< 2 Korintus 4 >
1 Lamatualain natud'u rala malolen neu hai ena. Naa de Ana denu hai mii dui-b'engga neu atahori so'al Hehelu-fufuli Feun. Naeni de hai mi'itataa' mikindoo, ma manggate mara nda mopo sa.
2 Dad'i mia dalahulun a hai mi'etu' ta'o ia: hai mifad'e relo-relo ena mae, hai nda nau tao dala-dala de'ulaka' sa, ona' atahori laen ra. Ara hii' a tao ra'afuni', fo atahori nda rita sa. Ma ara nda ra'ena mamaet sa. Te hai nda nau peko-leleko' mo atahori sa. Hai o nda leleko' so'al Lamatualain Ded'ea-o'olan sa, te hai minori no relo-relo saa fo ndoo-tetu' a. No ta'o naa, basa atahori bisa paresa' rala hai o'olam sia Lamatua' matan, ma nile hai ia, atahori ona' beek.
3 Mete ma atahori nda nau rahine Lamatua' a Hara-lii Malolen fo hai minori' a sa, na dei fo ara rambalutu, huu saranggaa mia Lamatua'.
4 Nitu ra malanggan, ona lamatua' esa fo ale' ia atahori be'utee neu' a. Ana tao atahori ruma uta nara mbaka, ona' rala nara ra'ateme ena. Sira, atahori nda mana ramahere neu hita Lamatualain matetu' a sa. Huu rala nara ma'ateme' ona' naa, de ara ona' poke' ra, nda rita Lamatualain manggarelon sa. Naa de ara nda bisa rahine Hara-lii Malole' so'al Kristus sa. Ara o nda rahine Kristus manaselin sa boe. Huu Kristus naa, mata' sa no Lamatualain. (aiōn )
5 Hai nda ola' nae' so'al hai aom sa. Te hai ola' nae' so'al Yesus Kristus, hita Lamatuan. Hai ola' aka' ia so'al hai aom, naeni, hai tao ao mara ona' atahori ded'enu' fo mete-se'u nggi, huu hai dad'i Yesus atahorin.
6 Lele ulu' a, Lamatualain ola' nita nae, “Musi hambu manggarelo' naronda sia mamana ma'ahatu' a.” Basa ma, Ana tao rondan naronda sia rala tara. Huu Ana hii' a fee manggarelon nema nggita. Naa sosoan nae, lele' hita du'a so'al Kristus, hita o tasaned'a Lamatualain manaselin boe.
7 Mae hita ia, atahori biasa o, te Lamatua' mbeda' sud'i' a saa mafelit ia sia rala tara ena. Naa ona' atahori sa mbeda' sud'i' a saa mafelit na sia hura rae a ena. Sud'i' a saa mafelit ia, naeni, Lamatua' manggarelon ma hura rae a hita aon. Matetun, koasa manaseli' mana sia hita ia, nda na'oka sia hita sa, te na'oka sia Lamatualain
8 Dad'i mae atahori tuni-ndeni tao ra'asususa' hai sia bee-b'ee, te hai mi'itataa' mikindoo. Mae hai nda mihine basa e sa o, hai manggate mara nda mopo sa.
9 Mae atahori tao ra'asususa' hai talalu o, Lamatualain nda lao hela hai mesa' nggi sa. Mae atahori poko-paru hai o, nda tao ralutu hai sa.
10 Huu hai hambu poko-paru' mata'-mata', de hai mii sia bee-b'ee na, hai fee neseneneda' neu atahori mae, Yesus o hambu poko-paru' talalu ona' naa boe lele' Ana mate. Huu, mae atahori poko-paru mata'-mata' hai o, hai misod'a mikindoo' a. Naa o fee nesenened'a' neu basa atahori oi, Yesus nasod'a nakandoo sia hai.
11 Teb'e! Lao hetar, hai fe'e masod'a ia ra, mae' a mate, huu hai dad'i Yesus atahorin. No ta'o naa, basa atahori bub'ulu' oi, Yesus fee hai masod'a ndoo-tetu' a, mae dei fo hai mate.
12 Dad'i mae neu matete'en hai mate, te hai nda mimitau ola' so'al Kristus sa. Huu hai sad'ia mate ona' naa, naa fo ama hambu masod'a ndoo-tetu' a.
13 Sia Lamatua' Susura Meumaren nenesura' oi, “Huu au umuhere Lamatua', naeni de au ola'.” Hai dudu'am, ona esa'. Huu hai mimihere Lamatua', naeni de hai musi ola' dui-b'engga so'al Eni neu atahori.
14 Hai bub'ulu' mae, Lamatualain mana tao nasod'a bali' hita Lamatuan Yesus Kristus mia mamaten. Dei fo Eni o mana tao nasod'a bali' nggita, huu hita nenepa'a' to Yesus. Dei fo Lamatua' naririi basa nggita sia Matan, fo simbo nala nggita.
15 Lamatua' tao basa dala' ia ra, fo tulu-fali nggi. Ana o nau natud'u Rala Malolen neu atahori ra, mana boe ramaheta tungga-tungga fai. Dei fo ara o ro'e makasi nae-nae mbali E. Ma, ara o rataa manaselin.
16 Naa de ata ta'atataa' takandoo, ma manggate tara nda mopo sa. Mae ao tara rambalutu, te Lamatualain tao rala tara boe ma'adere tungga fai.
17 Huu tungga dud'u'a tara, lele' ia hita hambu sususa' mata'-mata'. Te ata musi tasaned'a tae, dei fo Lamatua' nau so'u nananaru nggita. Naeni de ata tae saa fo mana dad'i lele' ia, nda na'ena sosoan saa-saa sa boe! (aiōnios )
18 Dad'i ata musi mete dala-dala nda nenenita' ra sa. Afi' mete aka' mana nenenita' a. Huu dala-dala fo nenenita' ia, nda na'atataa' doo' sa. Te dala-dala' fo nda nenenita' naa, dei fo ra'atataa' rakandoo nda nama'etu sa. (aiōnios )
