata musi tao tameu rala tara ma masod'a tara. Afi hela manggenggeo' mbei boe, leo sia ao tara. Huu hita nau dad'i meu' parsen natun esa fee neu Lamatua', fo tatud'u tae, hita tamatau ma fee had'a-hormat neu E.

2 Toronoo nggara, e! Fee hai kaka'e'. Soi rala mara fo simbo hai no malole. Afi' mi'iteme rala mara. Huu dalahulun, lele' hai sia hei talad'a mara, hai nda tao mita sala' neu atahori esa sa boe. Hai nda kokoe mita atahori fo tao sala' sa. Hai o nda laka-ese mita atahori fo sangga hahambu' mia se sa.

3 Au masud ngga, nda fua sala' neu nggi sa. Te au ufad'e basa ena, ae hai sue nggi. De mae ta'o bee o, ita' hai mate do masod'a' o, hai nenefutu-pa'a' mo nggi.

4 Ia naa au nda dud'u'a sa ena, huu umuhere neu nggi. Au o ola' koao so'al hei. Hei o tao manggatee rala ngga boe. Dad'i ita' mae hai hambu sususa' mata'-mata' o, au rala ngga namaho'o nakandoo' a, huu hei.

5 Ma'ahulun lele' hai ima sia profinsi Makedonia, hai bengge mita' mamate mara. Huu hai hambu sususa' dii-ona' na. Hai o mireresi mo atahori dea' ra boe. Hai mimed'a nemetaus sia rala mara.

6 Te Lamatualain, mana fee beb'e'i-bara'ai' neu atahori mana mopo nemehena nara, ma mana named'a baraat. Dad'i Ana tao manggatee hai rala mara lele' Ana haitua Titus nema.

7 Titus neneman naa tao manggatee hai rala mara. Huu ana nafad'e nae, lele' eni fe'e sia naa, hei tao manggatee eni ralan. Rena ta'o naa, naa tao manggatee hai rala mara. Ana o dui nae, hei hii mae mita au, ma hei fale rala mara teb'e huu hei nda ena-ai mana hohongge' a sa. Ana o dui so'al hei tao saa fo tulu-fali au. Naa de au rala ngga namaho'o.

8 Naa, au bub'ulu' ae, susura dalahulu ngga mana ena-ai nggi seli, mema' tao nggi susa. Te au nda fale-rala ngga sura' susura naa sa. (Tao-tao te lele' naa, au fale rala ngga mbei, lele' au bub'ulu', susura ngga naa, tao nggi susa, mae losa' a o.)

9 Te ale' ia, au rala ngga namaho'o. Au nda ma'ahee sa huu lele' naa hei susa. Hoko'! Au umuho'o, huu lele' naa, susura ngga kokoe nggi fo doa' leo. Basa ma mitaa sala-kilu' naa, ma lao hela tatao-nono'i nda malole' naa sa, fo heo' bali' tungga Lamatua' dala masod'a ndoo-tetun. Te Lamatua' mana tao nggi fale rala mara ta'o naa. No ta'o naa, hai susuram tao nggi dad'i malole'.

10 Huu mete ma hita fale rala tara tungga Lamatua' hihii-nanaun, na hita taloe' tao dala de'ulaka' ra, fo heo' bali' tao dala ndoo-tetu' ra. Naa mana mbo'i nggita mia Lamatua' huku-dokin, naa fo hita o sudi boe fale rala tara takandoo' a. Te mete ma tae hita fale rala tara te sia' a bafa tara, ona' atahori raefafo' ia biasa nara, dei fo hita tambalutu.

11 Hei dud'u'a sob'a! Lele' hei baca au susura ngga, au bub'ulu' hei fale rala mara boe. Naa tungga Lamatua' hihii-nanaun. Huu naa tao nggi tao ues mita' mamate mara fo ena-ai mana hohongge' a. Hei bengge mo de'ulaka' naa. Hei o mimitau boe, afi' losa ana tao nakandoo de'ulaka' naa. Hei hii mae mita au fai, ma mihehere fo tao' a malole'. Hei o mihehere fo mae huku-doki atahori mana tao sala' a. Huu hei tao ndoo-tetu' ta'o naa, naa de hei meu'. No ta'o naa, nda hambu esa fee sala' neu nggi sa boe.

12 Dad'i au nda sura' susura dalahulu ngga na, fee neu atahori mana tao de'ulaka' a sa. Au o nda sura' fee neu atahori mana hambu de'ulaka' mia atahori naa de'ulakan sa. Te au sura' susura naa fee neu nggi, fo utud'u ae, hei ded'ea-o'olam sia Lamatua' matan naa, teteb'es. Ma ama sue hai no teteb'es.

13 Basa ia ra, tao manggatee hai rala mara. Hei o tao manggatee Titus ralan boe, naa fo ralan o teer boe. Naa o tao hai rala mara boe ma'ahee.

14 Au so'u-so'u' ita nggi sia Titus matan so'al hei tatao-nono'i malole mara. Au o ufad'e e ae, hei nda tao mi'imamae' mita au sa. Huu basa dala' fo hai dui mita neu hei, naa teb'e. Ma, basa dala' fo hai dui so'al hei neu Titus, naa o teb'e.

15 Dad'i mete ma Titus nasaned'a hei tao tungga au parenda ngga, naa ana boe sue nggi. Ana o nasaned'a lele' eni naa neti, ama simbo e no had'a-hormat.

16 Au rala ngga namaho'o, huu au umuhere nggi sia basa dala' ra. De au nda du'a-du'a' nggi sa ena.